Ngaahi Talanoa ʻo Sīsuú
ʻOku Akoʻi Mai ʻe he Tohi ʻa Molomoná ʻo kau Kia Sīsū Kalaisi
ʻOku fakamatalaʻi mai e Fuakava Motuʻá ʻo kau kia Sīsū Kalaisi ki muʻa peá Ne haʻu ki he māmaní. Naʻe ui ia ko Sihova. Naʻe fakamatalaʻi ʻe he Fuakava Motuʻá e kakai ne muimui kia Sihová.
Ko e Fuakava Foʻoú ko ha tohi folofola ia ʻokú ne fakahaaʻi mai kiate kitautolu e moʻui ʻa Sīsū he māmaní. Naʻe tohi ʻe Heʻene kau ākongá ʻo kai ki Heʻene moʻuí mo ʻEne ngaahi akonakí.
ʻOku toe ako mai foki e Tohi ʻa Molomoná ʻo kau kia Sīsū Kalaisi mo e kakai naʻe muimui kiate Iá.
Naʻe kamata e Tohi ʻa Molomoná ʻi Selusalema lolotonga e taimi ʻo e Fuakava Motuʻá, ko e meimei taʻu ia ʻe 600 ki muʻa pea toki ʻaloʻi mai ʻa Sīsuú. ʻOku fakamatala ai kau kia Līhai mo hono fāmilí mo ʻenau fononga ki he fonua ʻo e talaʻofá, ʻa ia naʻe mamaʻo ʻaupito ia ʻi he ʻōsení ʻi he Maama Foʻoú.
Naʻe akoʻi ʻe he kau palōfita ʻo e Tohi ʻa Molomoná ʻe hāʻele mai ʻa Sīsū ki he māmaní. Naʻa nau toe akoʻi foki ʻe maʻu e fiefiá ʻi he fakatomala pea muimui kia Sīsū Kalaisí.
Hili hono tutuki pea toetuʻu ʻa Sīsū ʻi Selusalemá, naʻá Ne ʻaʻahi ki he Maama Foʻoú ʻo akoʻi e kakaí. Naʻá Ne akoʻi e papitaisó, sākalamēnití, mo e anga e ʻofa ki he niʻihi kehé. Naʻá Ne fokotuʻu ha siasi pea tuku ki ai ha kau ʻAposetolo ʻe toko hongofulu mā ua. Naʻá Ne ʻomi e fānaú ʻo tāpuakiʻi kinautolu, ʻo hangē ko ia naʻá Ne fai ʻi he Fuakava Foʻoú.
Naʻe vahevahe ʻe he kau palōfita ʻo e Tohi ʻa Molomoná ʻenau fakamoʻoni kia Sīsū Kalaisí, ʻo hangē pē ko e kau palōfita ʻi he Tohi Tapú.
Ko Molonai ʻa e palōfita fakamuimuitaha ʻi he Tohi ʻa Molomoná, ʻa ia naʻe moʻui he taʻu ʻe 400 hili e ʻaʻahi atu ʻa Sīsū ki he Maama Foʻoú. Naʻe tohi ʻe Molonai ki muʻa peá ne pekiá ʻe lava ke ʻilo ʻe he taha kotoa pē ʻokú ne lau e Tohi ʻa Molomoná hono moʻoní kapau te ne lotu ʻi he tui. Naʻe fakaafeʻi ʻe Molonai ʻa e taha kotoa pē ke “haʻu kia Kalaisi” (Molonai 10:32).
ʻE lava foki e fānau ʻi he ʻaho ní ʻo lotu ke nau maʻu ha fakamoʻoni ki hono moʻoni ʻo e Tohi ʻa Molomoná pea ko Sīsū Kalaisi ʻa honau Fakamoʻuí.
Naʻe mamata e tokoua ʻo Sēletí kia Sīsū Kalaisi.
Naʻe ongo mai e leʻo ʻo e ʻEikí ki he ʻatamai ʻo ʻĪnosí ʻi he taimi naʻe lotu aí.
Naʻe mamata ʻa Līhai kia Sīsū Kalaisi ʻi ha misi pe meʻa-hā-mai.
Naʻe akoʻi ʻe he Tuʻi ko Penisimaní ʻa e kakaí ʻo kau ki he Fakalelei ʻa Sīsuú.
Toʻohemá: tā fakatātaaʻi ʻe Robert T. Barrett; toʻomataʻú: tā fakatātaaʻi ʻe Paul Mann mo Gary Kapp