Klumech er a Oldingel e Olisechakl, Ongeteruich el Buil 2011

Alsekum Eng Diak Doumededenger

Julie B. Beck, merreder er a cherrengelel omerreder er a Relief Society.

Mosuub er tial klumech, ea di lungil, e msodii lobengterir a rodos el moldingel er tir. Mousbech aikel ker el smisicheterir a rodos e dirrek el rullii a Cheldebechel er a Rolngeseu meng mo klou a belkul er a klengar kau.

Klaumerang • Telungalek •Ngeseu

Chelsel a Babier er a Mormon e kede menguiiu el kirel a okesiu er a rengeasek el sechal el tir a kmal mle mesisiich a klaumerang er tir, dimlak el medakt, e mle mesisiich. “Oi, tem le mui ra klemerang ma blekeu, ele tir el mla mosisechakl el mo oltirakl a llechul a Dios e mo ultuill er ngii” (Alma 53:21). Tirkal mesisiich a rengrir el ngeasek el sechal a chemat er a rederrir—el okesiu e sensei el mor tir.

Tirkal derrir a resoldau er a Helaman a kiliei ra taem el diak el sal kuk ngodech er tial dengarngii. A teletael el tir a mlara chelsel a mle meringel e kengaol, e tirkal ngeasek el ngelekir a mlokedong el mo mesebechakl er tir ma klechelid er tir. Chelechal sils e kede kiei el diak de ngara ringel “ra teletael ra mekemad, ng bai ringel ra ultok ra osisechakl, ultok ra klisiich, ma ultok el kirir a remerredelel a iilkolk er tial beluulechad, ma ultok el kirel chedaol tekoi” (Efesus 6:12).

Meng meringel el siokel a remesisiich el chedam ma chedil el tir a mo olisechakl aikel klemerang el resoldau ra Helaman a mle medengei: “El sekum eng diak loumededenger, ea Dios a mo sobechekelterir” (Alma 56:47). A osischeklel ma okesiul tial klemerang er chelechal sils a ultuil ra blak el reng. Eng di, ng diak el kired el medakt. Sel dodengei el kmo kede techang e do dengelii a Dios e bla desiseb ra chelsel a telbiil Lobengkel, e kede—mo uaia tirkal derrir tirkal soldau—el mo obdois a ungil tekoi el deruul.

Me ngoumesingd, el derstang er tirkel erung el telael ma okolem el soldau ra Helaman a mlosisechakl ra chedil. Eng di tirkal chedil a dimlak di loruul el merekong. Me te ulebengterir a remelemalt el sechal ma redil, e tirkal chedil a mlo kaukledem ra klaumerang ma okesiu el molisechakl ra klisichel a telbiil. Tirkal ngeasek el chad er sel taem a mle medengelii a telbiil el demerir ma rederrir a mla soiseb ra chelsel el diak bo lomuchel a mekemad. Me sera lomes el kora dikea el sebechel, ea oubeltik el reng el Chedam ra Babeluades a milkengii a rael el mo sebecherir tirkal chedam ma recchedil el oltirakl a telbiielir—e mekerreuii a iilmokl el tir a ngara chelsel (mesa Alma 56:5–9). Kid meng dirrek el kired el otirakl a telbiieled ma rengalk ma rengeasek—a rengeleked me tirkel ngara ward el de ngarngii, branch, tonari, ma beluu—a mo medengei e oldubech a otireklel a telbiil.

Sel doltirakl a telbiieled, ea Chedam er a Babeluades a sebechel kudmeklii a rael el kired. Ng kired el mo bleketakl e meral oltirakl a telbiieled. Ng sebeched, lokiu okesiu, el mo bleketakl ra nglunguched, omengiuel chedaol llechukl, obang a beches el babier ra mo soiseb ra templo, mo ungil a doubail, e mengull ra chedaol sils. Sel bo de uaisei, ea rengeleked a mo medengei e mo sebecherir el kmo, “Ng diak ki moumededenger ele redelemam a mle medengei” (Alma 56:48).

A Ruriul-klebesei el Santo el redil el tir a medengei el kmo a klisichir a ultuil ra Tngakireng ra Rubak a diak el kimer ra chelsel aikel meringel e chetituokel el taem ra klengar tir. Me kid el oltirakl a telbiil, e kede mesisiich el mengeluolou, omekerreu, e omecheliu ra rengalk ma rengeasek ma tara klebesei eng sebeched el kmu er tiaikid el telcheroll el kmo, “Ng dirkak a tal kisang a mesisiich el blekeu, oi, ra chelsir el rokui” (Alma 56:45).

Ngara Chedaol Llechukl

Alma 53; 56–58

© 2011 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/10. Kengei er a oidel: 6/10. Oidel a Visiting Teaching Message, October 2011. Palauan. 09770 881

Ngerang Sebechek el Rulii?

Ak mekerang e ngosuterir a rodos er ngak el mo medengelii e mo ngara omeruul el mo melisiich aikal merael mei el telcheroll?
Ngera el chedaol osisechakl ak betik ra chelsel a Babier er a Mormon el ngii a nger ra ikel ringel el chelebangel er chelechal sils?