Tulagaese ae Lotogatasi
O le faatasia e faavavau e amata i le lotogatasi i le taimi nei.
E lei maua e Diana Vasquez se avanoa e faatofa ai i lona tama. Na te lei iloa na te manaomia. Ina ua latou o ma ona tuagane e toalua i le aoga i le aso 9 o Iuni, 2007, na foliga malosi lona tama. Ae a’o lei oo atu o ia i le fale, na taoto lona tama e malolo ma e lei toe ala mai.
“O se mea e lei mafaufauina,” o le tala lea a Diana, o lē na 16 tausaga i lena taimi. “I le taimi muamua lava sa le mafai ona ou taliaina.”
E oo lava ia i latou e iloa e tatau ona faatasia e faavavau ia aiga, latou te le amanaiaina o latou aiga i nisi o taimi. E moni, atonu e faasoesa ou tei, e le tutusa manatu o matua ma tamaiti i taimi uma, ma o le faaaluina o taimi ma uo e masani ona foliga mai e sili atu le malie.
Ae pe a tulai mai se mea matautia e aunoa ma se lapataiga, e pei ona oo i le aiga o Diana, e faafuasei lava ona avea mea e matua taua—e pei o le aiga—ma mea e sili atu le taua.
Mo le aiga o Diana o le mea e sili ai, o le faatasia i lenei olaga ma le olaga a sau o se mea ua leva ona latou galulue i ai. O taimi faigata na semanu e faataapeapeina ai i latou, a ua aumaia ai nei le toafilemu ma le fiafia i lenei olaga ma le faamoemoe o le a mafai ona latou faatasi i le isi olaga.
O Le a le Lotogatasi?
O Diana ma lona aiga e nonofo i Cusco, o se aai maualuga i atumauga o le Peruvian Andes, i le totonugalemu o le malo anamua o Inca.
I tausaga a o lei maliu lona tama, sa maua e le aiga o Diana se nofoaga e fiafia e tafafao ai i Sacsayhuamán, o se toega o se fale tele e le mamao ma lo latou aiga. O puipui na fausia e tagata Inca e matua malolosi lava ma na faasaoina mai i le silia ma le 500 tausaga ma mai mafuie e le mafaitaulia.
Ia Diana, e pei lona aiga o se tasi o na puipui. Na luluina i latou e faigata, ae latou te lei pauu ai lava.
O maa o loo fausiaina ai puipui o le Sacsayhuamán e eseese le lapopoa ma foliga; o isi e uumi, o isi e pupuu, o isi e faatafafa, ma o isi e na ona lapopoa lava. Ae o le eseese o maa taitasi e le vaivai ai le puipui. Pe a faatulagaina sao, o le eseese o le lapopoa e fesoasoani lea e faamau faatasi ai le fale. O le eseesega o maa e matuai fesoasoani lava e faataunuu ai lo latou faamoemoega e tasi.
E mafai foi ona faapena i o tatou eseesega.
“E tofu uma lava i tatou ma meaalofa ma taleni eseese,” o le tala lea a Diana. “E tatau ona tatou faaaogaina na mea e fesoasoani atu ai i isi” (tagai i le 1 Korinito 12).
Ina ua mavae le maliu o le tama o Diana, na tofu latou ma lona tina ma ona tuagane e toalua ma matafaioi e talafeagai lava ma a latou taleni ma malosiaga, ae na galue lava le tagata ia mo se faamoemoega e tasi: o le fetausiai e le tasi le isi. A o latou faia lena mea, ua latou “fusifusia faatasi o latou loto i le lotogatasi ma le fealofani” (Mosaea 18:21).
Na faamatalaina e Peresitene Henry B. Eyring, o le Fesoasoani Muamua i le Au Peresitene Sili: “E finagalo lo Tatou Tama Faalelagi ia lalagaina faatasi o tatou loto. O lena faatasiga i le alofa e le na o se talitonuga. O se mea e manaomia.”1
E Faapefea ona Tuufaatasia i Tatou?
I a latou galuega sili e faia i maa, e lei faaaogaina e tagata Inca ni faapipii sima. Na latou faafetauiina faatasi ma le faaeteete ia maa ina ia leai se avanoa e ofi atu ai se fasi pepa i le va. O lenei faatulagaga e matua tulaga ese, na mafai ona sa mafai e nei matai tufuga ona vaai i se nofoaga mo maa taitasi ma le auala e tatau ona faafoliga ai ina ia ofi i le fuafuaga atoa.
A tatou tuuina atu i le Matai Tufuga e faafoligaina i tatou, o le a mafai ona tatou tasi o le tasi i le isi faapea foi ma Ia.2 Ua saunoa mai Peresitene Eyring e tupu lenei lotogatasi pe a tatou usiusitai i sauniga ma feagaiga o le talalelei.3
O le mauaina o sauniga o le talalelei ma le tausia o feagaiga na i ai se uunaiga maoae i le aiga o Diana. Na muamua auai Diana ma lona tuagane laitiiti, o Emanuelu, i le Ekalesia. Fai mai Diana, a o lei oo i lena taimi, sa fefinauai soo lona aiga. Na ia iloa na mananao ona matua i le mea sili mo ia ma ona tuagane, ae sa tautalatasi foi i la’ua.
“Na sili atu lo matou lagonaina o le fefefe nai lo le alolofa mo lo’u tama,” o lana tala lea.
I ni nai masina talu ona papatiso o ia, na auai loa lona tama ma lona tuagane matua, o Risati i le Ekalesia, mulimuli atu ai ma lona tina i le silia ma le tausaga mulimuli ane.
“Na suia lo’u tama,” o le tala lea a Diana i le liliu mai o lona tama. “Pe a matou faia ni mea sese, e na te talanoa mai ia i matou e uiga i lena mea. Na faaitiitia a matou finauga. Ua sili atu le lotogatasi i totonu o lo matou aiga.”
O le osi feagaiga e mulimuli ia Iesu Keriso ua latou faalatalata atili atu ai ia te Ia ma le tasi i le isi. Sa tasi lo latou faamoemoe: ia avea ma se aiga e faavavau. E tasi le tausaga talu ona papatiso le tina o Diana, ae faamauina le aiga i le malumalu.
“O se aafiaga matagofie,” o le tala lea a Diana. “E le mafai ona faamatalaina ou lagona ina ua matou savavali atu i le potu o faamauga ma vaaia ou matua iina. Sa ou le fia alu ese.”
Mulimuli ane, na lagonaina e le aiga se faanaunauga maoae e tausia poloaiga ina ia mafai ona faavavau lo latou aiga. E itiiti ifo ma le vaiaso a o lei maliu le tama o Diana, na ia aoaoina ai se lesona o le afiafi faaleaiga i le lotogatasi i le tausia o a latou feagaiga ina ia mafai ona latou faatasi e faavavau. “E leai se tasi e mautinoa e aulia taeao,” o lana tala lea. “E manaomia ia tatou saunia aua pe a maliu se tasi o i tatou, o le a mafai lava ona tatou faatasi.”
O Le Tausia o Feagaiga e Suia ai Loto
Na aoaoina e Diana o le galulue faatasi i le tausia o feagaiga o le talalelei e mafai ai ona aumai faatasi se aiga, ma e faafetai o ia aua na ia aoaoina lena mea a o lei tuai.
O le tala mulimuli lava na fai atu e le tama o Diana ia te ia a o alu ese atu mo le aoga i le aso na maliu ai lona tama o le, “Te quiero mucho, Dianita.” (Ou te alofa tele ia te oe, Diana le itiiti.)
E talitonu Diana i le folafolaga a le Alii o le a toe faatasia lona aiga pe afai latou te tausia pea a latou feagaiga.
“Ua ou vaai i le auala o loo aumai faatasi ai i matou e le Tama Faalelagi ona o le mulimuli atu i le Faaola,” o lana tala lea. “E tatau ona ou talitonu o le a Ia tausia foi Lana folafolaga o le a mafai ona matou faatasi e faavavau pe a matou tausia poloaiga.”
“Ou te iloa o o tatou aiga e mafai moni lava ona faavavau ma e faafetai ai i le fuafuaga paia.
“Ou te iloa e mafai ona tatou iloa le mamalu faavavau ua folafola mai e lo tatou Tama Faalelagi. Ua na o le tumau e oo i le iuga, tuuina o o tatou loto i mea a le Atua, ma fesoasoani atu o le tasi i le isi o le a mafai ai ona ausia o tatou faamoemoega ina ia avea ma se aiga faavavau.”