Jodikdik ro
Peran n̄an Dipuk Lan̄ eo
Ilo bon̄ōn eo kein karuo in kāām eo an Doulul eo an Jiron̄ ro an stake eo aō, eaar wōr juon lan̄ in wōt eļap im aire. Ward eo aō eaar wōr enan̄in 24 jiron̄ ro raar pād ilo kāām eo ippān ruo ritōl, im kōmij aikuj aolep kar koboob n̄an lowaan juon em̧ jidikdik n̄an kejparok. Eaar lukkuun in wōt mijeljel, im kōto eo eaar ļapļo̧k. Iaar aikuj in jab bōjrak ilo kakememej n̄a make kōn jar in kejparok eo stake būreejtōn eo am eaar kōm̧m̧ane m̧okta ļo̧k. Ward eo am eaar barāinwōt kōm̧m̧ane jar in kurub eo am make ilo em̧ jidikdik eo, im Iaar kōm̧m̧ane jar ko aō make.
Elōn̄ leddik ro raar mijak, im eaar alikkar n̄an lo ebaj et. Em̧ jidikdik im̧ōm eaar jab lukkuun kajoor, im kōm kar pād wōt iturin juon reba. Ilo enan̄in 20 minit ko lan̄ eo eaar lukkuun in nana ļo̧k jon̄an aolepen stake eo eaar aikuj in ettōrļo̧k jān em̧ jiddik ko im̧ōn ward ko aer n̄an em̧ jiddik ko im̧ōn rikakipilōklōk eo, ko raar pād ijōko ro utiej. Stake būreejtōn eo am̧ eaar bar kōm̧m̧ane juon jar, im kōm kar al al in bok in al eo, al ko an Būraimere, im al in kāām ko ilo kajjeon̄ kaenōm̧m̧an kōm make. Aaet, kōm kar mijak, bōtaab kōm kar en̄jake bwe aolep men renaaj em̧m̧an. Jimettan awa tok ālik eaar EM̧M̧AN n̄an bar ro̧o̧l n̄an em̧ jiddik ko im̧ōn ward ko am.
Tok ālik kōm kar lo ta eo eaar waļo̧k n̄an aire eo bon̄ōn eo. Eaar jepeļļo̧k ilo ruo lan̄ ko. Juon eaar etal ituanbwijmaron̄im im eo juon eaar etal ituanmiin̄im. Ta eo kōm kar ioone eaar jab ijo enana in!
Ijeļā bwe Anij eaar ron̄jake jar ko am bon̄ōn eo im bwe E eaar kejparok kōm jān ijo enana tata in lan̄ eo. Etke juon aire eaar jepeļļo̧k ijello̧k wōt n̄e Anij eaar aikuj bwe en āindein? Ijeļā bwe ilo lan̄ ko an mour, iien otemjej jemaron̄ jar n̄an Jemed Ilan̄ im E enaaj ron̄ im uwaake jar eo ad, letok n̄an kōj peran eo im kejparok eo jej aikuji n̄an dipuki ilo ejjeļo̧k jorrāān.