Fanongonongo ʻa e Kaveinga ʻo e Mutualé ki he 2012: “Tuʻu Hake pea Ulo Atu”

Ko e kaveinga ʻo e Mutualé ki he 2012 ko e “Tuʻu hake pea ulo atu, koeʻuhí ke hoko ʻa hoʻomou māmá ko ha fuka ki he ngaahi puleʻangá” (Tokāteline mo e Ngaahi Fuakava 115:5).

Ko e potufolofolá ni naʻe foaki ia ko e konga ʻo ha fakahā ki he Palōfita ko Siosefa Sāmitá ʻi Hihifo Mamaʻo ʻi Mīsuli, USA, ʻi he 1838 pea naʻe fai ia ki he kau ʻōfisa pule ʻo e Siasí ʻi he taimi ko iá, ka ʻi heʻene hoko ko e kaveinga ʻo e Mutualé, ʻoku fakaʻaongaʻi foki ia ki he toʻu tupu taʻu 12 ki he 18 ʻo e Siasí hono kotoa.

ʻE lava ke fakaʻaongaʻi e kaveingá ko e fakalahi ki he ngaahi polokalama kamata ʻo e Mutualé, ko ha tefito ki he lea ʻa e toʻu tupú ʻi he houalotu sākalamēnití, pea ke fakatefito ai ʻa e ngaahi ʻekitivitī ʻa e toʻu tupú hangē ko e nofo kemí, ngaahi konifelenisi ʻa e toʻu tupú, mo e ngaahi fakatahaʻanga fakalaumālié. ʻE lava foki ke fakatefito ai ʻa e ngaahi polokalama fakafonua makehé mo e ngaahi ʻekitivitī hulohula kehe, hiva, mo e tulama.

ʻOku fokotuʻu mai mei he kau taki ʻo e Siasí ke fakafeʻiloaki ʻe he kau taki fakalotofonua ʻo e toʻu tupú ʻa e kaveingá ʻaki ʻa e foʻi DVD ko e Strength of Youth Media 2012: Arise and Shine Forth, ʻa ia ʻe ʻoatu ki he ngaahi ʻiunití ʻi Nōvema 2011.

ʻE lava ke fakaʻaongaʻi ʻa e DVD ko ʻení ko ha fakalahi ki he ngaahi fakatahá, ngaahi kalasí, konifelenisi ʻa e toʻu tupú, mo e ngaahi ʻekitivitī kehe pē ʻa e toʻu tupú lolotonga e taʻú pea ʻe maʻu atu ia ʻi he lea faka-Kenitoní, Pilitānia, Falanisē, Siamane, ʻĪtali, Siapani, Kōlea, Manitalini, Potukali, Lūsia, mo e faka-Sipeini.

ʻE lava ke maʻu atu mo ha ngaahi nāunau tokoni lahi ange ʻi he makasini Liahoná mo e New Era pea ʻi he LDS.org ʻi he kamataʻanga ʻo e 2012.