iVaqa ni Veisiko, June 2011
Vaqaqacotaki ni Matavuvale ena Bula Rawati Koya Vakayago
Vulica na itukutuku oqo, ka me veivosakitaki vata kei ira na marama o sikova, ena kena gauna donu. Vakayagataka na taro me vukea na nomu vaqaqacotaki ira na marama ka me sa tiki kaukauwa ni nomu bula na iSoqosoqo ni Veivukei.
Vakabauta • Matavuvale • Veivukei
Sa itavi ni marama yadua—na vakatorocaketaki ni bula rawati koya—ena noda rawa ni qaravi keda ga kei na noda matavuvale. Ni da vulica meda taleitaka na cakacaka ena yaco meda bula rawati keda, ena noda vakasaqara meda kunea na veivakauqeti ena gaunisala uasivi meda rawati keda kina, vakakina ena noda cakacaka vata vakalewe ni matavuvale me sotavi kina na veika bibi e gadrevi.
Ni da sa bula rawati keda, meda vakayagataka na noda veivakalougatataki kei na ivurevure meda vakavakarau kina ki na levei ni leqa. Ia, ena vakalevutaki na bula rawati koya, ena noda masulaka na veivakayaloqaqataki meda sotava rawa kina ena vakabauta na bolebole kece era na basika dina mai. Na bula rawati koya talega e rawa kina vei keda meda maroroya na noda veiyalayalati meda lomani ira tale eso.
E vakatavulici vei keda ena iSoqosoqo ni Veivukei, na ivakavuvuli kei na icakacaka uasivi ni bula rawati koya. E rawa me ra vulica kina na marama me baleta na ituvatuva vakailavo, levei ni dinau, rawa ka vakacakacaka, na ivolanikalou kei na kosipeli, vakatavulici ira tale eso me ra wilivola ka vuli, tekinolaji, ituvaki vinaka vakayago, vakaukauwa yago, tatarovi kei na veivakabulai mai na veivakatotogani, bula kei na yalo ni veimaliwai, tarovi ni tauvimate, teitei, vakarautaki kei na maroroi ni kakana, vakavakarau ena leqa vakasauri, kei na vuqa tale na veika eso ka rawa me vukea noda yaco meda bula rawati keda.1
E vakamacalataka o Julie B. Beck, peresitedi raraba n iSoqosoqo ni Veivukei ni “noda rawata rawa na veika me baleti keda kei ira tale eso sa ivakadinadina ni noda tisaipeli ni Turaga o Jisu Karisito. … A biuta tu mai nona ivakadinadina ni bula rawati koya vakaikoya [na marama noqu-i-sa], ena nona takali vakasauri ena yabaki sa oti. A tiko na nona ivolatara ni valetabu ka dodonu tiko na kena tikinisiga kei na ivolanikalou vakayagataki vinaka kei na ivolavakarau ni vulici ni kosipeli. Keitou veiwaseitaka ena loloma na kuro, itavuteke, kei na veleti ka dau vakarautaka kina e udolu na veleti kakana. A biuta tu mai na lacadrau ka caka mai na isulu makawa. E vakabauta na ivosavosa makawa ‘Vakayagataka, me madra sara, vakayagataka, se sa sega ga sa sega.’ Keitou raica na iwase ni kakana e tea, vakabula balavu tu mai, ka maroroya. E luvuci keitou vakabibi sara na nona ivola lailai ni ilavo ka dau vola ena yalodina na ilavo e vakayagataka ena vica vata na yabaki sa oti. Ena vuku ni nona bula vakayalomatua, a biuta tu mai kina eso na ilavo ka maroroi tu me baleta na leqa vakasauri, ka sega ni dua nona dinau! Na ka bibi duadua, sai koya na nona vakatavulici ira ka veivakauqeti vei ira na lewe vuqa ena icakacaka uasivi ni ka e kila tu ena gauna ni nona bula ena yalodina.”2
Mai na iVolanikalou
Joni 13:34–35; Jemesa 1:27; Mosaia 4:26; Vunau kei na Veiyalayalati 29:34–35; 38:30; 44:6
Mai na Keda iTukutuku Makawa
Era dau vakaitavi wasoma na marama lewe ni iSoqosoqo ni Veivukei ena cakacaka ni vueti vakayago ka vakayalo ni yalo. Era ripotetaki ira mai na gadreva tu na veivuke, o ira na marama ena nodra dau soqoni na Marama iSoqosoqo ni Veivukei e Nauvoo ena veimacawa. E dau veivotayaki na isolisoli vakailavo, iyaya, taledi, vakakina na gauna me ra vakacegui kina na vakaleqai tu. Na tauyavutaki ni cakacaka oqo me ra vukei kina o ira era vakaleqai tu e sa tomani tikoga me cakacaka vaka-iSoqosoqo ni Veivukei ena veiitabatamata.
A vakasalataki ira na marama, o Peresitedi Brigham Young (1801–77) ena nodra yaco yani na Yalododonu ena Buca e Salt Lake) me ra vukei ira era gadreva tu na veivuke ka vulica kina na vakayacori vakauasivi ni ka me rawa ni ra qaravi ira kina vakataki ira. A kaya, “Mo ni vulica mo rawata vinaka na veika me baleta na nomuni dui bula; mo ni maroroya ki na nomuni lololo na witi kei na valawa, mo ni vakarautaka ki na siga ni lauqa levu.”3 Ena ruku ni veidusimaki ni matabete, e tomana tikoga na iSoqosoqo ni Veivukei na vakatavulici ni bula rawati koya, me taqomaki kina na matavuvale ka vakauqeta na bula dodonu vakatamata yadua kei na cakacaka ni loloma uasivi, na loloma savasava i Karisito.
© 2011 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/10. Vakadonui me vakadewa: 6/10. iVakadewa n iVisiting Teaching Message, June 2011. Fijian. 09766 858