“Your Path to the Temple,” Liahona, Oct 2010, 72–75
ສຳລັບເດັກນ້ອຍ
ເສັ້ນທາງຂອງເຈົ້າສູ່ພຣະວິຫານ
ເຈົ້າຮູ້ຈັກພຣະວິຫານໃດບໍທີ່ໃກ້ກັບເຈົ້າທີ່ສຸດ? ໃຫ້ແຕ້ມຮູບພຣະວິຫານນັ້ນ, ແລະ ແຂວນມັນໄວ້ບ່ອນທີ່ເຈົ້າສາມາດຫລຽວເຫັນໄດ້ທຸກມື້.
ພຣະວິຫານແມ່ນບ້ານຂອງພຣະຜູ້ເປັນເຈົ້າ. ມັນແມ່ນບ່ອນທີ່ເຮົາຮຽນຮູ້ກ່ຽວກັບພຣະບິດາເທິງສະຫວັນ, ເຮັດພັນທະສັນຍາ (ຫລື ສັນຍາ) ກັບພຣະອົງ, ແລະ ຮັບເອົາພອນທີ່ຍິ່ງໃຫຍ່ຕ່າງໆ. ຢູ່ໃນພຣະວິຫານ, ເຮົາເຮັດວຽກງານທີ່ສຳຄັນເພື່ອຕົວເຮົາເອງ ແລະ ເພື່ອສະມາຊິກໃນຄອບຄົວຂອງເຮົາ ຜູ້ທີ່ໄດ້ເສຍຊີວິດໄປແລ້ວ. ວຽກງານທີ່ເຮັດໄດ້ໃນພຣະວິຫານແມ່ນລວມທັງການບັບຕິສະມາແທນຄົນຕາຍ, ການຮັບຂອງປະທານສັກສິດ, ແລະ ການຜະນຶກ. ສິ່ງເຫລົ່ານີ້ເອີ້ນວ່າພິທີການຕ່າງໆຂອງພຣະວິຫານ.
ມີຫຍັງແດ່ທີ່ເກີດຂຶ້ນຢູ່ໃນພຣະວິຫານ
ການບັບຕິສະມາແທນຄົນຕາຍ
ເມຶ່ອເຈົ້າອາຍຸຮອດແປດປີ, ເຈົ້າສາມາດໄດ້ຮັບບັບຕິສະມາ ແລະ ຮັບການຢືນຢັນເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ມີບັນພະບຸລຸດຂອງເຈົ້າຫລາຍຄົນທີ່ໄດ້ເສຍຊີວິດໄປແລ້ວໂດຍທີ່ຍັງບໍ່ທັນໄດ້ຮັບບັບຕິສະມາ ແລະ ຮັບການຢືນຢັນເທື່ອ. ເຖິງແມ່ນວ່າຮ່າງກາຍຂອງເຂົາເຈົ້າໄດ້ຕາຍໄປແລ້ວ, ແຕ່ວິນຍານຂອງເຂົາເຈົ້າຍັງມີຊີວິດຢູ່ໃນໂລກວິນຍານ, ບ່ອນທີ່ເຂົາເຈົ້າສາມາດຮັບການສິດສອນເຖິງພຣະກິດຕິຄຸນຂອງພຣະເຢຊູຄຣິດ.
ເມື່ອເຈົ້າອາຍຸຮອດ 12 ປີ, ເຈົ້າສາມາດໄປພຣະວິຫານ ແລະ ຊ່ວຍຜູ້ຄົນເຫລົ່ານີ້ ໂດຍການຮັບບັບຕິສະມາ ແລະ ຮັບການຢືນຢັນໃນນາມຂອງເຂົາເຈົ້າ. ຈາກນັ້ນເຂົາເຈົ້າສາມາດເລືອກໄດ້ວ່າຈະຍອມຮັບເອົາການບັບຕິສະມາ ແລະ ການຢືນຢັນນັ້ນຫລືບໍ່. ເຈົ້າຈະໃສ່ຊຸດສີຂາວເມື່ອເວລາເຈົ້າຮັບບັບຕິສະມາແທນຄົນຕາຍ, ເຊັ່ນດຽວກັນກັບເມື່ອເວລາເຈົ້າຮັບບັບຕິສະມາເພື່ອຕົວເອງ.
ໃຫ້ຂໍຄວາມຊ່ວຍເຫລືອຈາກພໍ່ແມ່ຂອງເຈົ້າໃນການເຮັດລາຍຊື່ສະມາຊິກໃນຄອບຄົວຜູ້ທີ່ໄດ້ເສຍຊີວິດກ່ອນໄດ້ຮັບບັບຕິສະມາເຂົ້າໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ໃຫ້ຄົ້ນຫາວ່າມີໃຜໄດ້ໄປພຣະວິຫານເພື່ອຮັບບັບຕິສະມາແທນເຂົາເຈົ້າແລ້ວບໍ.
ຂອງປະທານສັກສິດ
ພອນທີ່ຍິ່ງໃຫຍ່ຢ່າງໜຶ່ງຂອງພຣະວິຫານແມ່ນຂອງປະທານສັກສິດ. ຂອງປະທານສັກສິດ ໝາຍເຖິງ “ຂອງຂວັນ.” ເມື່ອເຈົ້າຮັບຂອງປະທານສັກສິດຂອງເຈົ້າເອງ, ເຈົ້າຈະຮຽນຮູ້ເພີ່ມເຕີມກ່ຽວກັບແຜນແຫ່ງຄວາມລອດ ແລະ ເຮັດພັນທະສັນຍາ. ພັນທະສັນຍາແມ່ນຄຳສັນຍາ ທີ່ເຮົາໄດ້ເຮັດກັບພຣະບິດາເທິງສະຫວັນ. ເມື່ອເຈົ້າຮັກສາພັນທະສັນຍາເຫລົ່ານັ້ນ, ເຈົ້າໄດ້ກຽມພ້ອມທີ່ຈະອາໄສຢູ່ກັບພຣະບິດາເທິງສະຫວັນ ແລະ ພຣະເຢຊູຄຣິດໃນມື້ໜຶ່ງ.
ຢູ່ໃນພຣະວິຫານມີຫ້ອງໜຶ່ງທີ່ສວຍງາມ ແລະ ສະຫງົບງຽບ ເອີ້ນວ່າຫ້ອງອານາຈັກຊັ້ນສູງ. ໃນຫ້ອງອານາຈັກຊັ້ນສູງ ເຮົາຮູ້ສຶກເຖິງການເຂົ້າໃກ້ກັບພຣະບິດາເທິງສະຫວັນ ແລະ ພຣະເຢຊູຄຣິດ, ແລະ ເຮົາຮູ້ສຶກໄດ້ເລັກນ້ອຍເຖິງການທີ່ໄດ້ຢູ່ກັບພວກພຣະອົງໃນອານາຈັກຊັ້ນສູງ.
ການຜະນຶກຊົ່ວການເວລາ ແລະ ຊົ່ວນິລັນດອນ
ເມື່ອຊາຍ ແລະ ຍິງແຕ່ງງານໃນພຣະວິຫານ, ເຂົາເຈົ້າໄດ້ຄຸເຂົ່າລົງທີ່ແທ່ນບູຊາ ແລະ ໄດ້ຜະນຶກເຂົ້າກັນຊົ່ວການເວລາ ແລະ ຊົ່ວນິລັນດອນ. ນີ້ໝາຍຄວາມວ່າ ເຂົາເຈົ້າ ແລະ ລູກໆຂອງເຂົາເຈົ້າສາມາດຢູ່ນຳກັນເປັນຄອບຄົວນິລັນດອນ. ໃຫ້ວາງແຜນທີ່ຈະແຕ່ງງານໃນພຣະວິຫານໃນມື້ໜຶ່ງ. ນີ້ເປັນພອນຂອງພຣະວິຫານທີ່ຍິ່ງໃຫຍ່ທີ່ສຸດ.
ໃບຮັບຮອງເຂົ້າພຣະວິຫານ
ພຣະວິຫານເປັນສະຖານທີ່ສັກສິດ. ອະທິການ ແລະ ປະທານສາຂາຕ້ອງແນ່ໃຈວ່າໃຜກໍຕາມທີ່ຈະເຂົ້າໄປພຣະວິຫານໄດ້ຖືກກຽມພ້ອມ ແລະ ມີຄ່າຄວນ. ກ່ອນໄປພຣະວິຫານ, ເຈົ້າຈະໄດ້ຮັບການສຳພາດພິເສດຈາກອະທິການ ຫລື ປະທານສາຂາຂອງເຈົ້າ. ເພິ່ນຈະຖາມເຈົ້າວ່າ ເຈົ້າມີປະຈັກພະຍານກ່ຽວກັບສາດສະໜາຈັກບໍ, ຮັກສາພຣະບັນຍັດບໍ, ສະໜັບສະໜູນຜູ້ນຳບໍ, ເຊື່ອຟັງກົດພຣະວາຈາແຫ່ງປັນຍາບໍ, ຈ່າຍສ່ວນສິບບໍ, ແລະ ຊື່ສັດໃນທຸກສິ່ງທີ່ເຈົ້າເຮັດ ແລະ ເວົ້າບໍ. ເພິ່ນຈະຊ່ວຍເຈົ້າໃຫ້ຮູ້ຈັກສິ່ງທີ່ຈະເຮັດໃນການມີຄ່າຄວນທີ່ຈະເຂົ້າໄປໃນພຣະວິຫານ.
ກຽມພ້ອມດຽວນີ້ເພື່ອເຂົ້າໄປໃນພຣະວິຫານ
ພຣະບິດາເທິງສະຫວັນໃຫ້ພອນຫລາຍຢ່າງກັບຜູ້ທີ່ດຳລົງຊີວິດຢ່າງຊອບທຳ ແລະ ໄປພຣະວິຫານ. ມັນສຳຄັນໃນການກຽມພ້ອມເພື່ອເຂົ້າໄປໃນພຣະວິຫານໃນຂະນະທີ່ເຈົ້າຍັງມີອາຍຸນ້ອຍຢູ່.
ພຣະບິດາເທິງສະຫວັນຮັກເຈົ້າ ແລະ ຢາກໃຫ້ເຈົ້າໄດ້ຮັບພອນຂອງພຣະວິຫານ. ພຣະອົງຈະປະທານພອນໃຫ້ເຈົ້າສຳລັບການເຮັດພິທີການຕ່າງໆຂອງພຣະວິຫານເພື່ອຕົວເອງ ແລະ ເພື່ອຄົນອື່ນ. ເຖິງແມ່ນວ່າເຈົ້າອາດຈະຍັງບໍ່ສາມາດເຂົ້າໄປໃນພຣະວິຫານດຽວນີ້, ຖ້າມີພຣະວິຫານຢູ່ໃກ້, ເຈົ້າສາມາດໄປຢ້ຽມຢາມເດີ່ນພຣະວິຫານ ແລະ ຮູ້ສຶກເຖິງພຣະວິນຍານຢູ່ທີ່ນັ້ນໄດ້. ເຈົ້າສາມາດມີຮູບພຣະວິຫານຢູ່ໃນບ້ານເຮືອນຂອງເຈົ້າ ເພື່ອເຕືອນຕົວເອງເຖິງຄວາມສຳຄັນຂອງພຣະວິຫານ. ໃຫ້ດຳລົງຊີວິດຢ່າງຊອບທຳ ເພື່ອເຈົ້າຈະມີຄ່າຄວນພໍທີ່ຈະເຂົ້າໄປໃນບ້ານຂອງພຣະຜູ້ເປັນເຈົ້າ.
ຈົ່ງເບິ່ງແວ່ນໃນຮູບພາບນີ້. ໃນຫ້ອງຜະນຶກບາງຫ້ອງມີແວ່ນແບບນີ້. ຍ້ອນການຜະນຶກໃນພຣະວິຫານ, ຄອບຄົວຂອງເຮົາ, ເປັນເຊັ່ນດຽວກັນກັບເງົາສະທ້ອນໃນແວ່ນນີ້, ສາມາດດຳເນີນຕໍ່ໄປຕະຫລອດການ.
ຈົ່ງເບິ່ງຫ້ອງອານາຈັກຊັ້ນສູງໃນຮູບພາບນີ້ ແລະ ໃນຮູບພາບ ໃນໜ້າທີ 64. ເຈົ້າຮູ້ສຶກແນວໃດຕອນເຈົ້າເຫັນພາບຫ້ອງອານາຈັກຊັ້ນສູງ?
ພຣະວິຫານບອສ໌ຕັນ ມາສາຊູເສດສ໌. ອຸທິດ ວັນທີ 1 ເດືອນຕຸລາ, 2000
ຫ້ອງຜະນຶກ, ພຣະວິຫານອາບາ ນີເຊຣີ.
ຫ້ອງອານາຈັກຊັ້ນສູງ, ພຣະວິຫານນູກູອາໂລຟາ ຕົງກາ.