iVaqa ni Veisiko, Feperueri 2012
iVakatawa ni Matavuvale
Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.
Vakabauta, Matavuvale, Veivukei
“Oi kemuni na ivakatawa ni matavuvale,” e kaya o Peresitedi Gordon B. Hinckley (1910–2008) ena nona vakamacalataka “Na Matavuvale: Ai Vakaro Ki Vuravura Raraba” ena soqoni raraba ni iSoqosoqo ni Veivukei ena 1995. “Oi kemuni na dauvakasucu gone. Oi kemuni o ni susugi ira ka tauyavutaka e lomadra na nodra ivakarau ni bula. E sega tale ni dua na cakacaka me vakalou me vaka na veisusugi kivei ira na luve ni Kalou.”1
Sa voleka oqo ni 17 na yabaki na kena vakayagataki tiko na ivakaro oqo ni noda itavi vakaibalebale duadua era vakatabakiduataki ena vaqaqacotaki ni matavuvale kei na veivuvale—se vakacava ga na noda ituvaki ena gauna oqo. O Barbara Thompson, ikarua ni daunivakasala ena mataveiliutaki raraba ni iSoqosoqo ni Veivukei ena gauna oqo, a lewena tu na Salt Lake Tabernacle ena imatai ni nona wilika na ivakaro o Peresitedi Hinckley. “Sa dua na gauna uasivi o ya,” e a nanuma. “Au vakila na ibalebale ni itukutuku. Au qai vakasamataka talega, ‘Oqo e sa dua na idusidusi cecere vei ira na itubutubu. Sa itavi levu tale ga vei ira na itubutubu.’ Au vakasamataka toka ni sega dina ni vakaibalebale vakalevu sara vei au niu sega ni vakamau ka sega niu vakaluveni. Ia au mani nanuma totolo tale, ‘Ni sa baleti au. Au lewe ni dua na matavuvale. O au e dua na yalewa, e dua na tacina yalewa, dua na nei, dua na tavale, dua na vugona, ka dua na makubuna yalewa. E tu na noqu itavi—kei na veivakalougatataki—baleta ni o au na lewe ni dua na matavuvale. Kevaka mada ga me o au duadua ga na lewe ni noqu matavuvale se bula tiko, au se lewe tiko ga ni matavuvale ni Kalou, ka tu na noqu itavi meu vukea na kena vaqaqacotaki na veimatavuvale tale eso.’”
E kalougata dina, eda sega ni tu duadua ga ena noda sasaga. “Na veivuke uasivi duadua,” e kaya o Sisita Thompson, “ena kena vaqaqacotaki na noda veimatavuvale sa ikoya me da kila ka muria na ivunau nei Karisito ka vakararavi Vua me vukei keda.”2
Mai na iVolanikalou
Na Vosa Vakaibalebale 22:6; 1 Nifai 1:1; 2 Nifai 25:26; Alama 56:46–48; Vunau kei na Veiyalayalati 93:40
Mai na Keda iTukutuku Makawa
“Ni veiqaravi vakaikava ni peresitedi raraba ni iSoqosoqo ni Veivukei o Sisita Bathsheba W. Smith [mai na 1901 ki na 1910], a raica o koya na gagadre me vaqaqacotaki na matavuvale, sa mani tauyavutaka kina na nodra lesoni ni vuli na tina me baleti ira na marama ni iSoqosoqo ni Veivukei. Na lesoni oqo e okati kina na ivakasala ni vakamau, na veiqaravi ni bera na vakasucu, kei na susu gone. Na veilesoni oqo e tokona na ivakavuvuli nei Peresitedi Joseph F. Smith me baleta na nodra vukei mai na iSoqosoqo ni Veivukei na marama me baleta na nodra itavi e vale:
“‘Ni basika na lecaika se na sega na kila ka me baleta na matavuvale, itavi ni matavuvale, me baleta na icolacola e dodonu me tiko kei na kena e tu ena kedra maliwa na veiwatini kei na kedra maliwa na itubutubu kei ira na gone, sa tu se tu voleka kina na isoqosoqo oqo, ia mai na isolisoli kei na veivakauqeti ka nona na isoqosoqo oqori era sa vakarau tu kina me ra veivakaroti ena idusidusi ki na veitavi bibi oqo.’”3
© 2011 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. iVakadewa ni Visiting Teaching Message, February 2012. Fijian. 10362 858