Laa b’e toj sa’ li santil ochoch

Ma nakanaw b’ar wan li santil ochoch li mas nach’ aawik’in? Yiib’ xjalam-uuch li santil ochoch a’an, ut k’e sa’ jun na’ajej taawil wulaj wulaj.

Li santil ochoch a’an rochoch li Qaawa’. Aran nokotzolok chirix li qaChoxahil Yuwa’, noko’ok sa’ sumwank rik’in a’an, ut naqak’ul ninqi osob’tesink. Sa’ li santil ochoch naqab’aanu li xnimal ru k’anjel choq’ qe ut choq’ reheb’ li qakomon li ak kamenaqeb’. Li k’anjel li nab’aanuman sa’ li santil ochoch, a’an li kub’iha’ choq’ reheb’ li kamenaq, li loq’laj tiqib’aak, ut li tz’ape’k sa’ junajil. K’ojob’anb’il k’anjel nayeeman reheb’.

Li k’a’ru nak’ulman sa’ li santil ochoch

Li kub’iha’ choq’ reheb’ li kamenaq

Naq waqxaqib’ chihab’ aayu’am, naru taakub’eeq aaha’ ut tatk’ojob’aaq choq’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Wankeb’ naab’al aaxe’ aatoon li xe’kam naq maji’ neke’kub’e xha’ ut neke’k’ojob’aak. Us ta kamenaqeb’ lix tib’el, toj yo’yookeb’ lix musiq’eb’ sa’ li ruchich’och’ reheb’ li musiq’ej, ut aran naru neke’xtzol lix evangelio li Jesukristo.

Naq kab’laju chihab’ aayu’am, naru tat-ok sa’ li santil ochoch re xtenq’ankileb’ naq nakub’e aaha’ ut nakatk’ojob’aak sa’ xk’ab’a’eb’ a’an. Eb’ a’an naru te’xsik’ ru ma te’xk’ulub’a li kub’iha’ ut li k’ojob’aak. Taawanq saqi t’ikr chawix naq nakub’e aaha’ choq’ reheb’ li kamenaq, jo’ naq xkub’e aaha’ laa’at.

Patz’ re laa na’ aayuwa’ naq tate’xtenq’a chixtz’iib’ankil xk’ab’a’eb’ laa komon li xe’kam naq maji’ xe’kub’e xha’ sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. K’e reetal ma wan ani li ak xkub’e xha’ choq’ reheb’ sa’ li santil ochoch.

Li loq’laj tiqib’aak

Jun reheb’ li nimla osob’tesink sa’ li santil ochoch, a’an li loq’laj tiqib’aak. Li loq’laj tiqib’aak a’an jun maatan. Naq nakak’ul li loq’laj tiqib’aak, nakak’ul aana’leb’ chirix li k’uub’anb’il na’leb’ re li kolb’a-ib’ ut nakat-ok sa’ sumwank. Jun li sumwank, a’an li yeechi’ink naqab’aanu rik’in li qaChoxahil Yuwa’. Naq nakapaab’ laa sumwank, nakakawresi aawib’ chi wank rik’in li qaChoxahil Yuwa’ ut li Jesukristo sa’ junaq kutan.

Sa’ li santil ochoch wan jun na’ajej li jwal ch’ina-us ut tuqtu, li choxahil na’ajej xk’ab’a’. Sa’ li choxahil na’ajej re li santil ochoch nach’ wanko rik’in li qaChoxahil Yuwa’ ut li Jesukristo, ut naqeek’a chan ru li wank rik’ineb’ sa’ li choxahil awa’b’ejihom.

Li tz’ape’k sa’ junajil chi junelik q’e kutan

Naq jun winq ut ixq neke’sumla sa’ li santil ochoch, neke’xwiq’ib’ rib’ chiru jun artal ut neke’tz’ape’ sa’ junajil chi junelik q’e kutan. A’an naraj naxye naq eb’ a’an ut eb’ lix kok’al naru te’wanq jo’ junkab’al chi junelik. Kawresi aawib’ re tatsumlaaq sa’ li santil ochoch sa’ junaq kutan. A’in li osob’tesink q’axal nim re li santil ochoch.

Li recomendacion re ok sa’ li santil ochoch

Santil na’ajej li santil ochoch. Eb’ li obiisp ut awa’b’ej re uq’ej neke’xk’e reetal naq k’ulub’ejeb’ li te’ok sa’ li santil ochoch. Naq maji’ nakatxik sa’ li santil ochoch, tento tat-aatinaq rik’in laa obiisp malaj li awa’b’ej re uq’ej. A’an tixpatz’ aawe ma nakapaab’ naq yaal li Iglees, nakapaab’eb’ li taqlahom, nakaxaqab’ xwankileb’ laj jolominel re li Iglees, nakapaab’ li Aatin re Chaab’il Na’leb’, nakatoj laa lajteq’il, ut ma nakatwan chi maak’a’ aab’alaq’ sa’ chixjunil li nakab’aanu ut nakaye. A’an tatxtenq’a chixnawb’al k’a’ru tento taab’aanu re truuq tat-ok sa’ li santil ochoch.

Kawresi aawib’ anajwan re ok sa’ li santil ochoch

Li qaChoxahil Yuwa’ narosob’tesiheb’ li neke’wan sa’ tiikilal ut li neke’xik sa’ li santil ochoch. Aajel ru naq taakawresi aawib’ naq toj saajat re xik sa’ li santil ochoch.

Li qaChoxahil Yuwa’ nakatxra ut naraj naq tat-osob’tesiiq sa’ li santil ochoch. A’an tatrosob’tesi naq taab’aanu li k’ojob’anb’il k’anjel re li santil ochoch choq’ aawe ut choq’ reheb’ laa komon. Us ta maji’ naru tat-ok sa’ li santil ochoch, wi wan jun li santil ochoch nach’ aawik’in, naru tatxik chirilb’al ut chireek’ankil li musiq’ej li wan aran. Naru ajwi’ taak’uula xjalam-uuch li santil ochoch sa’ laa wochoch re taajultiko’q aawe naq nim xloq’al. Chatwanq chi tiik re naq k’ulub’ejaqat chi ok sa’ li rochoch li Qaawa’.

Il li lem sa’ li jalam-uuch a’in. Sa’ junjunq reheb’ li na’ajej re tz’ape’k sa’ junajil wankeb’ li lem. B’antiox re li tz’ape’k sa’ junajil sa’ li santil ochoch, li qajunkab’al naru taakanaaq chi junelik, jo’ chanru li qilob’aal sa’ li lem.

Il li choxahil na’ajej re li santil ochoch sa’ li jalam-uuch a’in ut sa’ li jalam-uuch li wan sa’ li perel 64. K’a’ru nakaweek’a naq nakawil li na’ajej a’an?

Li santil ochoch re Boston Massachusetts. Osob’tesinb’il sa’ li xb’een xb’e li po octubre, 2000.

Li na’ajej re tz’ape’k sa’ junajil, santil ochoch re Aba Nigeria.

Li choxhail na’ajej, santil ochoch re Nuku’alofa Tonga.