Parau Poro‘i a te Peresideniraa Matamua, Atete 2011
Here i roto i te Utuafare – A‘o no ô mai i to Tatou Peropheta
Haamaitai i te Oraraa Utuafare
« Ia ite ana‘e râ tatou i te mea e vai nei i roto i te ao nei e ia ite ana‘e tatou i te mau-ore-raa e te faufaa ore o te rahiraa o te ao, e tupu ïa to tatou mana‘o mauruuru no te haamaitairaa i te riroraa ei tufaa no te tahi mea e nehenehe ta tatou e ti‘aturi – te nohoraa e te utuafare e te here o te mau taata tei herehia e tatou. E ite tatou eaha te auraa te parau taatihia na roto i te hopoi‘a, na roto i te faatura, na roto i te meloraa. E haapii mai tatou e aita roa hoê noa‘e mea e faaî i te vahi no te haamaitai i te auraa o te oraraa utuafare »1
Opere i to Tatou Here
« A horo‘a i te hoê haapopouraa e te raveraa i ta outou mau tamarii i roto ia outou : a parau atu ‘ua here au ia oe’, a faaite tamau noa i to outou mauruuru. Eiaha e vaiiho i te hoê fifi ia faaafarohia ia riro ei mea faufaa a‘e i te hoê taata ia herehia. E atea ê te mau hoa, e paari te mau tamarii, e reva ê te fetii. E mea ohie roa i te rave mai te tahi ê no te mono, tae roa i te taime e mo‘e ai ratou i to tatou oraraa e i reira tatou e feruri ai e ‘ahani pai’ e ‘ahani a‘e pai’.’ …
« E mata na tatou i te mauruuru i te ora mai ta tatou e ora nei, a ite i te oaoa i roto i te ratereraa e a opere i to tatou here i to tatou mau hoa e te utuafare. I te hoê mahana, aita e ananahi faahou no tatou tata‘itahi. Eiaha e faataupŭpŭ i te mea faufaa roa‘e ».2
Faaite i to Tatou Here
« E te mau taea‘e, e poihere tatou i to tatou mau hoa faaipoipo ma te tura e ma te faatura. O ratou to tatou mau hoa mure ore. E te mau tuahine, a faatura i to outou mau hoa faaipoipo. E hinaaro ratou e faaroo i te parau maitai. E hinaaro ratou i te hoê ata auhoa. E hinaaro ratou i te hoê parau mahanahana o te here mau…
« O outou te mau metua, te parau nei au, a faaite i te here i ta outou mau tamarii. Ua ite outou e ua here outou ia ratou, ia papû râ ia outou e ua ite maitai ratou i te reira. E mea faufaa mau ratou. A faaite atu ia ratou. A ani i to tatou Metua i te Ao ra i te tauturu a aupuru ai outou no to ratou mau hiaai i te mau mahana atoa e a faaoti ai outou i te mau titauraa o te ore roa e ti‘a ia ape i roto i te aumetuaraa. E hinaaro hau atu outou i to outou iho paari no te aupururaa ia ratou ».3
Parau i to Tatou Here
« O outou te mau metua, a parau i to outou here i ta outou mau tamarii. A pure no ratou ia ti‘a ia ratou ia pato‘i i te mau ino o te ao nei. A pure ia tupu ratou i te paari i roto i te faaroo e te iteraa papû. A pure ia ora noa ratou i te oraraa o te maitai e te tavini ia vetahi ê.
« E te mau tamarii, a faaite na i to outou mau metua e ua here outou ia raua. A faaite ia raua i to outou mauruuru rahi no te mau mea atoa ta raua i rave e te tamau noa nei â i te rave no outou.4
Te mea hau i te faufaa rahi
« E te mau mea hau atu i te mea faufaa rahi o te faahaere tamau noa mai te mau taata e haaati ra ia tatou. E mea pinepine tatou i te mana‘o e e ti‘a ia ratou ia ite i to tatou here rahi ia ratou. Eiaha roa râ tatou e mana‘o i te reira ; e mea ti‘a ia tatou ia faaite atu ia ratou i te reira. Ua papa‘i o William Shakespeare e, ‘aita ratou i here i te mea o te ore e faaite mai i to ratou here.’ Eita roa tatou e tatarahapa i te parau maitai tei parauhia e aore râ i te here tei faaitehia. Te mea taa ê ra, e tae mai to tatou tatarahapa mai te mea e aita teie mau mea e vai ra i roto i to tatou auraa e te feia faufaa roa‘e no tatou ».5
Haafatata mai i te Ra‘i
« Ia î to tatou mau utuafare e te mau fare i te here : te here te tahi e te tahi, te here i te evanelia, te here i to tatou taata tupu, e te here i to tatou Faaora. No reira, e fatata rii mai te ra‘i i te fenua.
« Ia faariro tatou i to tatou mau fare ei mau tunago i reira te mau melo o te utuafare e hinaaro tamau ai e ho‘i mai ».6
Hoê Pure no te mau Utuafare
« No te mea e te aro-noa-hia ra te utuafare na te ao nei i teie mahana, e rave rahi mau ohipa mo‘a mai tahito mai â o tei faanevanevahia, te ani nei matou ia Oe, e to matou Metua, ia aifaito matou e te mau titauraa o ta matou e faaruru nei, ia ti‘a pautuutu matou no te parau mau e te parau-ti‘a. Ia riro to tatou mau fare ei ao no te hau, no te here e no te pae varua ».7
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no First Presidency Message, August 2011. Tahitian. 09768 895
Haapiiraa no roto mai i teie parau poro‘i
« I roto i te ohiparaa no te faanahoraa i te feruriraa, e vauvau atu te orometua i te hoê uiraa e aore râ te hoê huru oraraa e ia horo‘a i te mau piahi i te hoê taime poto no te faaite mai i te mau faaotiraa e aore râ te mau mana‘o » (Haapiiraa, Aita e Piiraa Teitei A‘e [1999], 160). A tai‘o ai outou i teie parau e te utuafare, a ani ia ratou ia faaroo i te a‘o e aore râ i te mau mana‘o o te haamaere ia ratou. I reira te mau melo o te utuafare e nehenehe ai e imi i te mau rave‘a no te faarahi i te here i roto i to ratou fare. A feruri na i te ani i te utuafare ia hi‘o faafou i teie mau mana‘o i roto i te hoê pureraa pô utuafare i muri nei.