Kau Atu e Kāingalotu ʻi Pilitānia mo Palāsilá ki ha Ngaahi ʻAho Ngāue Tokoni
Talu pē mei hono fakaafeʻi ʻe he Kau Palesitenisī ʻUluakí ʻa e mēmipa kotoa ʻo e Siasí ʻi ʻEpeleli ne toki ʻosí ke nau kau mai ʻi ha ʻaho ngāue tokoni lolotonga e taʻu hoko maí, mo hono tali lelei ia ʻe he Kāingalotú ʻi māmani hono kotoa. Kuo kau mai ha ngaahi ʻiuniti ʻi ha puleʻanga ʻe ua—Pilitānia mo Palāsila—ki ha ngāue fakataha ʻa e kāingalotú ʻi hona takitaha fonua.
Pilitānia
Naʻe fakataha mai he ʻaho Mōnite, ko hono 5 ʻo Sepitema 2011, ha kāingalotu mei ha siteiki ʻe 11 ʻi ʻIngilani, fakataha mo e Palesiteni Fakaʻēliá, ko Palesiteni ʻĒliki W. Kopeisikī (Erich W. Kopischke) ʻo e Kau Fitungofulú, ki ha ngāue ʻa e Nima Fietokoní ʻi he feituʻu ko ʻeni ko Tottenham Marshes.
Naʻe ʻikai ngata pē ʻi hono fakaʻilongaʻi ʻe he meʻá ni ʻa e taʻu ʻe 75 ʻo e polokalama uelofea ʻa e Siasí ka ko hono toe kamata fakapuleʻanga ʻo e Ngāue Fakamaʻa ʻo e Kolomuʻa ko Lonitoní ki he 2011. Naʻe ngāue ʻa e kāingalotú ʻi ha houa ʻe nima—ʻi haʻanau fengāueʻaki mo e ʻōfisi ʻo e pulekoló—ki hono huo, tō ha ngaahi ngoue matalaʻiʻakau, tutuʻu e ʻakaú, tā hifo e ʻuluʻakau kuo fuʻu lalahí, mo hiko e vevé mei he Paʻake Teleʻa Lií.
ʻI he ʻaho tatau pē ne kau atu ai mo e kāingalotu ʻi ha ngaahi feituʻu kehe ʻo Lonitoni ki he ngaahi ngāue ʻa e Nima Fie Tokoní ʻi he ongo falemahaki maʻá e fānaú ko e Haven House Childrenʻs Hospice mo e Richard House Childrens Hospice.
ʻI he Richard House, naʻe vali ai ʻe ha kāingalotu ʻe toko 18 ʻo e Uooti Situletifōtí ha ʻōfisi, nau huo, tutuʻu ʻakau, tafi e ʻapí, mo fakaleleiʻi e ngaahi meʻangāué. Naʻe pehē ʻe Sālote ʻIlela, ko e pule ngāue ki he ngāue naʻe fai ʻi he Richard House, ko e fuofua fetuʻutaki ʻeni ʻa e falemahakí mo e Siasí.
Naʻá ne pehē, “Naʻe ongo kiate au ʻa e vēkeveke mo e fiefia naʻe fakahoko ʻaki ʻe he kau ngāue tokoní ʻenau ngaahi ngāué. Naʻa mo e kiʻi ngāue faingofua hangē ko hono tafi ʻo ha ʻaluʻangá naʻe fai ʻaki ia ʻa e lelei tahá.”
ʻI he ngaahi māhina lahi kuo ʻosí, kuo fokotuʻutuʻu e kāingalotu ʻo e Siasí ʻi Pilitānia Lahi mo ʻAilani Tokelaú mo nau kau ki ha ngaahi ngāue tokoni lahi ʻi he puleʻangá kotoa.
Palāsila
ʻI he ʻaho 30 ʻo Siulai 2011, ne sāketi engeenga ʻatā ʻa Palāsila kotoa ʻi ha ngaahi ngāue tokoni ʻe laungeau ko hono fakamanatu ʻo e taʻu 12 ʻo e Nima Fie Tokoni Māmongá, ʻa ia ko ha polokalama ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku fai ai e feinga ke fakahoko ʻa e ngāue tokoni ʻi he tukui koló mo e tokoni kiate kinautolu ʻoku faingataʻaʻia ʻi ha fakatamaki ʻoku hoko.
Naʻe kamata foki ʻa e Nima Fie Tokoni Māmongá ʻi Māosi Kei ʻAsitami (Mãos que Ajudam) ʻi Palāsila ko ha founga ke fakamaheni ai ʻa e ngaahi kaungāmeʻá mo e kaungāʻapí mo e ngaahi ngāue tokoni ʻofa fakaetangata ʻa e Siasí. ʻOku hoko ia he taimí ni ko ha meʻa lahi ʻoku fakahoko fakataʻu.
Naʻe fakafonu ʻaki ʻa e ʻaho ngāue tokoni ʻo e taʻu ní ʻa e hiva, kakata, mo e pasipasi lolotonga ia ʻoku tafi ʻe ha kakai tangata, kakai fefine, mo e fānau ʻe toko 120,000 ʻa e ngaahi halá, fakamaʻa e ngaahi ʻapiakó, ngaohi e ngaahi paʻaké ke fakaʻofoʻofa, pea kau ki ha ngaahi ngāue tokoni kehe ʻi he fonua lahi taha mo tokolahi taha ʻi ʻAmelika Latiná. Naʻe kau fakataha e kāingalotu ʻo e Siasí mo e kakai ʻo e tukui koló ʻi hono fakahoko ha ngāue tokoni ʻe ʻaonga ki he tokotaha kotoa pē.
Naʻe fakataha ha kau ngāue tokoni ʻe toko 6,000 tupu ʻi Pelo Holisonitei, Lesafī, mo Pahia ke fakafepakiʻi e mofi tengí. Naʻe fakamaʻa ʻe ha kau ngāue tokoni ʻi Lio ti Sinelo ʻa e ngaahi ʻapiako ʻa e puleʻangá mo e ngaahi senitā ki he moʻui leleí. Naʻe fakamaʻa ʻe ha kau ngāue tokoni ʻe toko 1,500 ʻi Pōto ʻAlekilī ha ngaahi ʻapiako, pea kau atu ha niʻihi ki ha ngaahi ako ki he fakaʻehiʻehi mei hono ngāue ʻaki ʻo e faitoʻo kona tapú.
Naʻe lahi hake he māhina ʻe ua kimuʻa he ʻaho ngāue tokoní mo e ngāue ha kau ngāue tokoni ʻe toko 500 ki hono tānaki ʻo e meʻakai tokoní ʻo foaki atu ia ki ha ngaahi fāmili faingataʻaʻia ʻe 175 ʻi Sā Hosei ʻi he ʻaho 30 ʻo Siulaí.
Ne foaki ʻe he kāingalotu ʻo e Siasí ʻi Pulūmenou ha meʻakai pāuni ʻe 300 (kk ʻe 136) ki he Casa de Apoio às Crianças Portadoras de Mielomeningocele e Neoplasia (Fale ʻOku Tokoniʻi ai e Fānau ʻOku Mamatea mo ʻi ai ha Ngungú). Naʻe akoʻi foki ʻe ha kau ngāue tokoni ki he ʻapí ni ʻa e ngaahi tefitoʻi moʻoni hono tokonaki mo tauhi e meʻakaí.
Naʻe pehē ʻe ha tokotaha ngāue fakasōsiale ko ʻAtiliane J. Pekesi Lufi, “ ʻE tokoni e ngaahi founga ne mau akó ke mau tauhi e meʻakaí ʻi homau feleokó he ʻoku lahi e maumau ʻemau meʻakaí tupu mei he hauhau ʻa e ʻeá.”
Ne laka hake he siteiki ʻe 11 mei ʻIngilani ne nau fakataha mai ʻi he ʻaho 5 ʻo Sepitema 2011, ke fakahoko ha ngāue tokoni ʻi ha ngaahi feituʻu kehekehe ʻe tolu ʻi Lonitoni mo e ngaahi feituʻu takatakai aí.
Taá ʻi he angalelei ʻa lindsey phillips