Ko e Sū ʻo e Tangataʻeikí
Priscilla Costa, Sā Paula, Palāsila
Naʻe tokoni ʻeku ongomātuʻá he ngaahi taʻu kuohilí ke tānaki ha vala, sū, mo e ngaahi meʻa kehe ke ʻave ki he kau faingataʻaʻiá, pea fakatokangaʻi heʻeku tangataʻeikí ha sū kei fuʻu lelei ʻi he fokotuʻunga meʻa ʻe tahá. Naʻe ongo mālohi ʻaupito kiate ia he taimi ko iá ke tuku pē ʻa e suú ia.
Naʻe kata ʻeku fineʻeikí mo pehē ange, “ ʻOku fuʻu siʻisiʻi ʻaupito e sū ia ko ʻení kiate koe. He ʻikai pē lava ia ʻo toe hao!”
Ka naʻe kei vilitaki pē ʻeku tangataʻeikí ke tauhi ʻa e suú. Hili ha fakakata holo ʻa e finemātuʻá, naʻa nau tuku pē ke ne tauhi e suú.
ʻI heʻene aʻu mai pē ki ʻapí, naʻá ne fakamaʻa ia pea fakafonu ʻaki ia ha nusipepa ʻo faʻo ki ha puha ʻo hili ʻi ʻolunga heʻene funga toloá. Naʻe talamai ke ʻoua naʻa mau ala ki ai. Naʻe tuku maʻu ia he feituʻu tatau he taʻu ʻe nima.
Ne ʻi ai ha ʻaho ʻe taha ne hiki mai ai ha fāmili foʻou ki he ʻapi hokó. Naʻe ʻi ai haʻana ongo tamaiki fefine mo ha pēpē mahina ʻe ono. Ne kamata ke mau kaungāmeʻa mo ʻena ongo tamaiki fefiné ʻa ia naʻa mau toʻu pē. Ne mau vahevahe mo homa ongo kaungāmeʻa foʻoú e meʻa ne ma ako ʻi he siasí, pea fakaafeʻi kinaua ki he Palaimelí. Naʻá na fiefia pea fie ako lahi ange ki he meʻa kuó ma vahevahe kiate kinauá.
Hili ʻena foki mai mei he Palaimelí, ne ʻikai toe tuku ʻena talanoa mo ʻena ongomātuʻá ʻo kau ki he Siasí. Naʻe fakaafeʻi leva ʻe heʻema ongomātuʻá ʻa e fāmilí kotoa ke fanongo ki he lēsoni ʻa e kau faifekaú pea mo ʻalu ki he lotú. Naʻa nau tali loto fiefia. Naʻa nau saiʻia he ngaahi lēsoní, pea mau fiefia ke ō mo kinautolu ki he lotú.
Ka ʻi he aʻu ki he ʻaho Tokonakí, ne hangē ʻoku matamamahí e ongo tamaiki fefiné. ʻI hono ʻeke pe ko e hā e meʻa ʻoku hokó, naʻá na talamai ʻoku ʻikai toe fie ʻalu ʻena ongomātuʻá ki he lotú.
Naʻá ma loto-mamahi pea kole ki heʻema tangataʻeikí ke talanoa ki heʻena ongomātuʻá. ʻI heʻene fakamatalaʻi kiate kinaua e ngaahi tāpuaki ʻo e ʻalu ki he lotú, naʻe tali mai e tamai ko ʻení ʻo pehē, “ ʻIo, ʻoku ou ʻiloʻi kotoa ia. Ko e palopalemá he kuo teʻeki ai ke toe ʻi ai haku sū kehe ka ko e sū lapa pē, pea ʻoku ou ʻiloʻi ʻoku totonu ke te ʻalu teunga lelei ki he lotú.”
ʻI he taimi ko iá ne sio ʻeku tangataʻeikí ki heʻeku fineʻeikí. Naʻe ʻilo ʻe he fineʻeikí ʻa e meʻa ʻoku totonu ke faí. ʻE hao lelei he vaʻe ʻo e tamai ko ʻení ʻa e sū ko ia he puha ʻi ʻolunga he funga toloa ʻa e tangataʻeikí, pea ʻe ʻalu kotoa leva e fāmilí ki he lotú. Ko ha Sāpate lelei ia kiate kinautolu mo kimautolu. Naʻe vave pē ʻenau hoko ko e mēmipa ʻo e Siasí, pea ʻi he ʻahó ni ʻoku nau hoko ko e fāmili fakaʻofoʻofa mo taʻengata.
ʻOku ou ʻiloʻi naʻe maʻu ʻe heʻeku tangataʻeikí ha fakahinohino mei he Laumālie Māʻoniʻoní ke tauhi e sū ko iá. Ko hono olá, ko ʻeku fekumi maʻu pē ki Heʻene fakahinohinó ke maʻu ha ngaahi fāmili ʻoku mateuteu ke fanongo ki he ongoongoleleí. ʻOku ou ʻiloʻi ʻokú Ne teuteuʻi ha ngaahi fāmili, pea ʻoku fie maʻu ke tau fekumi ke ʻomi kinautolu kia Kalaisi.