Iren Mahsen en Presidensi Keieu, Tihsempe 2011
Pilipil en Kin Kalahngan
Samatail Nanleng poahngoangkihieng kitail en kin kasapahlkalahngan nan mehkoaros (tehk 1 Deselonika 5:18), oh E ketin kupwurki kitail en kasapahlkalahnganki kapai kan me kitail alehdi (tehk D&C 46:32). Kitail ese me sapwellime kosonned akan koaros koasoandi pwehn wiahda kitail en peren, oh kitail pil ese me en kawehla kosonned akan kin elehieng nsensuwed.
Eri, pwe kitail en peren oh dehr nsensuwed, kitail anahne ahniki mohngiong kalahngan. Kitail kilangehr nan atail mour me kalahngan oh peren kin dokpene. Kitail koaros men pehm kalahngan, ahpw e sohte mengei en kin kalahnganki mehkoaros nan kasongosong kan en mour. Soumwahu, nsensuwed, oh mehlahn aramas me kitail poakohng kin mie ansouih nan atail mour. Atail pahtou kan kak elehieng en apwal en kasawihada atail kapai kan oh en kapingki kapai kan me Koht ketin neknekidohng kitail ong ehu rahn.
E apwal en pahngada atail kapai kan pwehki kitail aramas kin kalapw angamwahukihla soahng kan me mwahu nan atail mour. Ni ansou me sohla imwatail, kenetail mwenge, de limpoak en kompoakapah kan oh peneinei, kitail kin tamanda uwen atail konehng kalahnganki ni ahr miehte rehtail.
Me keieu, ekei pak e apwal kitail en kin kalahnganki ni itar kisakis kan me keieun laud me kitail kin alehdi: ipwidien Sises Krais, Sapwellime Tomwo, inou en iasada, ansou mwahu en ahniki mour soutuk rehn atail peneinei kan, Kopwurupwurdohn rongamwahuo iangahki priesthood oh kih kan en priesthood. Ihte sang ni sawas en Ngehn Sarawi me kitail pahn kak tepida pehm wehwehn kapai pwuko ong kitail oh irail akan me kitail poakohng. Oh ihte ansouo me kitail pahn kak koapwoaroapwoarki en kin kalahnganki soahng koaros oh sohte dipikihda ong Koht sohte kalahngan.
Kitail anahne peki ni kapakap me Koht, sang ni manaman en Ngehn Sarawi, pahn ketin sewese kitail en kilang atail kapai kan ni sansal lella nan eilepen atail kasongosong kan. E kak ketin sewese kitail sang ni manaman en Ngehn Sarawi en kasawihada oh en kalahnganki kapai kan me kitail kin angamwahukihla. Me keieu seweseie iei en peki rehn Koht ni kapakap, “Komw kalahngan oh ketin kaweidkinie emen me I kak patohwan sewese ong Komwi?” Iei ni sewsewese Koht ketin kapaiada mehteikan me I kin kilang ahpwete mwahu pein ahi kapai kan.
Ehu ansouo ahi kapakap pasapengla ni ansou me pwopwoud ieu me I sohte ese lukeie I en kohla ni imwen wini ieu. Wasao I diarada seri pwelel men me uwen eh pwidikidik e itar nan pehie. Nan wihkte depe en eh mour, e koadoahkehr pak tohto. Toahkte kan ndahiongehr pahpa nohno me koadoahk me ahpwete apwal pahn anahn ong mohngiong oh ngolungol pwehn kolokol mour en sapwellimen Koht kisin serio.
Sang ni pekipek en pahpa nohno, I kihong serio ehu kapai en priesthood. Kapaio iangahki inou ieu en mour eh pahn kareireila. Laudsang kihda kapai ieu, I alehdi kapai ehu ong pein ngehi me iei mohngiong me ahpwete kalahngan.
Sang ni sawas en Samatailo, kitail koaros kak pilada en pehm ahpwete laudilahn kalahngan. Kitail kak peki Reh en ketin sewese kitail en kilang ni ahpwete sansal atail kapai kan, sohte lipilipil irair me kitail mih loale. Ong ie rahno, I kalahnganki laudsang mahs manaman en pein ahi mohngiong oh ngolungol ahr wie doadoahk. Ni ei pwurpwurala nihmweio I kasapahlkalahnganki kapai kan ong nei serihkan me I uhd kilangehr ni ahpwete sansal me iei manaman kan en kadek sang Koht oh sang aramas mwahu kan me kapil irail.
Mwohn mehkoaros, I pehm kalahngan pwehki sansalepen Tomwo me wie doadoahk nan mour en pahpa nohno pwunodo oh nan pein ahi mour. I kilangehr koapwoaroapwoar oh limpoak unsek en Krais maramarain nan mesara kan, mendahte ara kasongosong laudo. Oh I pehmada mehn kamehlel me kumwail kak pehm ma kumwail pahn peki rehn Koht en ketin kasalehiong kumwail me Tomwo kak mweidehng kumwail en pehm koapwoaroapwoar oh limpoak.
Kitail koaros kak wiahda pilipil en kasapahlkalahngan ni kapakap oh en peki rehn Koht kaweid pwehn papah mehteikan ong Ih—ni mehlel nan ansou wet en pahr me kitail kin kawahuih ipwidien Sounkomouro. Koht Sahm ketkihda Sapwellime Iehros, oh Sises Krais ketkihong kitail Tomwo, me keieun laud en kisakis koaros oh tiahk sapan koaros (tehk D&C 14:7).
Kasapahlkalahngan ni kapakap kak mweidehng kitail en kilang uwen laud en kapai pwukat oh koaruhsiehn atail kapai teikan oh kitail eri pahn alehdi kisakis en mohngiong me ahpwete kalahngan.
© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen First Presidency Message, December 2011. Pohnpeian. 09772 885
Padapadahk sang Nan Iren Mahsen Wet
Ntintingihdi duwen irair kan me kitail lelohng oh atail kapai kan pahn sewese kitail en tamataman oh pahn kihong kitail mehkot en pwurehng tehngkisapahl. Medewe en peki rehn irail akan me komw kin padahkih en ntingihdi dahme irail kalahnganki—pwehn sewese irail taman kapai kan me irail alehdier, kasawiada kapai kan en ansou wet, oh kaskasik kapai kan en ehu rahn.
Komw pil kak koangoange irail akan me komw kin padahkih en idawehn karasaras en President Eyring ni patohwan peki rehn Sahm Nanleng en ketin kaweidkiniraillahng emen me irail kak sewese de papah.