Ny Fomba Fandalinana ny Bokin’i Môrmôna

Nataon’ny Loholona D. Todd Christofferson

Ao amin’ny Kôlejin’ny Apôstôly Roambinifolo

Dimy amby roapolo taona lasa izay no nanomezan’ny Filoha Ezra Taft Benson ny antsipirian’ireo “antony lehibe telo tokony hanaovan’ny Olomasin’ny Andro Farany ny fandalinana ny Bokin’i Môrmôna ho tanjon’ny fiainana manontolo” (1899–1994).¹ Ireto avy ireo antony ireo:

Voalohany, ny Bokin’i Môrmôna no vato ifaharan’ny fivavahantsika—vato ifaharan’ny fijoroantsika ho vavolombelona momba an’i Jesoa Kristy, sy ny fotopampianarantsika, ary ny fijoroantsika ho vavolombelona.
Faharoa, nosoratana ho an’izao androntsika izao ny Bokin’i Môrmôna.
Fahatelo, ny Bokin’i Môrmôna dia manampy antsika hanakaiky kokoa an’Andriamanitra.

Ireo antony handalinana ny Bokin’i Môrmôna ireo dia manoro fomba hafa ihany koa ahafahantsika miroso ao anatin’ny fandalinana izany soratra masina manokana izany.

Vato ifaharan’ny Fivavahantsika

Satria ny Bokin’i Môrmôna no vato ifaharan’ny fijoroantsika ho vavolombelona momba an’i Kristy sy ny fahafenoan’ny filazantsara dia zava-dehibe ao amin’ny fandalinantsika ny mifantoka manokana amin’ireo fampianarana sy fijoroana ho vavolombelona maro momba ny Mpamonjy izay ao anatiny. Ny sasany dia nanao izany tamin’ny alalan’ny fividianana Bokin’i Môrmôna iray vaovao sy tsy lafo vidy ary tamin’ny alalan’ny fanasiana marika ireo andininy rehetra izay miresaka na mampianatra mikasika ny Mpamonjy, sy ny Asa Fanompoany ary ny Asa nanirahana Azy. Izany dia sady mitondra fijoroana ho vavolombelona lalina kokoa momba an’i Kristy amin’ny maha-Zanak’Andriamanitra Azy no fankasitrahana vaovao an’ireo zavatra izay nataony sy mbola ataony ho antsika.

Nosoratana Ho An’ny Androntsika

Ireo mpanoratra ao amin’ny Bokin’i Môrmôna dia nanoratra tamim-pieritreretana ireo taranaka ho avy, indrindra indrindra amin’ny andro farany. Rehefa namintina ireo rakitsoratra Nefita i Môrmôna dia nilaza fa tsy afaka nampiditra na dia ny “ampahazatony” aza (jereo ny 3 Nefia 5:8; jereo ihany koa ny Tenin’i Môrmôna 1:5). Nilaza i Môrônia hoe: “Miteny aminareo aho miova tsy ny eo ianareo, ary tsy eto anefa ianareo. Nefa indro, efa nasehon’i Jesoa Kristy ahy ianareo, ary fantatro ny ataonareo” (Môrmôna 8:35). Ireo mpanoratra roa ireo sy ireo hafa, izay niasa teo ambanin’ny fitarihan’ny Fanahy, dia nanoratra zavatra izay ho lasa tombontsoa lehibe indrindra ho antsika amin’izao andro farany izao.

Noho izany isika dia tokony handalina sady mametraka ireto fanontaniana ireto ao an-tsaintsika: “Maninona no nampidirina tato ity?” Ahoana no iharan’izany ankehitriny sy iharan’izany amiko?” Nanamarika ny Filoha Benson, ohatra, fa ao amin’ny Bokin’i Môrmôna isika dia mahita lamina mba hiomanana amin’ny Fiaviana Fanindroan’ny Mpamonjy. Mianatra isika hoe ahoana no fomba niainan’ny mpanara-dia an’i Kristy tao anatin’ny fotoanan’ny ady, ahoana no fomba niatrehany ny fanenjehana sy ny fihemorana, ahoana no fomba nanaovany asa fitoriana, ary ahoana no niatrehany ireo zava-doza hateraky ny fitiavan-javatra ara-materialy.² Tahaka ny nataon’i Nefia, rehefa mandalina isika dia tokony “hampiharina” amin’ny tenantsika ny soratra masina—izany hoe, miezaka ny hamantatra ny fomba hampiharana izay hitantsika ao amin’ny Bokin’i Môrmôna (jereo ny 1 Nefia 19:23).

Manatona Akaiky kokoa an’Andriamanitra

Hindramina indray ny tenin’ny Filoha Benson manao hoe: “Tsy hoe mampianatra antsika ny fahamarinana fotsiny ny Bokin’i Môrmôna, na dia tena manao izany aza izy. Tsy hoe mijoro ho vavolombelona momba an’i Kristy fotsiny ihany ny Bokin’i Môrmôna, na dia tena manao izany ihany koa aza izy. Fa mbola misy zavatra hafa ankoatra izany. Misy hery ao anatin’ilay boky izay hanomboka hirotsaka ao amin’ny fiainanao raha vao manomboka mandalina tsara ny boky ianao.³

Tena marina fa ny fandalinana ny Bokin’i Môrmôna dia manasa ny Fanahy, ary ny Fanahy no mpanambara ny fanambarana. Izany dia midika hoe mandalina amin’ny fomba feno fieritreretana sy fandinihana isika—misaintsaina, mivavaka ary angamba mandray an-tsoratra rehefa mamaky isika. Izany dia mahatonga antsika hahafeno ireo fepetra ilaina handraisana fahazavana sy fahatakarana fanampiny, na izany mikasika ny zavatra halalinintsika na mikasika ny zavatra hafa. Indraindray dia manampy ny famakiana ny Bokin’i Môrmôna iray manontolo ao anatin’ny fotoana izay azo lazaina ho fohy mba hahazoana ny hevi-dehibe fonoson’ny tantara sy ny hafatra ao aminy. Fa amin’ny ankapobeny, ny tsara indrindra dia ny manokana fotoana sahaza isan’andro handalinana ny boky raha oharina amin’ny famakiana andininy na pejy izay efa misy isany raikitra isan’andro.

Fanampiana ho an’ny Fandalinana

Sambatra isika ankehitriny fa manana karazam-pitaovana maro izay afaka manampy amin’ny fandalinantsika ny Bokin’i Môrmôna. Ny sasany dia mifamatotra amin’ny soratra masintsika—ny Torolalana araka ny Lohahevitra, ny Rakibolan’ny Baiboly ary ny Fanoroam-pejy araka ny abidia ao amin’ny soratra masina amin’ny teny Anglisy, ary ny Torolalana ho an’ny Soratra masina kosa amin’ny fiteny hafa. Ary isika dia manana fanovozan-kevitra maro ary soratra masina mifandray maro eny amin’ny farany ambanin’ny pejy ao anatin’ireo soratra masina navoakan’ny Olomasin’ny Andro Farany.

Ireo fanampiana hafa amin’ny fandalinana izay vita printy dia ahitana ny Boky Torolalana ho an’ny Mpikambana ao amin’ny Kilasin’ny Sekoly Alahady, ny Boky Torolalana ho an’ny Mpianatra Seminera, ary ny Boky Torolalana ho an’ny Mpianatra Institiota. Ny fitombon’ny fitaovana elektrônika, izay voafaritra eo amin’ny faritra amin’ny sisiny ao amin’ny pejy faha-31 no zava-baovao amin’izao vanimpotoanantsika izao.

Fitaovana ho an’ny Fiovam-po

Ny Bokin’i Môrmôna dia harena sarobidy tsy manan-tsahala sy fitaovana ho an’ny fiovam-po izay namboarin’ny Tompo sy nomeny ho an’izao fotoampitantanana misy antsika izao. Tsapako fa izany no fototry ny fijoroako ho vavolombelona manokana mikasika an’i Jesoa Kristy sy ny antso maha-mpaminany an’i Joseph Smith, ary ny maha “fanjakan’ny Tompo izay naorina indray teto an-tany” ny Fiangonan’i Jesoa Kristy ho an’ny Olomasin’ny Andro Farany.⁴ Faly aho mampiray ny fijoroako ho vavolombelona amin’ny an’i Jesoa Kristy fa “raha velona koa ny Tompon[ao] sy ny Andriamanitr[ao] dia marina izany” (F&F 17:6). Enga anie ny fandalinanao ny Bokin’i Môrmôna mandritra ny androm-piainanao hahalalim-paka ny fiovam-ponao sy hitarika anao amin’ny lalana mivantana mankany amin’ny fiainana mandrakizay.

Ireo Soratra Masina ao amin’ny Internet sy ireo Fitaovana Azo Entina Mandehandeha

Ankoatry ny fanamorana ny hafainganan’ny fikarohana teny sy ny soratra masina mifandray, ny soratra masina ao amin’ny internet (scriptures.lds.org) sy amin’ireo fitaovana azo entina mandehandeha (mobile.lds.org) dia manolotra fomba vaovao maro izay afaka manampy anao amin’ny fandalinanao manokana:

My Study Notebook (Ny Firaketako ny Zavatra Nohalaliniko) (notebook.lds.org)

Izany firaketana ny zavatra noraisina an-tsoratra ao amin’ny internet izany dia manolotra ny ankamaroan’ireo fitaovana izay efa mety nampiasainao tamin’ny fandalinana amin’ny fomba mahazatra—fanasiana marika amin’ny alalan’ny penina miloko, fandraisana an-tsoratra, ary fampifandraisana soratra masina, ohatra —saingy manome fahafahana anao hampiasa sy hitahiry izany amin’ny fomba elektrônika. Ankoatr’izany dia azonao atao ny manisy “mari-pamantarana” izay zavatra noraisinao an-tsoratra sy ireo votoatiny hafa rehefa misy izany. Satria miditra ao amin’ny “My Study Notebook” (Ny Firaketako ny Zavatra Nohalaliniko) amin’ny alalan’ny kaontinao ao amin’ny LDS ianao dia ara-potoana hatrany ireo fanovana ao amin’ny firaketana ny zavatra nohalalininao na firy na firy ny fomba samihafa nampiasainao hidirana ao. Ireo fitaovana ireo dia hahafahanao hamorona ny tahirintsoratrao manokana araka ny lohahevitra ho an’ny fandalinana sy ny fampianarana ny filazantsara.

Ny Soratra Masina amin’ny Endriny sy amin’ny Fiteny Hafa (scriptures.lds.org)

Ny lahatsoratry ny soratra masina noraketina amin’ny fomba elektrônika sy ny raki-peon’ny soratra masina dia dia efa misy ao amin’ny LDS.org ary koa ho an’ireo fitaovana azo entina mandehandeha ankehitriny amin’ny fiteny maro ary efa eny an-dalana koa ny fanatanterahana izany amin’ ireo fiteny maro hafa.

Ankoatra ny famakiana sy ny fihainoana amin’ny Internet dia afaka maka ny lahatsoratra sy ny raki-peo, ny ePub, ary ny lahatsoratra amin’ny endriny PDF ianao any ary afaka mampiasa izany na dia efa nivoaka tsy ho ao amin’ny internet intsony aza. Ireo soratra masin’ny Fiangonana izay nivoaka farany tao amin’ny Internet dia manamora ihany koa ny fizarana amin’ny hafa ireo hafatra sy zavatra noraketina manokana amin’ny alalan’ny e-mail sy ny fitaovan-tserasera eo amin’ny fiaraha-monina.

Ireo soratra masina ao amin’ny LDS.org dia hita amin’ny fiteny 21 amin’izao fotoana izao. Ny zavatra azo ampiasaina ao anatin’ireo fitaovana azo entina mandehandeha dia hita amin’ny fiteny folo eo ho eo, arakaraky ny fitaovam-pifandraisana ampiasaina.

Fanoroana ny tenin’olona ao amin’ny Soratra Masin’ny Olomasin’ny Andro Farany araka ny abidia (scriptures.byu.edu)

Io loharano io, izay novokarin’ny mpampianatra roa avy amin’ny Oniversiten’i Brigham Young amin’ny fiteny Anglisy dia mampifandray andinin-tsoratra masina amin’ny tenin’ny mpaminany sy ireo apôstôly amin’izao andro izao. Ohatra, eritrereto hoe tianao ho fantatra izay olona nampiasa ny 1 Nefia 3:7 nandritra ny fihaonamben’ny Fiangonana. Tsindrio ny lalam-pifandraisana hoe Bokin’i Môrmôna amin’ny ilany havian’ny efijery ary ampidino eo amin’ny hoe 1 Nefia 3 dia ho hitanao eo ny valiny.

Fanoroana ireo Lohahevitry ny Fihaonamben’ny Fiangonana araka ny abidia (conference.lds.org)

Loharano iray manampy anao hampifandray ny fandalinana soratra masina amin’ny tenin’ireo mpaminany velona ny conference.lds.org , izay manolotra lisitra mifototra amin’ny lohahevitra ho an’ny fihaonambe tsirairay an’ny Fiangonana. Ohatra, raha mandalina ny Sorompanavotana ao amin’ny soratra masina ianao dia afaka mahita lahateny dimy izay miresaka izany lohahevitra izany ao amin’ny fihaonamben’ny Fiangonana Volana Aprily 2011.

Mandalina Tsy Tapaka mba Hianaran-javatra Tsy Tapaka

Tamin’ny fotoana voalohany namakiako ny Bokin’i Môrmôna dia tsy mpikambana aho. 16 taona aho tamin’izany ary nahavaky izany tao anatin’ny herinandro. Rehefa akaiky hifarana ny famakiako dia nahita andininy iray aho izay nanamafy fa raha an’i Kristy ny fiangonana iray dia hitondra ny anarany (jereo ny 3 Nefia 27:8). Tamin’izay fotoana izay dia nikoriana tamin’ny takolako ny ranomaso. Nahafantatra aho fa marina ny Bokin’i Môrmôna ary nanapa-kevitra ny hatao batisa.

Taorian’ny batisako dia namaky ilay boky indray aho, saingy tamin’izay dia nividy penina miloko aho ary nanisy marika ny andininy na ny andalana izay nanentana ny fanahiko. Nanao izany hatrany aho tao anatin’ireo famakiako taty aoriana saingy nampiako soratra teo amin’ny sisin’ireo andininy nasiako marika. Ny fotoana nanaraka dia nanampy soratra masina tamin’ireo andininy nifandray tamin’izany aho, na izany avy tao amin’ny Bokin’i Môrmôna na avy tamin’ireo soratra masina hafa.

Avy eo, tamin’ny fiandohan’ny taona iray dia nividy tahadika vaovaon’ilay soratra masina aho, satria ilay nananako dia efa feno fanamarihana, indrindra taorian’ny nampiasako izany nandritra ny asa fitoriako sy nanomanako lesona maro tamin’izany. Tamin’ity indray mitoraka ity dia nifototra tamin’ny lohahevitra ny fandalinako sy ny fanasiako marika. Nanokana loko iray isaky ny lohahevitra manokana aho—ohatra, volomboasary ho an’ny finoana, maintso ho an’ny fibebahana, sy ny sisa.

Rehefa nanohy tsy tapaka nandalina ny Bokin’i Môrmôna aho tamin’ny alalan’ny fampiasana ireo fomba samihafa ireo dia nianatra fa tsy ampy ny famakiana indray mandeha monja ny Bokin’i Môrmôna. Isika dia mianatra andalana anampy andalana rehefa manohy mandalina. Nianatra ihany koa aho fa na impiry na impiry ny efa namakiantsika izany dia hisy hatrany zavatra izay hampiteny antsika hoe: “Naninona no tsy hitako ity teo aloha? Tsy maintsy efa teo io.”

Ireo soratra masina—indrindra ny Bokin’i Môrmôna—dia mampianatra antsika mikasika an’i Jesoa Kristy sy mikasika ny Raintsika any an-danitra. Ny fandalinana ny soratra masina dia nitondra ahy hanakaiky kokoa Azy ireo.

Cristina Vergara Ramírez, Chili

Sary nataon’i Craig Dimond