Pagbansay nga Nagpasabut og Maayo sa Kaimportante sa mga Council
Atol sa Nobyembre 2010 nga tibuok kalibutan nga miting sa pagbansay sa pagpangulo, diin gipaila ang bag-ong mga handbook sa Simbahan, ang mga lider sa Simbahan mihatag og gibug-aton sa kaimportante sa pagka-epektibo sa mga ward1 council sa pag-abag sa mga bishop nga daghan kaayo og trabaho ug sa pagpatuman sa buhat sa kaluwasan.
“Ang Handbook 2 nagtinguha sa pagpagaan sa buluhaton sa bishop pinaagi sa pagpalambo sa tahas sa ward council ug sa mga sakop niini,” miingon si Elder Dallin H. Oaks sa Korum sa Napulog Duha ka mga Apostoles. Kini nga tahas naglakip sa pagtabang sa bishop “kabahin sa mga butang nga importante sa tibuok ward” ug “sa pagtabang sa tahas sa pagluwas sa pagpaaktibo ug retensyon.”
Ang Kaimportante sa mga Council
Atol sa Nobyembre nga pagbansay, si Elder Quentin L. Cook sa Korum sa Napulog Duha ka mga Apostoles mipasabut nga “ang Simbahan gidumala pinaagi sa mga council sa kinatibuk-an diha sa mga level sa area, stake, ug ward” ug nga “ang bag-ong mga handbook mipalambo pag-ayo sa tahas sa mga council sa Simbahan.”
Si Elder Cook mihisgut og tulo ka sukaranang mga council diha sa ward level nga gikinahanglan sa bishop sa pagpahigayon og mga kalihokan sa Simbahan ug sa unsang paagi nga kining mga council maapektohan sa impormasyon niining bag-ong mga handbook. Kini naglakip sa bishopric, sa priesthood executive committee, ug sa ward council.
Ang bishopric molihok sa kasagaran sama sa naandan. Samtang ang PEC magpadayon sa regular nga miting ug magdumala sa ubang mga butang nga gidumala sa komite sa welfare sa ward kaniadto, si Elder Cook misugyot nga ang mga miting sa PEC tingali pamub-an tungod sa nagkadaghan nga miting sa ward council.
Ang bag-ong handbook “modugang sa buluhaton sa ward council diha sa pagpangalagad sa ward ubos sa mga yawe sa bishop,” miingon si Elder Cook.
Pagdugang sa Ward Council
Ang mga handbook makapadugang sa ward council pinaagi sa pagsugyot kon unsay madelegar sa bishop ug sa pagpalapad sa mga buluhaton sa mga sakop sa council aron sa pag-abag kaniya.
“Ang nag-unang paningkamot sa ward council mao ang buhat sa kaluwasan diha sa ward,” si Elder Cook miingon. “Daghang mga isyu karon moabut direkta ngadto sa bishop. Hinaut unta nga kini mausab samtang ang mga bishop modelegar og mas daghan pang mga butang kalabut sa mga miting sa ward council ug/o sa pribado nga paagi ngadto sa mga indibidwal, lakip sa mga butang sama sa welfare, retensyon, pagpaaktibo” ug uban pa.
Si Elder Cook mipasabut nga samtang ang bishop magpadayon sa pag-asikaso sa “mga problema nga nanginahanglan og usa ka maghuhukom sa Israel,” siya makahimo, uban sa pagtugot sa miyembro nga nagtinguha sa paghinulsol, sa pagdelegar ngadto sa uban “ang pagtambag og maayo nga mahimong gikinahanglan” sa pag-abag niadtong mga miyembro nga nagpaayo gikan sa pagkaadik o nagkinahanglan og tabang sa mga isyung pinansyal, mga butang kalabut sa pamilya, o uban pang mga problema.
“Ang mga sakop sa ward council mobuhat sa kasagaran sa ilang buluhaton nga dili iatol sa mga miting sa ward council,” miingon si Elder Cook. “Sila makigtambayayong sa ilang mga magtatambag ug sa mga home teacher, mga visiting teacher, ug sa uban pa sa pagkab-ut ug pagpangalagad niadtong … nanginahanglan og panabang.”
Siya miawhag sa mga lider sa priesthood ug auxiliary sa pag-ila ug pagsulbad sa mga kabalaka nga mahimong sulbaron diha sa korum o sa organisasyon sa pagpagaan sa palas-anon sa bishop ug sa ward council.
Matag Miyembro may Kalabutan
Atol sa sibya, ang kaimportante sa mga pag-apil sa matag sakop sa council ang gihatagan og gibug-aton sa panel nga naglangkob nila ni Elder M. Russell Ballard, Elder Jeffrey R. Holland, ug Elder David A. Bednar sa Korum sa Napulog Duha ka mga Apostoles; ni Elder Walter F. González sa Kapangulohan sa Seventy; ug ni Julie B. Beck, kinatibuk-ang presidente sa Relief Society.
“Sa akong hunahuna kita adunay sayop nga ideya nga ang matag elemento sa pagpadayag nga moabut sa ward kinahanglan magagikan sa Bishop,” miingon si Elder Bednar. “Pinaagi sa katungod sa iyang mga yawe, siya ang moila niini ug mopamatuod niini, apan dili ipasabut nga siya lang ang bugtong agianan nga kini moabut.”
Si Elder Bednar mihatag og gibug-aton sa kaimportante sa panaghiusa sa higayon nga ang tigdumalang may awtoridad mihimo sa desisyon aron ang council makalihok ubos sa impluwensya sa Espiritu Santo.
Si Elder Holland mipasidaan batok sa nabatasan nga pagbaliwala sa bili sa mga babaye diha sa mga council. “Kita usahay dili kaayo ingon ka madapiton o ingon ka madasigon … sa mga babaye nga naglingkod diha sa council nga angay unta natong buhaton,” miingon siya. “Atong gikinahanglan gayud ang tabang sa kababayen-an.”
Ang panel mipasabut og maayo nga ang maalamon nga mga lider maminaw.
“Ang gasa sa pag-ila mas epektibong makalihok kon kita maminaw kaysa kita ang mag-istorya,” miingon si Elder Bednar.
Si Elder Ballard midugang nga ang baruganan sa pagpaminaw magamit sa matag sakop sa council ug nga wala gayuy usa sa sakop nga modominar sa panag-sultihanay.
“Kon [ang] Espiritu mabati diha sa sistema sa council sa Simbahan, ang buhat magpadayon ug kita makaluwas og mas daghan sa mga anak sa atong Amahan,” miingon si Elder Ballard. “Kini usa ka mahinungdanon nga buhat nga pas-anon natong tanan.”
Gilitratohan ni Christina Smith