Parau poro‘i a te Peresideniraa Matamua, Fepuare 2012
Faaitoito ia ratou ia pure
A tamariirii ai au, ua haapii mai to’u na metua ia’u i te pure na roto i te hi‘oraa. Ua haamata vau ma te feruri i te hoê hoho‘a o te Metua i te Ao ra i te atea roa. Ia paari mai au, ua taui to’u iteraa no ni‘a i te pure. Ua riro mai te hoho‘a i roto i to’u feruriraa ei hoho‘a no te hoê Metua i te Ao ra tei fatata roa mai, tei vai i roto i te hoê maramaramara anaana, e o tei ite papû maitai ia’u.
Ua tupu mai taua tauiraa ra i te taime a roaa ai to’u iteraa papû e, te faaiteraa a Iosepha Semita no ni‘a i te ohipa tei tupu i ni‘a ia’na i te matahiti 1820 i Manchester, New York, e parau mau ïa:
« ua ite atura vau i te pou maramarama i te faaatiraa ii nia noa a‘e i to’u upoo, e ua pou maira te reira i nia iho ia’u.
« I te taeraa mai te reira maramarama, ua tuuhia vau e taua enemi i tape‘a ia’u. I te mairiraa taua maramarama ra i nia iho ia’u, ua ite atu ra vau e piti taata, to raua teatea e te hanahana a ti‘a noa‘i raua i nia a‘e ia’u i roto i te reva ra, e ore roa ïa e ti‘a ia faaauhia i te hoê noa’tu mea. Ua parau maira te hoê o raua ia’u, ma te faatoro atu i to’na rima i nia i te tahi, e ma te faahiti i to’u i‘oa, i te na-ô-raa mai e—O Ta’u Tamaiti Here Teie. A Faaroo Ia’na!» (Iosepha Semita —Aamu 1:16–17).
Tei roto te Metua i te Ao ra i te uru raau i taua mahana nehenehe ra no te tau faatupuraa raau. Ua pii maira Oia ia Iosepha i to’na ra i‘oa. E ua faaite maira Oia i te Faaora o te ao nei tei ti‘afaahou ei « Tamaiti Here » Na’na. Noa’tu te taime e te vahi outou e pure ai, e nehenehe to outou iteraa papû no ni‘a i te parau mau o taua iteraa hanahana ra i te haamaitai ia outou.
Te Metua ta tatou e pure nei o te Atua hanahana ïa tei hamani i te mau ao na roto i Ta’na Tamaiti Here. Te faaroo nei Oia i ta tatou mau pure mai Ta’na i faaroo i te pure a Iosepha—ma te maramarama maitai mai te mea ra tei reira Oia a pûpûhia ai te reira. Ua here Oia ia tatou ua tae roa Oia i te horo‘a mai i Ta’na Tamaiti ei Faaora no tatou. No taua horo‘a ra ua faatia Oia e ia roaa ia tatou te tahuti ore e te ora mure ore. E ua pûpû Oia no tatou, na roto i te pure i te i‘oa o Ta’na Tamaiti, te rave‘a no te aparau Ia’na i roto i teie oraraa i te mau taime e hinaaro ai tatou.
E hopoi‘a mo‘a na te mau taea‘e tei mau i te autahu‘araa i roto i te Ekalesia a Iesu Mesia i te Feia Mo‘a i te Mau Mahana Hopea Nei ia « hahaere i te mau fare o te mau melo atoa, e ia a‘o atu ia ratou ia pure ma te reo faaroo e i te vahi moemoe hoi » (PH&PF 20:47; ua apitihia’tu te haapapûraa).
Ua rau te mau rave‘a no te a‘o i te hoê taata ia pure. Ei hi‘oraa, e nehenehe ta tatou e faaite papû e, ua faaue mai te Atua ia tatou ia pure tamau noa, e aore râ, e nehenehe ta tatou e faaite i te mau hi‘oraa mai roto mai i te papa‘iraa mo‘a e i to outou iho iteraa no te mau haamaitairaa tei tae mai na roto i te pure o te aau mehara, te taparuraa e te uiuiraa. Ei hi‘oraa, e nehenehe ta’u e faaite papû e, ua ite au e, e pahono mai te Metua i te Ao ra i te mau pure. Ua farii au i te arata‘iraa e te tamahanahana mai roto mai i te mau parau tei hiti mai i roto i to’u feruriraa, e ua ite au na roto i te Varua e, no ô mai te mau parau i te Atua ra.
Ua farii te peropheta Iosepha Semita i taua mau iteraa ra, e nehenehe atoa outou e farii i te reira. Ua farii oia i teie pahonoraa no te hoê pure aau tae:
« E ta’u tamaiti, ia hau mai na to oe aau ; e vai poto noa mai to oe enemi e to oe mau ati hoi ;
« E i reira, mai te mea e faaoromai maite oe i te reira, e faateitei mai te Atua ia oe i te vahi teitei roa ra » (PH&PF 121:7–8).
Teie te hoê heheuraa no ô mai i te hoê Metua here i te hoê tamaiti faaroo i roto i te ahoaho rahi. E nehenehe te mau tamarii ato‘a a te Atua e paraparau Ia’na na roto i te pure. Ua riro te titauraa ia pure ei mea faufaa roa no’u a farii ai au i te mau mana‘o no te here e te maramarama o tei tae mai na roto i te mau pahonoraa no te mau pure haehaa.
E roaa to tatou iteraa papû no te hoê faaueraa a te Atua na roto i te haapa‘oraa i taua faaueraa ra (a hi‘o Ioane 7:17). E parau mau te reira no te faaueraa e ia pure tamau noa tatou ma te reo puai e ma te mo‘emo‘e. Ei orometua e ei hoa no outou, te fafau atu nei au e, e pahono mai te Atua i ta outou mau pure, e na roto i te mana o te Varua Maitai, e ite ai outou iho e, no ô mai Ia’na ra te mau pahonoraa.
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane: 6/10. Parau faati‘a no te iritiraa: 6/10. Iritiraa no First Presidency Message, February 2012. Tahitian. 10362 895
Haapiiraa no roto mai i teie parau poro‘i
-
« E mau mauhaa faufaa roa te mau hoho‘a no te haapuai i te mana‘o tumu o te hoê haapiiraa » (Te Haapiiraa, Aore e Piiraa Teitei A‘e [1999], 176). A faaite i te hoê hoho‘a peni o Iosepha Semita e aore râ, o te Orama Matamua. A aparau i te iteraa i roaa ia Iosepha Semita no ni‘a i te pure. Nahea ta outou mau pure e riro ai ei mau pure hau atu i te faahiahia mai te mea e, e faahoho‘a outou i te « Metua i te Ao ra… tei fatata roa mai », mai ta te peresideni Eyring i na reira ?
-
Mai ta te peresideni Eyring i parau mai, a faaite i to outou iteraa papû no ni‘a i te pure, ma te faaite i te mau haamaitairaa ta outou i farii na roto i te pure, e aore râ, a faaite i te mau papa‘iraa mo‘a no ni‘a i te pure.