Visiting Tijing Mesej SEPTEMBA 2011
Mekem Ol Famle Oli Kam Strong Moa Taem Yu Mekem Spirit I Kam Strong Moa
Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.
Juli B. Bek, Rilif Sosaeti jeneral presiden i bin talem: “Insaed long mi, wan bigfala testemoni i bin gro long saed blong valiu blong ol gel blong God. … Mi bin filim se i gat wan bigfala nid blong gat moa fet, mo moa stret mo gud fasin. I gat wan nid we i bigwan bitim bifo blong gat ol strong famle mo hom.”
Ol sista oli save help blong krietem ol strong hom mo famle taem oli tekem aksen folem revelesen we oli kasem blong olgetawan. “Paoa blong kwalifae from, blong kasem mo blong tekem aksen long revelesen we wan i kasem blong hemwan, i wan impoten skil ia nomo we wan i save kasem long laef ia,” Sista Bek i gohed blong talem. “Blong kwalifae blong kasem Spirit blong Lod, i stat wetem wan tingting blong wantem Spirit ia, mo i minim tu se yumi mas klin inaf i kasem wan level. Blong stap obei long ol komanmen, blong stap sakem sin, mo blong stap riniu ol kavenan we yumi mekem long taem blong baptaes, i lidim yumi go long blesing ia blong gat, oltaem, Spirit blong Lod i stap wetem yumi. Blong mekem mo kipim ol kavenan blong tempol i ademap tu fasin blong gat wan strong spirit, mo paoa long laef blong wan woman. Plante ansa long ol had kwestin, oli save faenem olgeta taem oli ridim ol skripja from se ol skripja oli givhan long yumi blong kasem revelesen. … Prea evri dei, i wan mas, blong gat Spirit blong Lod wetem yumi.”1
Yumi mekem ol memba blong famle blong yumi oli kam strong moa tu long saed blong spirit taem yumi helpem olgeta blong andastanem plan we i no save finis blong Papa long Heven. Elda M. Rasel Balad blong Kworom blong Olgeta Twelef Aposol i bin askem: “Wanem nao yumi save mekem, blong mekem ol pikinini blong yumi oli rere gud moa long saed blong spirit blong mitim ol rol blong olgeta we i blong taem we i no save finis? Ating ansa we i moa stret hem i: Tijim olgeta olsem wanem blong laef folem ol prinsipol blong gospel.” Tijing ia i kam tru long prea evri dei, skripja stadi, mo taem blong famle kakae, mo tu, long taem blong famle haos naet evri wik, mo taem yumi go long Jos. Elda Balad i eksplenem: “Yumi stap rere evri dei, naoia, from laef we i no save finis. Sapos yumi no stap rere from laef we i no save finis, yumi stap rere from wan samting we i daon moa, ating wan samting we i daon evriwan.”2
Aot long Ol Skripja
Ol Proveb 22:6; 1 Jon 3:22; luk long Doctrine and Covenants 11:13–14; 19:38; 68:25
I Kamaot long Histri blong Yumi
Profet Josef Smit i bin tijim ol sista long wan miting blong Rilif Sosaeti long Epril 1842, se oli gat tabu wok blong lukaotem fasin blong sevem olgetawan. Hem i bin talem: “Afta we mi givim instraksen blong mi, bae yufala i responsibol from ol sin blong yufalawan; hem i wan gudfala ona blong yufala i wokbaot long fored blong Papa long Heven olsem blong yufala i sevem yufalawan; yumi evriwan i mas ansa long God from fasin ia we yumi stap mekem blong kam antap long laet mo waes we Lod i bin givim long yumi blong mekem se yumi save sevem yumiwan.”3 Hem i bin tijim olgeta blong oli stap ol pipol we oli stret mo gud, blong kam wan tabu pipol, mo blong rere blong kasem ol tempol odinens mo kavenan.
© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, September 2011. Bislama 09767 852