Visiting Tijing Mesej, Jenuware 2012

Blong Lukaotemgud mo Blong Tij Tru long Visiting Tijing

Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Fet, Famle, Help

“Jareti i minim moa, moa bitim wan filing blong givhan,” Presiden Henri B. Aering, Fas Kaonsela long Fas Presidensi i bin tijim. “Jareti i bon aot long fet long Lod Jisas Kraes, mo i wan risal blong Atonmen blong Hem.”¹ Long ol Rilif Sosaeti sista, visiting tijing i wan aksen blong jareti, wan impoten wei blong yusum fet blong yumi long Sevya.

Tru long visiting tijing, yumi lukaotemgud olgeta taem yumi kontaktem wanwan sista, serem wan mesej blong gospel, mo lukaotem blong save hem mo ol nid blong famle blong hem. “Visiting tijing i kam wok blong Lod taem ful tingting blong yumi i stap long ol pipol be i no long ol namba,” Juli B. Bek, Rilif Sosaeti jeneral presiden i eksplenem. “I tru, visiting tijing i neva finis. Hem i moa wan wei blong laef bitim wan wok. Blong stap fetful long wok olsem wan visiting tija, i wei blong soem se yumi wan disaepol.”²

Taem yumi lukaotemgud oltaem mo wetem prea from olgeta sista ia, yumi lanem olsem wanem blong tijim gud olgeta mo blong lukluk long ol nid blong wanwan sista mo famle blong hem. Blong tij, i save kam long eni kaen wei—sam i bigwan mo sam i no bigwan tumas. “Plante taem, ol smol aksen blong seves, i hemia nomo we i nid blong leftemap mo blesem wan narawan: wan kwestin long saed blong famle blong wan sista, ol kwik toktok blong leftemap tingting, wan tru gud toktok, wan smol not blong talem tangkyu, wan sot telefon kol,” Presiden Tomas S. Monson i tijim. “Sapos yumi lukaotgud mo luklukgud, mo sapos yumi mekem folem ol smol toktok we oli stap kam long yumi, bae yumi save mekem plante gud. …Bae yumi no save kaontem ol aksen blong seves we wan bigfala ami blong ol Rilif Sosaeti visiting tija oli stap givim.”³

I Kamaot long Ol Skripja

Jon 13:15, 34–35; 21:15; Mosaea 2:17; Doctrine and Covenants 81:5; Moses 1:39

I Kamaot long Histri blong Yumi

Long 1843, ol memba blong Jos long Nauvu, Ilinoa, oli seraot long fo wod. Long Julae long yia ia, ol lida blong Rilif Sosaeti oli jusum wan visiting komiti blong fo sista long wanwan wod. Ol responsabiliti blong ol komiti ia oli blong lukluk long ol nid mo kolektem ol donesen. Rilif Sosaeti i bin yusum ol donesen ia blong lukluk long olgeta we oli stap long nid.⁴

Naoia ol visiting tija oli nomo tekem ol donesen, be oli holem taet responsabiliti blong lukluk long ol nid—long saed blong spirit mo long saed blong wol ia—mo blong wok blong stretem ol nid ia. Ilaesa R. Sno (1804–87), seken Rilif Sosaeti jeneral presiden i bin eksplenem: “Wan tija …i mas gat Spirit blong Lod, taem hem i go insaed long wan haos blong save wanem spirit hem i miting insaed long haos ia. …Prea long fored blong God mo Tabu Spirit blong gat Spirit blong yu save mitim spirit ia we i rul insaed long haos ia … mo bae yu filim blong talem ol toktok blong pis mo kamfot, mo sapos yu fanem wan sista i filim kolkol, tekem hem kolosap long hat blong yu, olsem we bae yu mekem wetem wan smol pikinini mo mekem hem i harem gud.”⁵

© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong Visiting Teaching Message, January 2012. Bislama. 10361 852

Wanem Mi Save Mekem?

Wanem nao mi stap mekem blong helpem ol sista blong mi oli filim se mi wan fren we i lavem mo kea long olgeta?
Olsem wanem nao mi save mekem gud moa wok ia blong lukaotemgud mo kea long ol narawan?