Lau Hoʻo Tohi ʻa Molomoná
Jewelene Carter, Vesinia, USA
Naʻe totonu ke mau fiefia, ka ne mau loto mamahi pea masiva homau nimá. Naʻe faʻēleʻi mai ʻa Tēpola Sīlia Kata ʻi hono ʻaho totonú, ko e ʻaho 26 ʻo ʻEpeleli 2010, ka naʻe faʻēleʻi mai pē kuo mate.
Ne u toʻotoʻo pē ʻa e kiʻi sipi lanu pingikī naʻe kofu ʻaki ʻa Tēpola ʻi falemahakí, ʻi heʻemau foki ki ʻapí. ʻI heʻeku tangutu he seá mo e loto mamahí, ne lue mai homa kiʻi foha taʻu uá ʻo sio ki he sipi ʻoku ʻikai ʻi ai ha tahá pea fafana mai, “Mālō e lelei, hoku kiʻi tuofefine.ʻOku ou ʻofa ʻiate koe.”
Ne lele noa pē hoku loʻimatá peá u hanga kehe au. ʻI heʻeku fai iá, ne u sio ki he ngaahi lea he fakatātā mei he makasini ko e Friend ʻoku tautau he holisí: “Ko e meʻa pē ke ke fai ke aʻu ai ki he Tamai Hēvaní ko haʻo lotu, peá ke fanafana ʻo kolea ʻa e Laumālie Māʻoniʻoní.”1
Naʻe kamata ke u huaʻi fakalongolongo atu hoku lotó ki he ʻOtuá ʻi he lotu fakamātoato. ʻI heʻeku lotú ne u ongoʻi e fanafana mai ʻa e Laumālie Māʻoniʻoní, “Toe lau hoʻo Tohi ʻa Molomoná.” Naʻe toki ʻosi pē ʻeku lau, ka naʻe fuʻu ongo mālohi pea mahino lelei ʻa e meʻa ke faí.
ʻI heʻeku tuʻu pongipongia hake he pongipongi hono hokó, ne u kamata ke lau e Tohi ʻa Molomoná. Ne u ngāue ʻaki ha peni vahevahe mo ha peni kala ke fakaʻilongaʻi e folofola kotoa pē ʻoku kau ki he tuí, lotú, ʻamanaki leleí, ngaahi ʻulungāanga ʻo Sīsū Kalaisí, malanga ʻaki ʻo e ongoongoleleí, mo e talangofua ki he leʻo ʻo e ʻEikí. Ne u ʻilo kuo pau ke u fai e meʻa naʻe fai ʻe Nīfai, ʻĪnosi, Molonai, mo e kau palōfita kehe ʻi he tohi ʻa Molomoná ʻi he taimi naʻa nau faingataʻaʻia aí. Pea kuo pau ke u fai ia ʻaki e ʻofa tatau ne nau fai ki he Fakamoʻuí lolotonga e ngaahi taimi faingataʻa ʻo e moʻuí.
Lolotonga e ngaahi houa ako folofola fakatāutaha fakaʻahó, ne u ongoʻi e toʻukupu ʻofa ʻo e ʻEikí ʻokú Ne takatakaiʻi ʻaki au ʻEne ʻofá, peá u ongoʻi e mālohi ʻo ʻEne feilaulau fakalelei maʻatautolú hono kotoa. Naʻe lea mai e Laumālié kiate au, pea ne u ongoʻi nonga, pea tali mai ʻeku lotu fakamātoató. Ne u maʻu ha mālohi ʻi hoku mamahí ʻi heʻeku fakalaulauloto ki he ngaahi lea ne u laú.
Ne ʻi ai ha ʻaho ne fakafonu au ʻe he Laumālié ʻaki e fiefiá ʻi heʻeku lau e ngaahi leá ni:
“ ʻOku ou ʻofa ʻi he fānau īkí ʻaki ha ʻofa haohaoa; pea ʻoku nau tatau kotoa pē pea nau maʻu ʻa e fakamoʻuí. …
“Ko e fānau īkí … ʻoku nau moʻui kotoa pē [ʻi he ʻOtuá] koeʻuhi ko ʻene ʻaloʻofá. …
“He vakai ʻoku moʻui ʻa e fānau iiki kotoa pē ʻia Kalaisi” (Molonai 8:17, 19, 22; ko e toki tānaki atu hono fakamamafá).
Ne u ongoʻi hangē pē ʻoku ou sio ki hoku ʻofefiné ʻoku moʻui ʻia Kalaisi—malimali mo fiefia pea takatakaiʻi ʻi Hono toʻukupú. Ne u ongoʻi ʻa e mālohi ke kātakí he taimi ko iá, pea mo ha ongo foʻou ʻi hoku lotó ʻo e ʻamanaki lelei ki hoku fāmilí. Ne u ʻiloʻi kapau te mau piki maʻu ki he Fakaleleí, folofolá, mo e ngaahi lea ʻa e kau palōfitá, pea fetauhiʻaki ʻemau ngaahi fuakava he temipalé, ʻe lava ke fakatahaʻi homau fāmilí ʻo taʻengata.
ʻOku ou ʻofa ʻi he Tohi ʻa Molomoná, ʻa ia ʻoku fakamoʻoniʻi lelei ai ʻa Sīsū Kalaisi, mo e meʻa naʻá Ne fai maʻatautolú, pea mo e meʻa kuo pau ke tau fai ke tau hoko ai ʻo hangē ko Iá. ʻOku ʻomi ʻe he Tohi ʻa Molomoná ʻa e māmá ki heʻeku moʻuí pea fakafonu ʻaki hoku lotó e ʻamanaki lelei ʻia Kalaisí.