Mga Sambingay sa Nawala ug Nakit-an
Isip pangabaga sa Manluluwas nga mga magbalantay sa karnero, kita adunay responsibilidad nga “duolon ug luwason kadtong kinsa dili aktibo.”
Diha sa kapitulo 15 sa Ebanghelyo ni Lucas, ang Manluluwas naggamit og tulo ka sambingay aron sa pagtudlo sa bili sa usa ka kalag, nagpakita kanato kon unsaon sa pagpangita ug pagpabalik nianang nawala sa panon sa hugot nga pagtuo ug sa pamilya.
Diha sa mga sambingay, ang karnero nahisalaag, ang piraso nga pilak nawala, ug ang anak nga nawala nag-usik-usik sa iyang napanunod sa masamok nga pagpuyo. Apan ang magbalantay sa karnero nangita didto sa kamingawan, ang babaye naghinlo sa iyang balay, ug ang mapasayloon nga amahan naghulat sa pagbalik sa iyang anak, nga andam gayud uban sa gakos ug mainiton nga pag-abi-abi pabalik sa panimalay.
Ang mga sambingay sa Manluluwas—ug ang tulo ka mubo nga mga artikulo sa mga lider sa Simbahan nga nagsunod—nagpahinumdom kanato nga isip Iyang pangabaga nga mga magbalantay sa karnero, kita adunay responsibilidad nga “duolon ug luwason kadtong kinsa, dili aktibo, nga walay usa nga bililhong kalag ang mawala.”1