Visiting Tijing Mesej, Ogis 2011
Wan Sosaeti blong Ol Tabu Woman
Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.
Ilaesa R. Sno, seken Rilif Sosaeti jeneral presiden, i bin tijim: “Aposol Pol blong bifo i bin tokbaot ol tabu woman. Hem i diuti blong wanwan long yumi blong kam wan tabu woman. Bae yumi gat ol hae gol, sapos yumi ol tabu woman. Bae yumi filim se oli bin singaotem yumi blong mekem ol impoten diuti. Evriwan i gat ol diuti ia. I no gat wan sista i stap hemwan, o paoa blong hem i sot, be wanem hem i save mekem nao i wan bigfala samting blong stanemap Kingdom blong God long wol.”1
Ol sista, yumi no stap yumiwan o paoa blong yumi i no sot. Taem yumi akseptem presen blong stap long Rilif Sosaeti, yumi kam pat long wanem Profet Josef i bin tokbaot olsem wan sosaeti we i “seperet long evri nogud samting blong wol—wan sosaeti we i naes, i gud, mo i tabu.”2
Sosaeti ia i helpem yumi mekem fet blong yumi i kam moa strong mo gro long spirit taem hem i givim long yumi lidasip, seves, mo ol janis blong tij. Long seves blong yumi, wan niufala pat i kam long laef blong yumi. Yumi progres long spirit, mo tingting blong yumi blong kam pat blong wan samting, aedentiti, mo valiu blong yumiwan i kam antap. Yumi luksave se ful tingting blong gospel plan ia i blong givim wan janis long yumi wanwan blong go kasem ful paoa we yumi save kasem.
Rilif Sosaeti i helpem yumi blong rere blong kasem ol blesing blong tempol, blong ona long ol kavenan we yumi mekem, mo blong tekempat long fandesen blong Saeon. Rilif Sosaeti i helpem yumi kam antap long fet blong yumi mo wanwan fasin blong yumi blong stap stret mo gud, mekem ol famle oli kam moa strong, mo lukaotem mo helpem olgeta we oli stap long nid.
Wok blong Rilif Sosaeti hem i tabu, mo blong mekem tabu wok i krietem fasin blong stap tabu insaed long yumi.
Silvia H. Olred, fas kaonsela long Rilif Sosaeti jeneral presidensi.
I Kamaot long Ol Skripja
Eksodas 19:5; Ol Sam 24:3–4; Fas Tesalonaeka 4:7; Taetas 2:3–4; Doctrine and Covenants 38:24; 46:33; 82:14; 87:8; Moses 7:18
I Kamaot long Histri blong Yumi
Taem hem i stap toktok long Woman Rilif Sosaeti blong Nauvu, Profet Josef i tokbaot fasin blong stap tabu, mo i eksplenem se taem ol sista oli stap klin inaf mo tabu, bae oli save gat wan mak blong paoa we bae i stap long wol. Hem i bin eksplenem: “Fasin blong no stap flas, gat lav, klin fasin—ol samting ia oli mas givim ona long yu. … Sosaeti ia … bae i gat paoa blong komandem ol kwin insaed long hem. … Ol king mo kwin blong wol bae oli kam long Saeon, mo givim ol respek blong olgeta.” Ol Rilif Sosaeti sista we oli stap laef folem ol kavenan blong olgeta oli komandem respek, i no long ol pipol we oli hae nomo, be “sapos oli laef folem ol kavenan ia,” Josef i bin promesem ol sista se, “bae ol enjel tu bae oli mas kam mo stap wetem yufala.”3
Taem ol sista oli stap tekempat long wok blong givim seves mo sevem ol narafalawan, oli stap kam tabu olgetawan. Lusi Mak Smit, mama blong Profet, i bin serem gud samting we Rilif Sosaeti i save mekem i hapen: “Yumi mas stap glad gud long wanwan long yumi, lukaotem wanwan long yumi, kamfotem wanwan long yumi mo kasem tijing, blong yumi evriwan i save sidaon tugeta long heven.”4
© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, August 2011. Bislama. 09768 852