Mei he Malaʻe Ngāue Fakafaifekaú
Naʻe Fakatou Tali ʻe heʻOtuá ʻA e Ongo Lotú
Lolotonga ʻeku ngāue fakafaifekau ʻi Tulango ʻi Mekisikoú, naʻe fakatukupaaʻi ʻe homau palesiteni fakamisioná homau misioná ke ʻai ha “uike ʻo e feilaulau.” Naʻá ne kole mai ke mau toe feinga lahi ange ʻi he tuʻunga angamahení pea ngāue mālohi ʻo fokotuʻu ha ngaahi taumuʻa pau lolotonga e uiké. Naʻá ma tui mo hoku hoá kapau te ma feilaulau he founga ko ʻení, ʻe tāpuekina kimaua ʻe he ʻEikí pea te ma maʻu ha kakai tokolahi ke akoʻi.
Neongo iá, lolotonga e uike feilaulaú, naʻe ʻikai pē ke ola lelei. Naʻá ma lotomamahi he naʻe ʻikai ke ma maʻu ha fāmili ke akoʻi.
ʻI ha pongipongi ʻe taha hili e uike ko iá, naʻá ku sio mo hoku hoá ki he mape homa ʻēliá. Naʻe fuʻu lahi ʻaupito homa ʻēliá, ka naʻá ma ongoʻi ʻoku fie maʻu ke ma ʻalu ki he feituʻu mamaʻo tahá.
Hili ʻema aʻu ki aí, naʻá ma lotu mo kole ki he Tamai Hēvaní pe ko e fē ʻa e hala mo e ʻapi ke ma ʻalu ki aí. ʻI he ʻosi ʻema lotú, naʻá ma tafoki hake ʻo sio ki he ngaahi halá kotoa. Naʻá ma sio ki ha halanga lēlue ofi mai ʻi ha foʻi māʻolunga. Naʻá ma sio atu ki ha fefine ʻoku tangutu mo ha taufale ʻo kuikui pē hono matá.
Naʻe pehē atu hoku hoá, “Mālō e lelei!” pea ʻi he fanongo mai ʻa e fefiné, naʻá ne tuʻu hake ʻo hoko atu ʻene tafí ʻo hangē pē naʻe ʻikai ai ha meʻa ia ʻe hokó. Pea naʻá ma fakahā ange ki ai ko e ongo faifekau kimaua ʻo e Siasi ʻo Sīsū Kalaisí pea ʻoku ʻi ai haʻama pōpoaki maʻana. Naʻá ne ʻave kimaua ki hono ʻapí, pea fai haʻamau fealeaʻaki fakalaumālie moʻoni. Naʻá ma fakamatala kau kia Siosefa Sāmita mo ʻene ʻalu ki ha vao ʻakau ʻo lotu ke ʻiloʻi ʻa e moʻoní, pea naʻe ʻaʻahi kiate ia ʻa e ʻOtua ko e Tamaí mo Sīsū Kalaisi ko e tali ʻo ʻene lotú.
Naʻá ne pehē mai kiate kimaua, “ ʻOku moʻoni ia. ʻOku ou ʻilo ʻoku tali ʻe he ʻOtuá ʻetau lotú. ʻI hoʻomo ui maí, naʻá ku lotu ʻo kole ki he ʻEikí ke ʻomi ha taha te ne lava ʻo taki au ki Hono halá, pea mo hoʻomo aʻu maí.”
Naʻá ma ongoʻi e Laumālié, pea ʻokú ma fakamoʻoni naʻe ʻave kimaua ʻe he ʻOtuá ki ai pea naʻe ʻosi fai foki ʻema lotu ke ʻiloʻi pe ko hai ʻi Heʻene fānaú ʻoku ne fie maʻu ʻema tokoní. Naʻe vave e papitaiso ʻa Sisitā Lufiná. ʻI he ngaahi uike hoko maí naʻe papitaiso ʻene fānaú, makapuná pea mo e niʻihi hono kaungāʻapí—naʻe fakakātoa ki ha kau papi ului ʻe toko 20 ʻi he konga ko ia homa ʻēliá. Naʻe tataki kimaua ʻe he ʻEikí kia Sisitā Lufina, pea ko ia ʻa e matapā ke vahevahe ai e ongoongoleleí ki hono fāmilí mo e kaungāʻapí.
ʻOku ou ʻilo ʻe tāpuakiʻi kitautolu ʻe he Tamai Hēvaní kapau te tau kole kiate Ia, ka ʻe toki fakahoko ia hili ʻEne ʻahiʻahiʻi ʻetau tuí. ʻOku ou fakamālō ne u lava ʻo hoko mo hoku hoá ko e meʻangāue ʻi he toʻukupu ʻo e ʻEikí pea kumi e kakai ʻoku nau mateuteu ke fanongo ki he pōpoaki ʻo e ongoongoleleí. ʻOku ou ʻilo ʻoku ʻofa ʻa e ʻOtuá ʻiate kitautolu pea kapau te tau kole te Ne fakahinohinoʻi kitautolu.
Tā fakatātaaʻi ʻe Dilleen Marsh