Ol Janis blong Mekem Gud
Wei blong Lod blong helpem olgeta we oli stap long nid long ol samting blong wol ia, i blong gat ol pipol ia, we, wetem lav, oli givim olgetawan mo wanem oli gat i go long God, mo i go long wok blong Hem.
Ol dia brata mo sista blong mi. Stamba blong mesej blong mi i blong givim ona mo selebretem wanem we Lod i bin mekem mo i stap mekem blong givim seves long olgeta we oli pua mo olgeta long nid long medel blong ol Pikinini blong Hem long wol. Hem i lavem ol pikinini blong Hem long nid mo evriwan we oli wantem blong help. Mo Hem i bin krietem ol wei blong blesem olgeta we oli nidim help mo olgeta we bae oli givim.
Papa blong yumi long Heven i harem ol prea blong ol pikinini blong Hem raon long wol we oli askem kaekae blong kakae, klos blong kavremap olgeta, mo gud filing mo tingting we i kam sapos oli save lukaotem olgetawan nomo. Ol prea ia oli bin kasem Hem stat long taem we Hem i putum man mo woman long wol.
Yu lanem abaot ol nid ia, long ples we yu stap long hem mo raon long wol. Hat blong yu i fulap long filing blong sore. Taem yu mitim wan we i traehad blong faenem wok, yu filim blong wantem help. Yu filim taem yu go long hom blong wan wido mo luk se hem i no gat kaekae. Yu filim taem yu luk ol foto blong ol pikinini we oli krae long ol brokbrok haos blong olgeta we etkwek o faea i spolem gud.
From se Lod i harem ol krae blong olgeta mo i filim bigfala sore blong yu long olgeta, Hem i bin, long stat, soem ol rod blong ol disaepol blong Hem blong oli help. Hem i bin invaetem ol pikinini blong Hem blong konsekretem o givim taem, samting, mo olgetawan blong joenem Hem blong givim seves long ol narawan.
Wei blong Hem blong help, wetem taem, oli singaotem fasin blong laef folem loa blong konsekresen. Long wan taem bifo, oli bin singaotem wei ia, yunaet oda. Long taem blong yumi, oli singaotem Jos welfea program.
Ol nem mo ol ditel blong wok ia oli jenis blong i fit wetem ol nid mo ol situesen blong ol pipol. Be, oltaem, wei blong Lod blong helpem olgeta we oli stap long nid long ol samting blong wol ia, i blong gat ol pipol ia, wetem lav, oli givim olgetawan mo wanem oli gat i go long God, mo i go long wok blong Hem.
Hem i bin invaetem mo i bin komandem yumi blong tekempat long wok ia blong leftemap olgeta we oli stap long nid. Yumi mekem wan kavenan blong mekem hemia long wota blong baptaes mo long ol tabu tempol blong God. Yumi riniu kavenan ia long Sandei taem yumi kakae sakramen.
Stamba tingting blong mi tedei, i blong tokbaot sam long ol janis ia we Hem i bin givim long yumi blong helpem ol narawan long nid. Mi no save tokbaot evriwan long smol taem blong yumi tugeta. Hop blong mi i blong riniu mo mekem strong bakegen, komitmen ia blong yufala blong tekem aksen.
I gat wan hym abaot invitesen blong Lod long wok ia we mi bin stap singsing taem mi smol boe. Taem mi smol, mi lukluk moa long hapi saon bitim paoa blong toktok ia. Mi prea se bae yufala i filim paoa blong ol toktok ia long hat blong yufala tedei. Bae yumi lisin long ol toktok ia bakegen:
Wanem nao mi mekem we i gud tedei?
Mi bin helpem wan man long nid?
Mi mekem man i laf mo mekem wan man i glad?
Sapos no, mi no win nating.
I gat trabol blong man, we i nomo hevi
From se mi wantem serem samting
Sikman mo olgeta we oli wari, oli kasem help o no?
Taem oli nidim mi, mi mi stap o no?
Nao yu girap mo mekem moa samting
Bitim blong drim long haos blong yu long heven.
Blong mekem gud i wan gud filing, wan glad i bitim mak,
Wan blesing blong diuti mo lav.1
Lod oltaem i sendem ol wekap kol i kam long evriwan long yumi. Samtaem, i wan strong filing blong sore blong helpem wan we i stap long nid. Wan papa i filim taem hem i luk wan pikinini i foldaon o skrasem ni. Wan mama i filim taem hem i harem krae blong pikinini we i fraet long naet. Wan boe o wan gel i filim sore long wan we i luk se hem i harem nogud o i fraet long skul.
Yumi evriwan i bin kasem ol filing blong sore long ol narawan we yumi no save olgeta. Eksampol, taem yufala i bin harem ol ripot blong ol wef krosem Pasifik from etkwek long Japan, yu bin filim wari long olgeta we oli kasem kil.
Ol filing blong sore oli kam long plante taosen long yufala we i bin lanem abaot bigfala wota long Kwinslan, Ostrelia. Nius ripot i tokbaot sam namba nomo blong olgeta we oli stap long nid. Be plante long yufala i bin filim soa blong ol pipol. Ol wekap kol ia, 1,500 o moa volontia memba blong Jos long Ostrelia oli ansa mo kam blong help mo leftemap tingting.
Oli tanem filing blong sore ia i kam wan desisen blong mekem folem kavenan blong olgeta. Mi bin luk blesing we i go long wan we i stap long nid, we i kasem help, mo long hem we i holem janis blong givim help ia.
Ol waes papa mo mama oli luk, long evri nid blong ol narawan, wan wei blong tekem blesing i go long laef blong ol boe mo gel blong olgeta. Tri pikinini, i no longtaem, oli bin holem ol kontena we i gat naes kaekae i kam long doa blong mifala. Papa mo mama blong olgeta i bin save se mifala i nidim help mo oli yusum pikinini long janis ia blong givim seves long mifala.
Papa mo mama ia i blesem famle blong mifala tru long bigfala seves blong olgeta. Tru long joes blong tufala blong letem ol pikinini oli tekempat long fasin blong givim samting, oli bin sendem blesing i go long ol apupikinini blong olgeta. Ol smael blong ol pikinini taem oli bin aot long hom blong mifala i mekem mi gat tras long wanem we bae i hapen. Bae oli tokbaot long pikinini blong olgeta long glad we oli bin filim blong mekem wan kaen seves i go long Lod. Mi tingbaot filing blong kwaet glad taem mi smol, taem mi pulum rabis gras long wan neiba from papa i bin askem. Taem oli invaetem mi blong givim samting, mi tingbaot mo bilivim ol toktok blong hym ia, “Sweet is the work, my God, my King” (Wok ia i swit, God mo King blong mi).2
Mi save se oli raetem ol toktok ia blong tokbaot glad we i kam taem wan i wosipim Lod long Sabat. Be ol pikinini ia, long doa blong mifala, oli bin filim, long wan dei blong wik, glad blong mekem wok blong Lod. Mo papa mo mama blong olgeta i luk janis blong mekem gud mo serem glad i go long ol jeneresen.
Wei blong Lod blong kea long olgeta we oli stap long nid i givim wan nara janis blong ol papa mo mama blong blesem ol pikinini blong olgeta. Mi bin luk long wan japel long wan Sandei. Wan smol pikinini i givim wan donesen envlop blong famle taem hem i go insaed long japel bifo long sakramen miting.
Mi bin save famle mo boe ia. Famle i jes save abaot wan insaed long wod, we i stap long nid. Papa i bin talem wan samting olsem long pikinini ia taem hem i putum moa mane long fas ofring bitim oltaem long envlop: “Yumi bin livim kakae tedei mo bin prea from olgeta we oli stap long nid. Plis givim envlop ia long bisop blong yumi. Mi save se bae hem i givim help long olgeta we oli gat moa nid bitim yumi.”
Long dei ia, boe i no tingbaot so long bel from i hanggri, be hem i tingbaot gud wok ia. Mi save talem long smael blong hem mo long wei we hem i holem envlop i taet gud we hem i filim bigfala tras blong papa blong hem blong hem i mas tekem famle ofring ia blong ol puaman. Bae hem i tingbaot dei ia, taem bae hem i wan dikon, o ating blong oltaem.
Mi bin luk sem hapines ia long fes blong wanwan long olgeta we oli bin helpem ol pipol long Aedaho long bihaf blong Lod, sam yia i pas. Teton Dam i posta long Satedei 5 Jun 1976. Leven pipol i bin ded. Plante taosen i mas aot long haos blong olgeta kwiktaem. Sam haos oli lus long wota. Mo handred moa haos, oli save sevem tru long hadwok mo mane we i bitim wanem we ol ona blong ol haos ia oli gat.
Olgeta we oli harem disasta ia oli filim sore mo filim blong mekem gud. Ol neiba, ol bisop, ol presiden blong Rilif Sosaeti, ol lida blong kworom, ol hom tija mo ol visiting tija oli aot long ol hom mo wok blong klinim ol haos blong ol narawan we i fulap long wota.
Wan kapol, i kambak long Reksbeg afta long holidei afta long bigfala wota ia. Oli no go luk haos blong olgeta. Be, oli faenem bisop blong olgeta blong askem se bae oli help wea. Hem i daerektem olgeta long wan famle we i stap long nid.
Sam dei afta, oli bin go jekem haos blong olgeta. Haos i lus, i aot long bigfala wota. Oli wokbaot i gobak long bisop mo askem, “Naoia, Yu wantem mifala i mekem wanem?”
Long weples yu stap, yu bin luk merikel ia blong sore i tanem i kam wan aksen we i no gat selfis long hem. Ating i no bin afta long wan bigfala disasta. Mi bin luk i hapen long wan prishud kworom taem wan brata i girap blong tokbaot nid blong wan man o woman we i stap lukaotem wan janis blong wok blong sapotem olgetawan o famle blong olgeta. Mi save filim sore long rum, taem sam oli givim nem blong sam pipol we oli save tekem olgeta blong wok blong olgeta.
Wanem i hapen long prishud kworom ia mo wanem i bin hapen long ol haos we bigfala wota i spolem long Aedaho, i soemaot klia wei blong Lod blong helpem olgeta long bigfala nid blong oli kam blong dipen long olgetawan bakegen. Yumi filim sore mo yumi save hao blong tekem aksen long wei blong Lod.
Yumi selebretem namba 75 aniveseri blong Jos welfea program long yia ia. I stat blong mitim ol nid blong olgeta we oli lusum wok, ol fam, mo ol haos long wanem we yumi bin save olsem Bigfala Hadtaem blong Mane.
Ol bigfala nid blong samting blong wol ia, i kambak bakegen long ol pikinini blong Papa long Heven long taem blong yumi taem oli bin, mo olsem we bae oli gat evri taem. Ol prinsipol long stamba blong Jos welfea program oli no blong wan taem mo wan ples nomo. Oli blong evri taem mo evri ples.
Ol prinsipol ia oli long saed blong spirit mo taem we i no save finis. From hemia, blong andastanem olgeta mo tekem long hat blong yumi bae i mekem i posibol blong yumi luk, mo tekem janis blong help long wanem taem mo ples we Lod i invaetem yumi long hem.
Hemia sam prinsipol we oli bin lidim mi taem mi bin wantem blong help long wei blong Lod mo wetaem nao mi bin kasem help long ol narawan.
Faswan, evriwan i hapi moa mo i filim moa respek taem oli save lukaotem olgetawan mo famle blong olgeta mo afta, blong go aot blong tekem kea long ol narawan. Mi bin glad tumas long olgeta we oli bin helpem mi blong lukluk long ol nid blong mi. Mo mi bin talem tangkyu moa ova long ol yia long olgeta we oli bin helpem mi blong mi dipen moa long miwan. Mo afta, mi bin talem tangkyu long olgeta we oli bin soem mi hao blong yusum ekstra saplae blong mi blong helpem ol nara man.
Mi bin lanem se wei blong gat wan ova saplae i blong no spend bitim wanem we mi stap winim. Wetem ekstra saplae ia, mi bin lanem se i moa gud blong givim bitim blong kasem. Hemia i from se taem yumi givim help long wei blong Lod, nao Hem i blesem yumi.
Presiden Marion G. Romni i bin talem abaot welfea wok se, “Yu no save givim mo mekem yu kam pua long wok ia.” Mo afta, hem i talem toktok blong misin presiden blong hem, Melvin J. Balad: “Wan i no save givim wan pis bred long Lod mo i no kasem wan ful bred i kambak.”3
Mi faenem se hemia i tru long laef blong mi. Taem mi givim plante long ol pikinini blong Papa we oli stap long nid, Hem i givim plante long mi.
Nambatu gospel prinsipol we i bin wan gaed long mi long welfea wok i paoa mo blesing blong yuniti. Taem yumi joenem han blong givim seves long ol pipol long nid, Lod i yunaetem hat blong yumi. Presiden J. Ruben Klak Junia i putum long wei ia: “Fasin blong givim samting, i tekem gudfala filing ia blong stap olsem ol brata taem ol man we oli gat eni kaen wok oli bin wok saed saed long wan garen blong Welfea program o nara projek.”4
Filing ia we i kam antap olsem wan brata i tru long hem we i kasem samting mo tu, hem we i stap givim. Kasem tedei, wan man we mi bin savelem sofmad long saed blong hem long Reksbeg hom blong hem i fren wetem mi. Mo hem i filim gud moa from se hem i bin mekem hemwan wanem hem i save mekem long hem mo famle blong hem. Sapos mitufala i bin wok mitufalawan, bae mitufala i lusum wan blesing blong spirit.
Long mi, hemia i lidim yumi long nambatri prinsipol blong aksen long welfea wok: Mekem famle blong yu i kam insaed long wok ia wetem yu blong oli save lanem blong kea long wanwan long olgeta taem oli stap kea long ol nara man. Ol boe mo gel blong yufala we oli wok wetem yufala blong givim seves long ol nara man long nid, bae i luk se bae oli helpem wanwan long olgeta taem oli stap long nid.
Nambafo impoten prinsipol blong Jos Welfea we mi lanem olsem wan bisop. I kam taem mi folem oda long skripja blong lukaotem ol puaman. Hem i diuti blong bisop blong faenem mo givim help long olgeta we oli nidim help afta we olgeta mo famle i mekem evri samting we oli save mekem. Mi faenem se Lod i sendem Tabu Spirit blong mekem i posibol blong “lukaotem mo faenem”5 taem oli kea long ol puaman semmak olsem hem i lidim man blong faenem trutok. Be mi bin lanem tu blong yusum Rilif Sosaeti presiden blong go faenemaot olgeta long nid. Ating bae hem i save kasem revelesen bifo yu yu kasem.
Sam long yufala i nidim insperesen ia plante manis fastaem. Blong tingbaot namba 75 aniveseri blong Jos welfea program, ol memba raon long wol bae oli kasem invitesen blong tekem pat long “Dei blong Seves.” Ol lida mo ol memba bae oli lukaotem revelesen taem oli oganaesem ol projek.
Bae mi givim tri tingting taem yu stap mekem plan blong seves projek blong yufala.
Faswan, mekem yufala i rere long saed blong spirit. Sapos nomo hat i sopsop tru long Atonmen blong Sevya, bae yu save luk klia gol blong projek olsem blong blesem, long saed blong spirit mo bodi, laef blong ol pikinini blong Papa long Heven, wanwan long olgeta mo olsem pat blong komuniti.
Nambatu tingting blong mi i blong jusum olgeta pipol we bae oli kasem seves blong yufala insaed long kingdom o long komiuniti, we nid blong olgeta bae i tajem hat blong olgeta narafala we oli givim seves. Pipol we yufala i givim seves long olgeta bae oli filim lav blong yufala. Hemia bae i mekem olgeta i glad moa, olsem we singsing i bin promes, bitim we yufala i mitim nid blong hem blong wol ia nomo.
Las tingting blong mi i blong plan blong tekem paoa we i stap long rilesen blong ol famle, ol kworom, mo okseleri oganaesesen, mo long ol pipol we yufala i save long ol komuniti blong yufala. Ol filing blong yuniti bae i dabolem ol gud risal we seves blong yu i givim. Mo ol filing blong yuniti ia long ol famle, long Jos, mo long ol komuniti bae i gro mo kam wan histri we i stap longtaem afta we ol projek oli finis.
Hemia i janis blong mi blong talem long yufala hamas mi glad long yufala. Tru long seves blong lav we yufala i bin givim long Lod, mi bin kasem ol tangkyu blong ol pipol we yufala i bin helpem taem mi mitim olgeta.
Yufala i faenem wan wei blong leftemap olgeta i hae moa taem yu stap help long wei blong Lod. Yu mo ol disaepol blong Sevya we oli gat tingting i stap daon, olsem yufala, i bin givim wan pis bred long wota blong seves, mo ol pipol we yufala i bin helpem, oli bin traem blong givim mi wan ful bred blong tangkyu i kambak.
Mi karem sem tangkyu toktok i kam long ol pipol we oli bin wok wetem yufala. Mi tingbaot, wan taem mi stanap long saed blong Presiden Esra Taf Benson. Mifala i bin tokbaot seves long Jos blong Lod. Hem i bin mekem mi sapraes wetem yang paoa blong hem, taem hem i talem, mo stap leftemap han blong hem, “mi lavem wok ia, mo hemia nao wok!”
Long bihaf blong Masta, mi talem tangkyu long yufala from seves blong yufala long ol pikinini blong Papa long Heven. Hem i save yufala mo luk ol hadwok blong yufala, strong tingting mo sakrifaes. Mi prea se bae Hem i givim yufala blesing blong luk frut blong wok blong yufala long hapines blong olgeta we yufala i bin helpem long bihaf blong Lod.
Mi save se God Papa i laef mo i harem ol prea blong yufala. Mi save se Jisas I Kraes. Yufala mo olgeta we yufala i givim seves long olgeta i kam tabu mo strong moa taem yufala i givim seves long Hem mo kipim ol komanmen blong Hem. Yu save kasem save olsem we mi save, tru long paoa blong Tabu Spirit, se Josef Smit i bin profet blong God blong putumbak Jos ia we i tru mo i laef, we i hemia nao. Mi testifae se Presiden Tomas S. Monson i profet blong God we i laef. Hem i stret eksampol blong wanem Lod i bin mekem: go raon blong mekem gud. Mi prea se bae yumi save tekem evri janis blong “leftemap han we i hang mo mekem ol ni oli kam strong bakegen.”6 Long nem blong Jisas Kraes, amen.
© 2011 i kam long Intellectual Reserve, Inc. Oli holem evri raet.Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, May 2011. Bislama. 09765 852