Pweng sin Mwet Forfor Luti, Septempuh 2010

Kunohkohn Lasr in Tuhfahlah Fihl Fahsruh uh

Lutlut ke sramsram se inge ac, fin wo, muhtwacta ke ma inge yurin tahmtahel lom kom ohsun nuh se an. Orekmakihn kihsensiyuck an in kahsrwe kom ahkfokokoye tahmtahel lom ac in oruh Rilif Sosaiti in ip yohk srihpac ke moul lom an.

Luhlahlfongi • Sucu • Rilif

Ke Ma Suhmuhslah an

Soa Kas 22:6; Met Efesus 6:4; Enos 1:1; Alma 53:20–21; 56:47; 57:27

Fin wacngihn karihngihnyuck, fihl lasr fahsruh sensen in oruh oacna ma ahkuhtweyucki ke Mosiah 26. Mwet fuhsr puhkantwen tiacna luhlahlfongi ke facsin luhn pahpah tuhmwaclos ac oruh elos in fahsr liki luhlahlfongi luhn pahpah tuhmwaclos nuh ke pacl loes. Fihl lasr fahsruh uh elos kuh pac in tuhlac fin elos nihkihn ip kunaclos ke plwacn luhn Pahpah Lucng.

Meac enenweyuck in karihngihn fihl fahsruh an in wo ohiyac uh? Ke Alu uh, kuht luti ke ip yohk luhn moliyucklac, ac ip yohk ingacn pa ip yohk luhn sucu an, ip yohk ma ac fah kahsruh fihl fahsruh an in oraclah sucu se, luti sucu se ingacn, ac ahkolah sucu se ingacn in eis akwuck ac wuhlweacng—ac fah sulpac luti ma inge nuh sin kais sie fihl fahsruh an.

In oacna pahpah ninac, mwet kol, ac mempucr luhn Alu an uh, kuht ahkolah fihl se inge ke mwe insewowo lal Abraham, ke tempuhl uh. Oasr kunohkohn lasr in luti suwohs ip yohk luhn mwe luti ma sukokyak ke Sucu: Sie Mwe Fahkwack nuh fin facluh. In ninac ac pahpah pa orekma ac kunohkohn ma pahtpaht se. Kais sie sesr us kunohkohn ke kwewana orekma luhn mukul kuh muhtwacn ke plwacn an.

Kuht luti mwe luti se inge ke acn nuh kwewa. Kuht enenuh in ahkfuhlwactye sramsram ke macruht ac sucu. Ac ke srihkasrak lasr, fihl fahsruh uh kuh in eis finsrak yohk ac kahlwem—tiac ke kahs kuht sramsram muhkwena tuhsruhktuh ke ohiyacn kuht puhla ac ahkkahlwemye ip yohk luhn sucu.

Julie B. Beck, prestuhn luhlahp ke U luhn Rilif Sosaiti.

Ke Ma Mahtuh Lasr

Ke sramsram nuh sin tahmtahel ke toeni luhlahp luhn Rilif Sosaiti ke Septempuh 23, 1995, Prestuhn Gordon B. Hinckley el fahk: “Facluh se suc kuht oasr kac pa facluh luhn okahrkahr, ke ohiyacn mwet eklac. Puhsra luhlahp pahngohn kuht in oruh ma puhkantwen in lain ohiyac wo ma orek met ah.”¹ Na Prestuhn Hinckley el ahkkahlwemye nuh sin tahmtahel ke, Alu uh, ac mwet nuh kwewa acn nuh kwewa “Sucu: Sie Mwe Fahkwack nuh fin Facluh.”

Ke yac somlah pwepuh se inge lwenglah nuh ke kahs puhkantwen ac ituckyang nuh sin mwet kol fin facluh uh. Pwepuh se inge siyuck mwet and mwet kol luhn kafucrmacn “in kwacfe in orekmakihn ma inge in sang karihngihn ac ahkkweye sucu in pa u se ma yohk e met ke acn se uh.”²

Mwe Fahkwack sacn pa pwelucng se ke luhlahlfongi luhn sucu ke Mwet Luhlahlfongi ke Lwen-sahflah, sie pohloh kahs ma kuht kuh in sruokyac na ac etuh lah ke kuht moulkihn, kuht ac fah ahkfokokoye sucu lasr ac lohm sesr an.

© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn Visiting Teaching Message, September 2010 Kosraean. 09369 868

Mwe kahsruh

1. Gordon B. Hinckley, “Stand Strong against the Wiles of the World,” Ensign, Nohfohmpuh 1995, 99.

2. Liye “Sucu: Sie Mwe Fahkwack nuh fin Facluh,” Liahona, Ohktohpa 2004, 49.

Meac Nga Kuh In Oruh?

1. Nga kuh orekmakihn “Sucu: Sie Mwe Fahkwack nuh fin Facluh” fuhkah in kahsruh tahmtahel luhk in tuhfahlah fihl fahsruh uh? Sahp kom kuh in akacsruhi sie kapi ke mwe fahkwack sacn ac kahsruh tahmtahel lom in konwacack ac mahkiyac pohloh kahs ma ac fah kahsruh yohk ki ke mwe luti an uh.

2. Nga kuh in tuhfahlah fihl fahsruh uh fuhkah? Sahp kom kuh in kahsruh mempucr luhn ward, pracns, sucu, kuh mura suc kuh in wolac ke pacl ac luhngse lom an uh.

Ke mwet luti sahyac, som nuh ke www.reliefsociety.lds.org.