Bin Somm’on e Mulwol ko Presidency, December 2011
N’en ni Ngan Rrin’ ni Ngan Falfalen’ Ngay
Chitamangdad nu Tharmiy e ma yoeg ngodad ni ngad falfalen’ gad ko gubin ban’en (muguy ko 1 Thessalonians 5:18), ma be tay ni ngad pininged e magar ni fan ko pi tawa’ath ni be yog ngodad (muguy ko D&C 46:32). Gadad manang ni gubin e pi motochiyel Rok e nge falfalen’ nag dad, ma ku gadad manang ni gadad ra kirban’ ni fa’anra ngan togpluw ko pi motochiyel.
Ere fa’anra ngan falfalen’ man palog ko tagan, ma ngari mangil e gumircha’dad. Kad guyed ni lane yafas rodad e ma paer u thilin e falfalen’ nge magar. Gadad gubin ma gadad ba adag ni ngan falfalen’, ma dani moem ni ngan falfalen’ ko gubin e magawon u lane yafas rodad. M’ar, kirban’, nge picha’an nib tu’uf rodad nike yim’ e yugma buch u lane yafas rodad. Kirban’ rodad e rayog ninge momaw’ nag ngodad ni ngad guyed e pi tawa’ath rodad man falfalen’ ko pi tawa’ath rok Got nire tay nga lane yafas rodad nga m’on.
Ba momaw’ ni ngan tha’eg e tawa’ath rodad ya gathi gadad be tay’fan e tin nib mangil . Napan ni dakriy e na’un rodad, gaan ni ngan kay, fa magar ko tafagar nge tabinaew, ma gadad nang gelngin ni gadad ba falfalen’ u napan ni bay rodad.
Baga’ ni, boechingiyal’ ma ba momaw’ ngodad ni ngan falfalen’ ko bin tha’abi mangil e tawa’ath ni bea yog ngodad: Yesus Kristus nni gargel nag, Bayul Rok, n’en ni kanog ko foskoyam’, nge gelngin ni ngan falfalen’ ko yafas nib manechubog ko tabinaew rodad, fare gospel ni kan Fulweg nibay e priesthood riy nge pi kiy riy. Kemus ni fare Kan ni Thothup e rayog ni nge ayuweg dad ni ngad tabab gad i thamiy e pi tawa’ath nem nib ga’fan ngodad nge picha’an nib tu’uf rodad. Ma kemus ni arame rayog ni ngad athapeged ni ngad falfalen’ gad ko gubin ban’en ma dabin balyang nigey ngan kireb nag Got.
Ngarin fithed u lane meybil ni Got, ko gelngin fare Kan ni Thothup, e ra ayuweg dad ni ngad guyed e pi tawa’ath rodad nib fal’ rogon u fithik e magawon rodad. Rayog ni nge ayuweg dad ko fare gelngin fare Kan Thothup ni ngan poey man falfalen’ ko pi tawa’ath ni be fal’ wathan dad ngay. N’en ni kari ayuwegneg nib alamrin e ngan fith Got u lane meybil, “Wenig rayog ni ngam pi’yeg ngak bee’ ni rayog ni ngug ayuweg ni pa’am?” Ran ayuweg Got ni ngan fal’eg wathan boech e gidii’ e kuguy e tirog e tawa’ath nib fal’ rogon.
Ke buch e meybil rog biyay napan ni pin ngeg l’agruwi mabgol ni danug nang ko mini’ ni ngug waen nga aspital. Urom muguy bochi bitir ni rib achig ni rayog ni nge taw nga lan pa’ag. In e wik u lane yafas, ma ke yaen u fithik boech e surgery. Ke yoeg fapi togta ko fare gal labthir ni rib momaw’ e surgery nib tu’uf ko gumircha’en nge wor’rom’ ni dabi yim’ e re bitir nem rok Got.
Me non fare galabthir, mug yibliy fare bitir ko fare priesthood. Kan yibliy nib mu’un e yafas rok ninge ululeg. Gathi kemus niku yibliy, ya ke yog e tawa’ath ngog ni gub falfalen’ u lan gumircha’eg.
Gadad gubin ma rayog ninge mel’eg ninge thamiy e falfalen’, nibay e ayuw rok e Chitamangdad riy. Rayog ni ngad fithed Ngak ni nge ayuweg dad ni ngad guyed e tawa’ath rodad nib fal’ rogon, demtrug rogon e magawon rodad. Gag rog ma re raan nem, dariy biyay nike buch rog ni kug falfalen’ um’on nike buch e biney ko gumircha’eg nge wor’rom’ rog nibe murwel nib fal’ rogon. Gube pining e magar napan ni gube sar nga tabinaew ni fan ko tawa’ath rok e bitir rog ni gube guy nib fal’ rogon nike buch ni bachane gol rok Got nge gidii’ nib mangil nib liyeg rad.
Machane, ku falfalen’ ni fan ko n’en nike buch ko fare Bayul nibe muruwel u lane yafas ko re gal labthir nem nge gag. Kuguy e athap nge tu’ufeg rok Kristus nibe galgal ram’en u owchen row, mus ni yaed be magawon. Ma ku thamiy ni rayog ningam thamiy fa’anra gara fith Got ni nge dag ngom ni fare Bayul e rayog ni nge n’angginem ngam thamiy e athap nge adag.
Gadad gubin ma rayog ni ngan pining e magar u lane meybil man fith ku Got e kanawo’ ni ngan ayuweg boech e gidii’ ni fan Ngak—ni baga’ ni napan e biney e duw napan ni gadad be rrin’ ban’en nib mangil ni fan ko ngiyal’ ni kan gargeleg fare Tathapeg. Got ni Chitamangiy e ke pi’ Faak, me Yesus Kristus e ke pi’ ngodad fare Bayul, bin tha’abi mangil e tawa’ath ni kan pi’ (muguy ko D&C 14:7).
Pining e magar u lane meybil e rayog ni nge pag dad ni ngan guy e pi tawa’ath ney nge gubin e pi tawa’ath rodad nge tawa’ath nib falfalen’ nibe yog ngodad.
© 2011 ko Intellectual Reserve, Inc. Gubin ni mat’won ma bay. Nni yoloey u Mariken. Kan micheg ko thin nu Ngalis: 6/10. Micheg nag i Pilyeg: 6/10. Ni pilyeg ko First Presidency Message, December 2011. Yapese. 09772 905
Tin ni yibe Fil ko Biney e Mulwol
Yoloey nga but e pin’en nike buch rodad nge pi tawa’ath ni rayog ni nge ayuweg dad ni ngad tafneyed gadad rodad me pi’ ngodad ban’en ni ngan sul ngay. Fith e picha’an ni gama sensey nag ni ngan yoloey e n’en ni yaed falfalen’ ngay—ni nga ayuweg raed ni ngar tafneyed ko fapi tawa’ath ni keyog ngorad, man poey fapi tawa’ath e daba’, man sap ko tin tawa’ath ni bay yib nga m’on.
Ku rayog ni ngam ayuweg e picha’an ni gabe sensey nag ni ngan leak e n’en nima rrin’ President Eyring ni ngan fith e Chitamangiy nu Tharmiy ni nge sapeg raed ngak bee’ ni rayog ni ngar ayuweged.