2011
Feito Ngeni ewe Tempel me Angei Om kewe Feioch
July 2011

Poraus seni Fefin Chon Amwa, July 2011

Feito Ngeni ewe Tempel me Angei Om kewe Feioch

Kopwe aneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis ne anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku • Famini • Anisi

Fefin, sia fakkun feioch. Ewe Chon Amanau mi wisen emweni ei Mwichefen. Sia angei emwen me ren soufos mi manau. Sia angei ekkewe pukfel. Me a wor chommong tempel mi pin ekkis meinisin won fonufan minne sia tongeni angei ekkewe feioch mi namot ne anisikich ne niwinsefan ngeni Semach won Nang.

Sia akkomw feino ngeni ewe tempel fan itach pwisin. “Ewe aewin popun ewe tempel,” Elter Robert D. Hales seni ewe Mwichen Engon me Ruemon Aposel a awewe, “ina ne awora ekkewe angang mi namot pwe sipwe tongeni seikata non ewe muun selestial. Angangen tempel mi emwenikich ngeni ach Chon Amanau me ra ngenikich ekkewe feioch mi feito seni ewe Achasefanin Jises Kraist. Ekkewe tempel mi ewe sukkunen kaeo mi napanap, a ngenikich mirit me tipachem usun ewe Forutan ewe fonufan. Porausen awewen ewe endowment a ngenikich emwen won ifa usun sipwe manau me won ei fonufan. … Ewe angang mi masou ngeni ekkoch porausen awewe won ifa usun sipwe manau me ekkoch pwon mi pin sipwe föri ne manau wenechar me ren ach tapweno mwirin ach Chon Amanau.”1

Nge ach angangen tempel ese kouno ikkewe. Preseten Boyd K. Packer, Presetenin ewe Mwichen Engon me Ruemon Aposel, a afanafan: “Om wisen tupuni emon mi fen mano, kopwe niwinsefan ngonuk ekkewe pwon mi pin ka fen föri. Epwe apohcokuna non tupuwom ekkewe feioch mi napanap non pekin ngun mi chufengen ren ewe imwen ewe Samon. … Non ekkewe pwon mi pin me angang mi nom ekkewe feioch nukanapan minne kopwe angei non ewe tempel mi pin.”2

Feito ngeni ewe tempel me feito sefan. Föri me anneasochisi pwon mi pin an ewe tempel epwe awena kich won ewe an mi pung ngeni ewe feioch mi napanap—manau ese much.

Barbara Thompson, aruemonun chon aninis non ewe presentensin ekkewe Fin Anisi Unus.

Seni Ekkewe Pukfel

Isaiah 2:3; 1 Corinthians 11:11; Pwarata 7:13–15; Doctrine and Covenants 109

Seni Ach Uruo

Ewe Soufos Joseph Smith a kapas fan chommong ngeni ekkewe Fin Anisi non ar kewe mwich. Nupwen ewe Tempel non Nauvoo mi kouta, ewe Soufos a aiti ekkewe fefin non ekkewe annuk, a ammonater ne angei mirit seni ekkewe angangen tempel. Non 1842 a apasa ngeni Mercy Fielding Thompson pwe ewe endowment “epwe emwenuk seni kiroch ngeni saram mi ningoch.”3

Ukukun 6,000 Souneng mi angei ekkewe angangen tempel me mwen ra su seni Nauvoo. Preseten Brigham Young (1801–77) a apasa, “A chommong souneng mi noninen ar repwe angei ekkewe angang[an ewe tempel], me pokiten a watte ach noninen ne föri ewe angang fan iter, iwe ua pwisin fangeno unusen manauei ngeni ewe angangen ewe Samon non ewe Tempel iteitan pwin me ran, use annut nap seni ruanu awa, iteitan ran, me ua niwinsefan ngeni imwei fan eu chok non ewe wik.”4 Ewe pochokun me manamanen ekkewe pwon mi pin an ewe tempel mi apochokuna ekkewe Souneng nupwen ra su seni nenier me ewe tempel fan iten ar sai ngeni met rese sinei.

© 2011 seni Intellectual Reserve, Inc. Meinisin pung mi kawor. A for non Merika. Kapungunon non fasun Merika: 6/10. Kapungunon chiakun: 6/10. Chiakun Visiting Teaching Message, July 2011. Chuukese. 09767 901

Esinesin

  1. Robert D. Hales, “Blessings of the Temple,” Liahona, Oct. 2009, 14.

  2. Boyd K. Packer, The Holy Temple (1980), 170, 171.

  3. Teachings of Presidents of the Church: Joseph Smith (2007), 414.

  4. Teachings of Presidents of the Church: Brigham Young (1997), 299.

Met Upwe Tongeni Föri

  1. Met upwe aporausa ne apochokuna ekkewe ir ua churi non ar achocho ne “feito ngeni ewe tempel”?

  2. Ifa usun ua tongeni angei ekkewe efeiochun ewe tempel?