iVaqa ni Veisiko, Tiseba 2010
Noda iLesilesi meda Vakaitavi ena Valetabu kei na Cakacaka ni Tuva Kawa
Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.
Vakabauta • Matavuvale • Veivukei
E vuqa na tamata era sa mate ena vica na senijiuri sa sivi yani ka ra sega tu ni kila na kosipeli. Eso vei ira na tamata oqori era wekamu voleka ka vakayawa. Era waraki iko tiko mo cakava na vakasaqaqara e gadrevi mera semati vata kei na nomu matavuvale ka vakayacora na cakacaka vakalotu ni veivakabulai me baleti ira.
E levu sara na valetabu e vuravura era sega soti ni osooso vakalevu. A yalataka na Turaga ni na vagolea na lomadra na gone vei ira na nodra qase me kakua ni vakarusai ko vuravura ni sa lako mai ko Koya (raica na V &V 2:2–3).
Era tu na veivakalougatataki vakayadudua mo ciqoma, me isau ni nomu vakaitavi ena valetabu kei na cakacaka ni tuva kawa. E dua vei ira oqo sa ikoya na reki o vakila ena nomu qaravi ira nomu kawa. E dua tale sa ikoya ni rawa mo rawata e dua na ivolatara ni valetabu, ka vakaraitaka nomu kilikili e mata ni Turaga. O ira era sega tiko ni kilikili, nikua me ra rawata e dua na ivolatara e dodonu me ra cakacaka vata kei na bisopi se peresitedi ni tabana me ra rawata kina ena gauna totolo duadua. Yalovinaka me kakua ni yali vei iko na ivakatagedegede yaga oqo. Au vakadinadinataka ni Veisorovaki e dina ka rawa me vosoti na ivalavala ca ena ivakarau dina ni veivutuni.
Ena noda vakaitavi ena valetabu kei na cakacaka ni tuva kawa, eda vakadinadinataka ni tiko vei keda na Yalona me vakacegui keda ena noda bolebole ka na dusimaki keda ena noda vakatulewa bibi. Na cakacaka ni valetabu kei na tuva kawa sa ikoya e tiki ni noda cakacaka ena kena vakarautaki na vakacegu, se veiqaravi, kivei ira na noda dui kawa.
Mai na Keda iTukutuku
“A kaya na Parofita o Josefa Simici, ‘Na itavi cecere duadua ena vuravura oqo ka sa vakataqara vei keda na Kalou sa ikoya meda dau vakasaqarai ira na noda mate’ (History of the Church, 6:313). Mai na ivakatekivu, era tokona na cakacaka cecere oqo o ira na marama ena iSoqosoqo ni Veivukei. E Nauvoo ena 1842, na gagadre nei Sarah M. Kimball me vukei ira na cakacaka ena kena tara na valetabu e vakauqeti ira e dua na ilawalawa marama me ra tuvalaki ira me rawa ni ra veiqaravi me yaga vakalevu cake sara. Ena nodra sa tekivu soqoni, a tuvalaka na imatai ni iSoqosoqo ni Veivukei me vakamuria ga na cakacaka ni matabete … na Parofita. Mai na gauna o ya ka toso tikoga yani, era tomana tiko na nodra veivuke ni cakacaka ena Valetabu e Nauvoo, o ira na marama ena iSoqosoqo ni Veivukei. …
“Ena 1855, ni oti e walu na yabaki nodra a yaco mai ena imatai ni gauna e Utah o ira na Yalododonu, a sa tauyavutaki na Vale ni Edaumeni. O Eliza R. Snow, ka dua vei ira na lewe taumada ni iSoqosoqo ni Veivukei ka maroroya tu na ivolatukutuku ni isoqosoqo, e a kacivi mai vei Peresitedi Brigham Young ena 1866 me peresitedi raraba ni iSoqosoqo ni Veivukei. O koya vata kei na so tale na marama era daucakacaka yalodina ena Vale ni Edaumeni. Oti o ya, me vaka ni sa vakacavari na tara ni Valetabu e St. George, Logan, kei Manti, o ira na marama oqo era lako ki na valetabu yadua me rawa ni ra lai vakayacora kina na cakacaka me baleti ira na sa mate.”1
© 2010 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni Visiting Teaching Message, December 2010. Fijian. 09372 858