Feia apî
Te mau Mea atoa Ta’u e Nehenehe e Horo‘a
Te haape‘ape‘a ra vau no te ite e, nahea vau ia aufau i te mau mea ta’u e hinaaro e rave i teie tau mahanahana : te haapiiraa, te rima î, te puhaparaa e te vai atu râ. Ua mana‘o vau e, e ta‘i au. I muri iho ua haamana‘o a‘e ra vau i te mau mea atoa tei haapiihia ia‘u no ni‘a i te ti‘aturi e te faaroo i te Fatu. Ua faaoti a‘e ra vau e tuu i teie ohipa i roto i te rima o te Fatu e ia ti‘aturi e, mai te mea e, ua ti‘a i To’na hinaaro, e horo‘a mai oia i te hoê rave‘a.
Aita i maoro roa i muri iho, ua itehia mai i to’u mama te hoê chèque aita i aufauhia no te hoê ohipa ta’u i rave i te omuaraa o taua matahiti ra, e i te po‘ipo‘i a‘e, ua tae mai te hoê rata tei roto i reira te hoê parau aufauraa no te rê piti i roaa ia‘u i roto i te hoê tata‘uraa. Ua riro teie ei faaiteraa papû rahi no’u e, te ora nei te Atua, e ua here Oia ia‘u e te haapa‘o mai nei oia ia‘u, e e horo‘a mai oia.
Ua î roa to’u aau i te mauruuru e te here i to’u Metua i te Ao ra e to’u Faaora. Mai te huru ra e, e paaina vau ! Te hinaaro nei au e faaite i to’u mauruuru rahi, e arue maitai roa i te Atua, e ia faaite i te reira mana‘o. Ua faaite te tahi mau taata i te reira na roto i te hamaniraa i te hoê himene, te papa‘iraa i te hoê pehepehe, e aore râ, te peniraa i te hoê hoho‘a, tera râ, aita ta’u e nehenehe e rave i te reira mau mea. Ua ite a‘e ra vau e, hoê noa iho mea ta’u e nehenehe e horo‘a o te ti‘a ei arueraa o to’u ia ora—ia riro « ei haapa‘oraa râ na tei faaroo ra » (1 Timoteo 4:12), ia horo‘a i to’u ora i te Mesia ra. Ti‘a râ’tu ai Ta’na e ani nei, e ti‘a râ’tu ai ta’u e nehenehe e horo‘a.