Pratham Adhyakshta ka Sandesh, July 2011
Bhaai, Mainne Tay Karli Hai
Do yuva bhaai ek chote chattaan par khade the jahan se ek nile taalaab ka saaf paani dikhta tha. Yeh ek naami chalaang lagane waali jagah thi, aur donon bhaai ne aksar is chalaang ko lagaane ke baare mein baatein ki thi—jise karte unhonne auron ko dekha tha.
Haalaanki woh donon chalaang lagana chahate the, par koi pahal nahin karna chahata tha. Chattaan ki unchaai utni nahin thi, magar donon yuva ladkon ke liye, aysa lagta ki jab woh kudna chahate duri aur badh jaati—aur unki himmat choot rahi thi.
Ant mein, ek bhaai ne apna paer chattaan ke kinaare par rakhkha aur nishchit rup se aage badha. Usi samay uske bhaai ne fusfusaaya, “Shaayad hamein agle garmi ke mausam tak ruk jaana chahiye.”
Pehle bhaai ki gati, ab tak, use aage khinch rahi thi. “Bhaai,” usne kaha, “Mainne tay karli hai!”
Woh paani mein gaya aur jald se upar aaya ek vijay bhari cheekh ke saath. Dusra bhaai bhi turant chalaang lagaya. Baad mein, woh donon pehle ladke ke antim shabdon par hans pade jo usne paani mein kudne se pehle kahan tha: “Bhaai, mainne tay karli hai.”
Vachan dena bhi thoda paani mein kudne jaisa hai. Chaahe tumne tay karli hai ya nahin. Chaahe tum aage badh rahe ho ya tum ek hi jagah khade ho. Koi beech ka sthaan nahin hai. Hum sabhi nirnay karne ke palon ko anubhav karte hai jisse hamari baaki ka jiwan badal jaata hai. Girjaghar ke sadasye hone ke naate, hamein khud se puchna chahiye, “Kya main chalaang laga doon ya sirf kinaare par khada rahun? Kya main kadam aage badhaaun ya sirf paani ka taapkram parkhun apne paaon ke anguthe se?”
Kuch paap hote hai kyunki hum galat karte hai; anye paap hote hai kyunki hum kuch nahin karte. Susamachaar se sirf thoda hi vachanbadh rehna krodh, niraasha, aur apraadhipan ki bhaavnaaen jaagrut kar sakti hai. Yeh hamare upar nahin laagu hona chahiye kyunki hum ek vachanbadh log hai. Hum vachan lete hai Prabhu se jab hum baptisma lete aur jab hum Prabhu ke ghar mein pravesh karte hai. Purush Prabhu se vachan lete hai jab woh purohiti paate hai. Prabhu ke saath banaye ek vachan ko nibhaane se mahatvapurn koi aur baat nahin hai. Hum Puraane Niyam mein Jacob ko diya gaya Rachel aur Leah ke jawaab ko yaad karein. Jawaab saadhaaran aur sidha tha aur unke vachanbadhta ko dikhlaya tha: “Jo kuch Parmeshwar ne tujhse kaha hai, so kar” (Genesis 31:16).
Jo log sirf thoda tay kar chuke hai ko sirf thoda hi gawahi, anand, aur shaanti ke ashirvaad milne ki aasha karni chahiye. Swarg ki khidkiyaan sirf thoda hi unke liye khulega. Kya yeh sochna murakhta nahin hoga, “Main apne aap ko 50 pratishat abhi tay karunga magar jab Masih Dusre Aagman ka samay aayega, main apne aap ko 100 pratishat tay kar lunga”?
Prabhu ke vachan ki or vachanbadhta hamare dharm-parivartan ka ek parinaam hai. Hamare Uddhaarkarta aur Uske Girjaghar ke prati vachanbadh rehna hamare charitra ko badhaata hai aur hamare aatma ko mazboot karta taaki jab hum Masih se mile, Woh hamein gale laga kar kahega, “Dhanye, hain achche aur vishwaas-yogye daas” (Matthew 25:21).
Lakshye aur kaarwaahi ke beech ek antar hai. Jo log sirf tay karne ki ichcha rakhte hai shaayad har mod par bahane dhoondhenge. Jo log sach mein tay kar lete hai apne chunaotiyon ka saamna himmat se karte aur apne aap se kehte, “Haa, yeh ek achcha kaaran hoga taalne ke liye, magar mainne vachan liye hai, aur isliye main woh karunga jo mainne tay kiya hai.” Woh dharamshaastra mein dhoondhte hai aur dil se Swarg ke Pita ka maargdarshan dhoondhte hai. Woh apne Girjaghar ki niyuktiyon ko apnaate aur use bada karte hai. Woh apne sabhaaon mein jaate hai. Woh apna gharelu aur bhent ka shikshan par jaate hai.
Ek German kahawat kehta hai, “Vachan pure chaand ki tarah hote hai. Agar unhein turant na nibhaaya gaya, woh din pe din ghatte jaaenge.” Ishu Masih ka Girjaghar Antim-dinon ke Santon ka ke sadasye hone ke naate, humne tay kiya hai ki shishyata ke raaste par chalenge. Humne apne Uddhaarkarta ke uddhaaran par chalne ki tay karli hai. Anumaan lagaao kaise duniya ko ashirvaad milega aur woh badal jaaega achche ke liye jab Prabhu ke Girjaghar ke sabhi sadasye apne sahi sambhaaona jaisa jiyenge—apne hridayon tak parivartit hokar aur Parmeshwar ke raajye ko badhaane ka nirnay karenge.
Kuch tarike se, hum mein se har koi ek nirnay ke chan par khada paani mein dekh raha hai. Yeh meri prarthna hai ki hum mein vishwaas hoga, hum aage badhenge, himmat se apne bhay aur shanka ka saamna karenge, aur apne aap se kahenge, “Mainne tay karli hai!”
© 2011 Intellectual Reserve, Inc dwara. Pure adhikaar surakshit. USA mein chaapa gaya. Angrezi swikriti: 6/10. Anuwaad swikriti: 6/10. First Presidency Message, July 2011 ka anuwaad. Fiji Hindi. 09767 298
Is Sandesh Mein Se Shikshan
“Seekhne waalon ko tasveer banane dene se hum unhein susamachaar siddhaanton ko samajhne mein madad kar sakte hai. Tasveer banana unhein susamachaar kahaniyon aur siddhaanton ki samajh aur ehsaas ki jaanch karne aur zaahir karne ka mauka dete hai” (Teaching, No Greater Call [1999], 166). Is lekh ko padhne ka iraada karein, susamachaar ki or vachanbadh hone ke sidhaant par charcha karke, aur phir jo chahate hai unse kahe ki woh ek tasveer banaye ek susamachaar gatividhi ki jo vachanbadhta dikhlata hai. Chote bachchein ko shaayad sujhaao ki zaroorat hogi ki kya tasveer banani hai.