Iren Mahsen en Padahk en Pas, Senweri 2011
Poadoaopoad oh Sohso en Pwihn en Sawas en Lih
Onopiki iren mahsen wet, oh ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.
Pwoson • Peneinei • Sawas
Eliza R. Snow tamanda me Soukohp Joseph Smith padapadahngki me “mendahte me ahd en pwihn wet [Pwihn en Sawas en Lih] eh wia mehkot kapw ehu, pwihn wet tepida kawao.”1
Sahm Nanleng oh Sapwellime Iehros, Sises Krais, ketin pwarek Joseph Smith oh, sang ih, kapwurehdo rongamwahuo ni unsek pohn sampah. Pwihn en Sawas en Lih wia kisehn kopwurupwurdohu. Koasoansoandi en Mwomwohdisohu sohte unsek lao lih akan pil koasoansoandi.2
Nan sounpwong kan me kohkohdo, ehuehu Iren Mahsen en Padahk en Pas pahn kihieng kitail ansou mwahu en ahpwete esehla duwen poadoapoad en Pwihn en Sawas en Lih oh ah pali nan kopwurupwurdohn rongamwahuo. Pwehki kahrepe tohto, wehwehki atail poadoapoad kaidehnte kesempwal ahpw anahn.
Keieu, wehwehki atail poadoapoad pahn kamarainih kitail en wia lih akan en Koht me kitail anahne wia. Sang ni idawehn karasaras kan en lih mwahu kan en Souleng en Imwin Rahn Akan, kitail kak esehla sang mour en mahs duwen sohpai mour en ehu rahn.3
Keriau, atail poadoapoad kin padahkihieng kitail me tepin padahk ohte me mie nan Mwomwohdiso en kawao iei poahsoan en tepin padahk kan rahn wet. Ese met oh atail pwukoa kan—en kalaudehla pwoson oh mour pwung en emenemen, kakehlailih peneinei kan oh ihmw akan, oh sewese irail akan me anahn—kin kadokehpene atail poadoapoad en mahs oh mwehi et.
Kesiluh, ni atail kesempwaliki atail poadoapoad, kitail pahn ahpwete kakala en ehukipene atail sohso me pid soahng kan en pali ngehn. President Henry B. Eyring, Sounsawas Keieu nan Presidensi Keieu, mahsanih: “Komw kin kadaurewei sohso wet ni omw pahn sewese mehteikan alehdi kisakis en limpoak mehlel. … Poadoapoad en Pwihn en Sawas en Lih kileldi ni lokaia oh nempe kan, ahpw sohso wet kin dadaur sang mohngiong kolahng mohngiong.”4
Ni keimwsek, wehwehki atail poadoapoad kin seweseikitail wia pali koahiek en mour en ehu rahn en Pwihn en Sawas en Lih. President Spencer W. Kimball (1895–1985) kawehwe, “Kitail ese me lih me kapingki mehlel mahs pahn nsenohki kawada mour pwung en ehu rahn.”5
Julie B. Beck, President lap en Pwihn en Sawas en Lih.
Sang Pwuhk Sarawi Kan
Sang Atail Poadoapoad
“Pwihn en Sawas en Lih iei sapwellimen Kauno pwihn ong lih akan.”6 Ni eh wia soukohp, Joseph Smith koasoanehdi Pwihn en Sawas en Lih ni Mahs 17, 1842. Pwihn tikitik wet, me audaudiki lih akan me weksang emenemen ni tepin mihtingo iei lih loaloapwoat kei, duwehte lih akan en Pwihn en Sawas en Lih rahnwet. “Me keieu pwulopwul iei peinakapw silimen, oh me keieu mah, iei lih emen me sounpar limeisek samwa. Meh ehk emen en lih akan pwopwoud, riemen iei liohdi, wenemen sohte pwopwoud, oh emen irail e sohte dehde ma e pwopwoud de soh. Arail sukuhl oh irair en mour inenen wekpeseng, duwehte arail irair en pali en mwohni. Arail wekpeseng kan pahn kalaudla pak tohto ni tohn pwihn wet eh tohtohla, ahpw irail wia ehu oh doulahte ni arail wia ehu.”7
© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen Visiting Teaching Message, January 2010. Pohnpeian. 09761 885