Raha Tena Te-Hahafantatra Ianao, Dia Hahafantatra Tokoa

Nataon’i Elder Walter F. González

Avy ao amin’ny Fiadidian’ny Fitopololahy

Mahatsapa fankasitrahana tsy manam-pahataperana ho an’ny Bokin’i Môrmôna aho. Nanova mandrakizay ny fiainako izany ary fantatro fa afaka manova ny fiainanao.

18 taona aho rehefa lasa mpikamban’ny Fiangonana. Nanana anjara toerana lehibe teo amin’ny fiovam-poko ny Bokin’i Môrmôna. Tamin’izany fotoana izany dia nikatsaka hevi-baovao izay afaka nanazava ny tontolo manodidina ahy aho. Tsaroako ireo mpampianatro tany amin’ny oniversite izay nampiasa fomba fijery ara-nofo teo amin’ny fampianaran’izy ireo. Nanomboka nitongilana tany amin’ireo hevitra mivoy ny tsy fahafahana manaporofo ny tena fisian’Andriamanitra marina aho.

Indray andro dia nahatsikaritra boky manga tanora iray aho izay navelan’ny misiônera roa tao an-tranonay enin-taona lasa talohan’izany. Bokin’i Môrmôna izany. Niaraka tamin’ilay boky dia namela bokikely mikasika ny Mpaminany Joseph Smith izy ireo ary torolalana ihany koa mikasika ny fomba fivavahana amin’Andriamanitra.

Nanomboka namaky ny Bokin’i Môrmôna aho. Raha vao andininy vitsy monja no vitako tamin’ilay boky, tao amin’ny 1 Nefia, dia nahatsapa zavatra hafa aho. Nanomboka nifandona ny zavatra tsapako sy ny fahaizako. Koa dia nanapa-kevitra ny hanontany an’Andriamanitra ao anatin’ny vavaka aho.

Izay no fotoana voalohany teo amin’ny fiainako nivavahako nandohalika. Ny zava-niseho taorian’izany dia lasa iray tamin’ireo zava-niseho masina indrindra teo amin’ny fiainako. Fahatsapana fifaliana tsy omby tratra no nameno ahy hany ka fantatro tao am-poko fa ny Bokin’i Môrmôna dia mihoatra noho ny hoe boky fotsiny ihany. Boky avy amin’Andriamanitra izany. Tsy azo nihodivirana ny maha-tenin’Andriamanitra azy. Taty aoriana dia takatro fa ilay zavatra tsapako dia ilay Fanahy izay nijoro ho vavolombelona momba ny fahamarinan’izany.

Na dia misy olona sasany niaina zavatra nitovy tamin’izany aza, dia misy fomba samihafa ahafahan’ny olona iray mahafantatra fa marina ny Bokin’i Môrmôna.

Ahoana no Hahafantaranao Izany?

1. Ny sasany dia hahafantatra amin’ny alalan’ny fandrenesana. Ianao dia mety anisan’ireo izay hahafantatra amin’ny alalan’ny fihainoana fotsiny ihany izay ampianarin’ilay boky. Ny Bokin’i Môrmôna dia milaza mikasika ireo olona an’arivony izay nandre ny zanakalahin’i Môsià nampianatra ny filazantsaran’i Jesoa Kristy ary dia “niova fo ho an’ny Tompo” (jereo ny Almà 23:5–6). Ireo misiônera ankehitriny dia mampianatra izany filazantsara izany ihany izay hita ao amin’ny Bokin’i Môrmôna. Ny sasany dia hahafantatra fa ny Bokin’i Môrmôna dia tenin’Andriamanitra amin’ny alalan’ny fandrenesana fotsiny ihany ny hafa mizara ny fampianarana ao aminy.

2. Ny sasany dia hahafantatra amin’ny alalan’ny famakiana. Mety anisan’ireo izay hahafantatra amin’ny alalan’ny famakiana tsotra fotsiny ny Bokin’i Môrmôna ianao miaraka amin’ny faniriana marina ny hahafantatra ny fahamarinana. Izany no nitranga tamin’ny vadiko. 12 taona izy rehefa nandray am-po ilay torolalana mba hamaky ilay boky hatrany amin’ny voalohany ka hatrany amin’ny farany. Rehefa nanao izany izy dia nahafantatra fa marina izany. Tena nahery vaika ilay fahatsapana ka rehefa namaky izy dia nanapa-kevitra ny hanaraka ny Mpamonjy mandrakizay. Nijoro foana tamin’ny zavatra tsapany izy.

3. Ny sasany dia hahafantatra amin’ny alalan’ny fanatanterahan-javatra. Mety anisan’ireo izay hahafantatra amin’ny alalan’ny fanaovana ireo zavatra izay ampianarin’ilay boky fotsiny ihany ianao. Ny olona sasany dia mahazo ny fijoroana ho vavolombelon’izy ireo amin’ny alalan’ny fanatanterahan-javatra (jereo ny Jaona 7:17). I Nefia, mpaminany iray ao amin’ny Bokin’i Môrmôna dia nahatakatra tsara izany fitsipika izany. Nanoratra izy hoe mba “hahazoako mandresy lahatra tanteraka azy ireo ka hinoany ny Tompo Mpanavotra azy ireo … [dia] nampihariko taminay ny soratra masina rehetra, mba ho tombontsoanay sy ho fianarana ho anay” (1 Nefia 19:23; nampiana fanamafisana). Amin’ny alalan’ny fampiharana ireo fampianaran’ny Bokin’i Môrmôna eo amin’ny fiainanao dia mety ho resy lahatra ihany koa amin’ny maha avy amin’Adriamanitra azy ianao.

4. Ny sasany dia hahafantatra amin’ny alalan’ny fanontaniana an’Andriamanitra. Ianao dia mety anisan’ireo izay hahafantatra amin’ny alalan’ny famakiana avy ao amin’ny Bokin’i Môrmôna ary avy eo manontany ny Ray any an-danitra ao anatin’ny vavaka raha toa ka marina ny boky. Izany no zavatra niainako. Izany no fampanantenana tsara indrindra izay nataon’ny mpaminany iray hafa ao amin’ny Bokin’ i Môrmôna dia i Môrônia, ho an’ireo mpikatsaka ny fahamarinana amin-kitsimpo rehetra: “Indro, ta hamporisika anareo aho, rehefa mamaky ireto zavatra ireto ianareo … mba hanontanianareo an’Andriamanitra, Ilay Ray Mandrakizay, amin’ny anaran’i Kristy, raha tsy marina ireto zavatra ireto; ary raha manontany amin-kitsimpo ianareo, omban’ny tena finiavana, sady manam-pinoana an’i Kristy, dia haneho ny fahamarinan’izany aminareo Izy amin’ny herin’ny Fanahy Masina” (Môrônia 10:3–4). Mijoro ho vavolombelona aho fa raha mamaky sy mivavaka mikasika ny Bokin’i Môrmôna ianao, sy manaraka ny torolalan’i Môrônia dia ho fantatrao fa marina izany.

Andriamanitra dia Nampanantena fa Hahafantatra Ianao

Raha tena te-hahafantatra ianao dia hahafantatra fa marina ny Bokin’i Môrmôna. Andriamanitra dia nampanantena fa hanome izany fahalalana izany an’ireo mpikatsaka marina ny fahamarinana, ary Izy dia “Andriamanitry ny fahamarinana, ary tsy afaka mandainga” (Etera 3:12).

I Almà, mpaminany iray hafa ao amin’ny Bokin’i Môrmôna dia nampianatra ny zanany lahy fa Andriamanitra dia nampanantena fa “hotsimbininy [ity boky ity] noho ny fikasana hendry ao Aminy mba hahazoany maneho ny heriny amin’ny taranaka ho avy. Ary ankehitriny, indro, fikasana iray no efa notanterahany, dia ny fampodiana indray ny aman’arivony … ho amin’ny fahalalana ny marina; ary efa nasehony tao amin’izy ireo ny heriny ary mbola hasehony ao aminy koa ny heriny ho an’ny taranaka ho avy; koa hotsimbinina [ity boky ity] (Almà 37:18–19).

Izany hery mandresy lahatra izany ihany no hita ankehitriny ao amin’ity soratra masina manokana ity, ary haneho izany amin’izay mikatsaka amin-kitsimpo ny hahafantatra. Afaka miteny izany tsy amim-pihambahambana aho rehefa manao jery todika ireo andro izay nianarako mikasika ny Fiangonana. Ankehitriny, noho ny hery mandresy lahatry ny Bokin’i Môrmôna dia mijoro ho vavolombelona aho fa ny Bokin’ Môrmôna dia tenin’Andriamanitra, izay mampianatra fa i Jesoa no Kristy, Ilay Mesia Masina. Porofo azo tsapain-tanana ilay boky fa nitranga ny Famerenana amin’ny laoniny ny filazantsara ary i Joseph Smith dia mpaminan’Andriamanitra.

Raha anisan’ireo izay mikatsaka amin-kitsimpo ny fahamarinana ianao, dia nampanantena ny Tompo fa hahafantatra ianao. Mety hahafantatra amin’ny alalan’ny fihainoana ireo fampianaran’ilay boky ianao, na amin’ny alalan’ny famakiana ilay boky, na amin’ny alalan’ny fanantanterahana izay ampianarin’ilay boky, na amin’ny alalan’ny fivavahana mba hahafantatra ny fahamarinany, na amin’ny alalan’ny fitambaran’ireo singa ireo. Saingy hahafantatra ianao.

Fampanantenan’i Môrônia

Tany amin’ny faran’ny Bokin’i Môrmôna dia nampanantena ny mpaminany iray antsoina hoe Môrônia fa raha mamaky ny Bokin’i Môrmôna isika ka misaintsaina ao am-pontsika ny hafatra entiny, ary manontany ombam-bavaka amin’Andriamanitra raha marina izany dia hamaly antsika amin’ny alalan’ny herin’ny Fanahy Masina Andriamanitra (jereo ny Môrônia 10:3–5).

Ny fanambarana manokana dia an’ny tena manokana. Tonga amin’ny fomba samihafa sy amin’ny fotoana samihafa eo amin’ny tsirairay amintsika izany araka ny sitrapon’ny Tompo. Ny fahatakarana ireto fitsipika manaraka ireto dia afaka manampy anao hahafantatra ho an’ny tenanao manokana.

1. Eritrereto izany

Alohan’ny fanasana antsika hivavaka dia manasa antsika hisaintsaina i Môrônia. Ny atao hoe misaintsaina dia midika hoe mieritreritra lalina. Manontania tena hoe: Inona no zavatra tsapako rehefa mamaky ny Bokin’i Môrmôna aho? Maninona aho no mahatsapa izany? Inona no nianarako? Tsara ve izany?

Ny Tompo dia nampianatra ity fitsipika ity an’i Oliver Cowdery hoe: “Tsy nanana eritreritra afa-tsy ny hangataka izany Amiko ianao. Nefa indro, lazaiko anao, fa tokony handinika izany ao an-tsainao ianao; rehefa izany dia tokony hanontany Ahy ianao raha marina izany” (F&F 9:7–8; nampiana fanamafisana).

2. Mivavaha Amim-pahazotoana

Ny fampifantohana ny eritrerintsika sy ny fifantohana amin’ny valinteny mangina avy amin’ny Fanahy Masina dia mitaky ezaka ara-tsaina. Amin’ny lafiny iray, izany angamba no nahatonga an’i Enôsa ao amin’ny Bokin’i Môrmôna hilaza mikasika ny vavaka nataony ho toy ny “tolona … teo anoloan’Andriamanitra” (Enôsa 1:2).

Rehefa mamaky na misaintsaina na mivavaka ianao dia mitadiava fotoana na toerana izay tsy ahitana araka izay azo atao zavatra mahavarimbariana. Mitadiava fomba fipetraka izay hanampy anao hifantoka. Ny fivavahana amin’ny feo avo dia afaka manampy anao hampifantoka ny eritreritrao.

3. Mametraha Fanontaniana Tokony Hapetraka

Ny Tompo dia niteny an’i Oliver Cowdery mba tsy hanontany fotsiny fa kosa hanontany raha marina ilay zavatra noeritreretiny. Matetika, indrindra rehefa tsy ampy traikefa isika amin’ny fandraisana valiny avy amin’ny Ray any an-danitra dia mora kokoa ny mahatakatra ny valiny amin’ny alalan’ny eny na tsia tsotra fotsiny.

“Ny fanalahidy irain’ny vavaka mivoatra dia ny fianarana mametraka ny fanontaniana tokony hapetraka,” araka ny fampianaran’ny Loholona Richard G. Scott avy ao amin’ny Kôlejin’ny Apôstôly Roambinifolo.¹

4. Inona no Kasaina Hatao Amim-piniavana?

Ny iray amin’ireo fanalahidin’ny fampanantenan’i Môrônia dia ny mba hanontaniantsika miaraka amin’ny “tena finiavana.” Rehefa nandeha tany amin’ilay ala kely mba hivavaka i Joseph Smith tamin’ny faha-14 taonany dia “nivavaka izy, tsy niaraka tamin’ny finiavana ny hihaino fotsiny ihany fa ny hankato koa,” hoy ny Filoha Henry B. Eyring, Mpanolotsaina Voalohany ao amin’ny Fiadidiana Voalohany. “… Ary noho ny fahatokiany, tao anatin’ireo andro sy volana ary taona taty aoriana dia novaliana tamin’ny alalan’ny fandrotsahana fahazavana sy fahamarinana miavosa ny vavaka nataony.”²

5. Aza Avela Handalo Izany

Tsy hoe mampitolagaga daholo ny fanambarana rehetra. Ny olona sasany dia manofy na mahita fahitana na misy mitsidika. Saingy ny ankamaroantsika dia hiaina zavatra tony sy misoko mangina, toy ny fahatsapana hafanana sy fiadanana.

Ny Filoha Spencer W. Kimball (1895–1985), Filohan’ny Fiangonana faha-12 dia nampianatra fa “Rehefa miandrandra zavatra mampitolagaga ny olona iray dia mety tsy ho malina tanteraka amin’ny fitobahan’ny fanambarana tsy tapaka.”³

Ahoana no Ahafantarako

Na dia natao batisa tamin’ny fahasivy taonako aza aho dia tsy nazoto niangona ny fianakaviako. Saingy rehefa 13 taona aho dia nanasa ahy handeha hiangona ireo misiônera, ary nataoko izany. Nanatrika seminera ihany koa aho. Ny Fotopampianarana sy ny Fanekempihavanana no taranja nianarana, izay toa nampisavorovoro ny saiko. Nanana fahasahiranana manokana aho nikasika an’i Joseph Smith sy ny Bokin’i Môrmôna. Te-hahita an’Andriamanitra aho, saingy tsy fantatro tsara hoe amin’ny fomba ahoana na hoe aiza.

Rehefa nandeha ny fotoana dia nieritreritra be mikasika ireo resaka nifanaovana tamin’ireo misiônera aho. Nieritreritra mikasika ny seminera aho. Nieritreritra ireo resadresaka nifanaovako tamin’ny mpikamban’ny finoana Kristiana hafa aho. Indraindray dia nivavaka aho mba hahafantatra izay marina, saingy toy ny eritreritra mandalo kokoa izany noho ny fanontaniana amin-kitsimpo. Ary indray alina dia nanapa-kevitra ny hivavaka omban’ny “tena finiavana” aho.

Nilaza tamin’ny Ray any an-danitra aho fa te-hahafantatra Azy sy te-ho mpikamban’ny Fiangonany marina. Nampanantena aho hoe: “Raha ampahafantarinao ahy hoe mpaminany marina ve sa tsia i Joseph Smith ary marina va sa tsia ny Bokin’i Môrmôna dia hanao izay zavatra rehetra tianao hataoko aho. Raha ny Fiangonan’i Jesoa Kristy ho an’ny Olomasin’ny Andro Farany no Fiangonana marina dia hanaraka izany aho ary tsy handao izany na oviana na oviana.”

Tsy nahita fisehoan-javatra nampitolagaga aho, saingy nahatsapa fiadanana ary dia nandeha natory. Ora maro taty aoriana dia nifoha niaraka tamin’ny eritreritra miavaka aho hoe: “I Joseph Smith dia mpaminany marina, ary ny Bokin’i Môrmôna dia marina.” Narahina fiadanana tsy hay faritana ilay eritreritra. Natory indray aho, ary nifoha taty aoriana kely niaraka tamin’ilay fahatsapana sy eritreritra teo ihany.

Nanomboka tamin’izay fotoana izay dia tsy niahiahy na oviana na oviana aho fa i Joseph Smith dia tena mpaminany marina. Fantatro fa asan’ny Mpamonjy ity ary ny Ray any an-danitra dia hamaly ireo fangatahantsika natao tamin-kitsimpo.

Rodolfo Armando Pérez Bonilla, El Salvador