Ko e hā e tuʻunga ʻo e Siasí ki he nonofo fakahomosekisualé? ʻOku lelei pē nai ke fakakaungāmeʻa ki he kakai ʻoku nau maʻu e ongo fakahomosekisualé?
ʻOku fakafepakiʻi ʻe he Siasí ʻa e tōʻonga fakahomosekisualé, ka ʻoku tau ala atu ʻi he loto mahino mo e fakaʻapaʻapa ki he kakai ʻoku nau fetokangaʻaki pē mo honau faʻahingá.
Kapau ʻokú ke ʻilo ha kakai ʻoku nau fetokangaʻaki pē mo honau faʻahingá, muimui ki he ngaahi tefitoʻi moʻoni ʻokú ke fai ʻi hoʻo fakakaungāmeʻa kehé: “Fili fakalelei ho ngaahi kaungāmeʻá. Te nau tākiekina mālohi koe ʻi he anga hoʻo fakakaukaú pea mo hoʻo tōʻongá, pea te nau tokoni foki ke fakapapauʻi mai ho ikuʻangá. Fili ha ngaahi kaungāmeʻa ʻoku mou feʻinasiʻaki ʻi he ngaahi meʻa okú ke mahuʻingaʻia aí ke mou lava ʻo fefakamālohiaʻaki mo fepoupouaki ʻi hono moʻui ʻaki ʻo e ngaahi tuʻunga moʻui ʻoku māʻolungá. ʻE hanga ʻe hao kaumeʻa mamae ʻo fakalotolahiʻi koe ke ke fai maʻu pē ʻa ho lelei tahá. … Anga-lelei mo anga fakaʻapaʻapa ki he tokotaha kotoa pē” (Ki Hono Fakamālohia ʻo e Toʻu Tupú [tohitufa, 2001], 12).
ʻOku akoʻi ʻe he Siasí ʻoku ʻi ai e taumuʻa ʻi he palani ʻa e Tamai Hēvaní ki he ongo fakasekisuale ʻi he faʻahinga ʻo e tangatá. ʻI hono fie maʻu ke tau fiefia pea fakahoko e taumuʻa ko iá, ʻoku fekauʻi mai ai ke tau moʻui ʻaki e fono ʻo e angamaʻá. ʻOku fehangahangai e tōʻonga ʻo e nonofo fakahomosekisualé mo e taumuʻa ko iá pea ʻokú ne maumauʻi ai e ngaahi fekau ʻa e ʻOtuá.
Neongo iá, ka ʻi ai ha taha ʻoku tokanga pē ki hono faʻahingá kae ʻikai ke ne fai e meʻa ko iá, kuo teʻeki ai faiangahala ai. ʻOku tatau ʻa e tuʻunga moʻui maʻa ʻi he Siasí ki he taha kotoa, ʻo tatau ai pē pe ko e hā e faʻahinga ʻokú ne manako aí. ʻOku ʻikai tali ʻe he ʻEikí pe ko Hono Siasí ha faʻahinga ʻulungāanga te ne maumauʻi ʻEne fonó. Ko ia ai ʻoku mau valokiʻi e anga ʻulí kae ʻikai ko e tokotaha ʻokú ne fakahoko iá.