Ko e hā ʻoku fuʻu lahi ai hono teke e kau talavoú ke ō ʻo ngāue fakafaifekaú? ʻIkai nai ko ha fili fakatāutaha pē ia?

Kuo pau ke fai ʻe he talavou kotoa pē ha fili fakatāutaha pe te ne fakahoko pe ʻikai hono fatongia he lakanga fakataulaʻeikí ke ʻalu ʻo ngāue fakafaifekaú. Naʻe pehē ʻe Palesietni Tōmasi S. Monisoni: “ ʻOku totonu ke teuteu e talavou moʻui taau kotoa ʻe malavá ke ngāue fakafaifekau. Ko e ngāue fakafaifekaú ko ha fatongia ʻo e lakanga fakataulaʻeikí—ko ha fatongia ʻoku ʻamanaki mai e ʻEikí ʻe fakahoko ʻe kitautolu kuó Ne foaki lahi ki aí. Kau talavou, ʻoku ou naʻinaʻi atu ke mou teuteu ke ngāue fakafaifekau” (“ ʻI Heʻetau Toe Fakataha Maí,” Liahona, Nōvema 2010, 6).

Ko e meʻa ʻoku aʻusia ʻe he talavoú ʻi he Lakanga Taulaʻeiki Faka-ʻĒloné ko e konga ia ʻo ʻene teuteu ki he ngāue fakafaifekaú. Ko hono fatongiá ia, pea ʻoku totonu ke ne ongoʻi e mafatukituki ʻo e fatongia ko iá. ʻOku ʻikai foki totonu ke ʻalu ʻo ngāue fakafaifekau koʻeuhí pē he ko e meʻa ia ʻoku fie maʻú pe koeʻuhí he ʻoku teke ia ki ai; ka ʻoku totonu ke ngāué koeʻuhí he ʻokú ne maʻu ha holi ke vahevahe ʻa e ongoongolelei ʻo Sīsū Kalaisi kuo toe fakafoki maí mo e niʻihi kehé.

Ka ʻi heʻene lotua e ngāue fakafaifekaú, ʻoku totonu ke ne manatuʻi ko hono maʻu ko ia ʻo e lakanga fakataulaʻeikí, kuó ne ʻosi maʻu ai mo e fatongia toputapu ke “fakatokanga, fakamatala, naʻinaʻi, mo akonaki, pea fakaafeʻi ʻa e kakai kotoa pē ke nau haʻu kia Kalaisi” (T&F 20:59), kau ai e ngāue fakafaifekau taimi kakató. ʻOku tali lelei pē kapau ʻoku ʻikai lava e kau talavoú ʻo ngāue fakafaifekau koeʻuhí ko e mahamahaki pe faingataʻaʻia fakaesino.