Iren Mahsen en Padahk en Pas, Senweri 2012

Epwel Tetehk oh Kalkalohk sang ni Padahk en Pas

Onopiki iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.

Pwoson, Peneinei, Sawas

“Limpoak mehlel [wehwehki] laudsang mehlel pepehm en kadek,” padahk sang President Henry B. Eyring, Sounsawas Keieu nan Presidensi Keieu. “Limpoak mehlel ipwisang pwoson Kaun Sises Krais oh iei lipwen Sapwellime Tomwo.”¹ Ong lih akan en Pwihn en Sawas en Lih, padahk en pas kak wia limpoak mehlel ni eh mwekmwekid, wiepe kesempwal ehu ong doadoahngki atail pwoson Sounkomouro.

Sang ni padahk en pas, kitail kin kihda epwel tetehk sang ni atail kin tuhwong emenemen lih, ehukihda mahsen en rongamwahuo, oh rapahki en esehla en liho oh en ah peneinei anahn akan. “Padahk en pas kin wiahla Sapwellimen Kauno doadoahk ni atail kin kesempwaliki aramas ah kaidehn nempe,” kawehwe sang Julie B. Beck, president lap en Pwihn en Sawas en Lih. “Ni mehlel, padahk en pas sohte kin imwisekla. E wia mwomwen mour ehu kaidehn doadoahk ehu. Papah ni loaloapwoat duwen sounpadahk en pas iei kadehdehpen atail wia tohnpadahk.”²

Ni atail pahn kin kalapw kihda epwel tetehk ni kapakap, kitail kin esehla duwen kalohk ni keieu mwahu oh apwaliala anahn akan en emenemen lih oh ah peneinei. Kalohk kak kohda ni soangen mwohmw kei—ekei laud ah ekei sohte nohn laud. “Pak tohto kisin mwekid tikitik kan en papah iei ihte me anahn ong kaparanda oh kapaiada emen tohrohr: peidek me pid en emen peneinei, lokaiahn kangoang, kaping mehlel, kasapahlkalahngan nan ehu kisin likou en, oh dengwa mwotomwot,” padahngki President Thomas S. Monson. “Ma kitail kin tehk wasa oh kin wehwe, oh ma kitail pahn mwekidki kemwekid kapehm kan en ngehn sarawi me kin peidohng kitail, kitail kak kapwaiada me mwahu laud. … Mwekid kan en papah me kin kohda sang pwihn laud en sounpadahk kan en pas en Pwihn en Sawas en Lih sohte kak wadawadda.”³

Sang Pwuhk Sarawi Kan

Sohn 13:15, 34–35; 21:15; Mosiah 2:17; Doctrine and Covenants 81:5; Moses 1:39

Sang Atail Poadoapoad

Nan 1843, Towe kan en Mwomwohdiso nan Nauvoo, Illinois, pwalpeseng wiahda ward pahieu. Nan Sulai en pahro, kaun kan en Pwihn en Sawas en Lih idihada komidi de pwihn en pas me towe lih pahmen ong ehuehu ward. Pwukoahn komidi en pas kan iangahki en tetehk anahn akan oh kihpene meiroang kan. Pwihn en Sawas en Lih kin doadoahngki meiroang pwukat pwehn kihda sawas ong me anahn akan.⁴

Mendahte sounpadahk kan en pas ar solahr kin anahne kihpene meiroang kan, re kolokol te arail pwukoa en tehkada anahn akan—ni pali ngehn oh paliwar—oh en doadoahk pwehn apwaliala anahn pwuko. Eliza R. Snow (1804–87), keriemen en president lap en Pwihn en Sawas en Lih, kawehwehda: “Sounpadahk men … uhdahn konehng ahniki uwen Ngehn en Kauno me laud, ni ah pahn pidelong nan ihmw ehu pwehn ese ngehn dah me e pahn tuhwong wasao. … Peki ni ngidingid mwohn Koht oh Ngehn Sarawi ken alehdi [Ngehno] pwe ken kak tuhwong ngehno me kakaun nan ihmwo … oh ken kak kehn en kihda lokaiahn meleilei oh kansenamwahu, oh ma ke diarada me lih emen sohte nohn kadek de ekis mwomwen lemwlemwur, kihdoihng liho nan ahmw mohngiong duwehte ahmw pahn kolodo serihmen pahn adimw oh kaperenihda [ih].”⁵

© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen Visiting Teaching Message, January 2012. Pohnpeian. 10361 885

Dahme I Kak Wia?

Dahme I wiewia pwehn sewese riei lih akan pehm me ngehi kompoakapah men me poakohng oh nsenohkinirail?
Ia duwen ei pahn kak maiengala tetehk oh apwahpwalih mehteikan?