Te Rongorongo ibukin te Reirei ni Kaakawari, Beberuare 2012
Taan Tararua n Te Mweenga
Kamatebwaia te reirei aei ao, n angaraoina, maroroakinna ma aine ake ko kawariia. Kabonganai titiraki bwa e aonga ni buokiko ni kakorakoraia tarim ao ni karaoa te Bootaki n Aine bwa iteran maium ae kakammwakuri
Onimaki, Utu, Ibuobuoki
“Ngkoe te tia tararuai mweenga,” e taku Beretitenti Gordon B. Hinckley (1910–2008) ngke e kabwarabwaraa “Te Utu: Te Katanoata nakon te Aonaaba” n aia maungatabu ni kabuta te Bootaki n Aine n te 1995. “Ngkami ake kam na karikia ataei. Ngkami ake kam na kaikawaia rake ao ni karinna inanoia katei inanon maiuia. Akea te mwakuri ae kakannato riki nakon tararuakiia natin te Atua aine ao mwaane.”1
E a kaniia 17 te ririki ngkai are e a tia te katanoata aei ni kakorakoraira bwa tabera ae rangin ni kakawaki e boboto iaon kakorakorakia utu ao mweenga—n aki tabe ma ara kanganga ae ngkai. Barbara Thompson, te kauoman ni kauntira ngkai n te beretitentii ni kabuta n te Bootaki n Aine, e mena n te Salt Lake Tabernacle ngke Beretitenti Hinckley e moan wareka te katanoata. “Bon te tai ae moan te kakanato,” e uringa. “I namakina aron kakawakin te rongorongo. I namakinna naba bwa I iango, ‘Aio te kawai ae moan te kakawaki nakoia kaaro. Bon te tibwanga naba ae tamaroa ibukiia kaaro.’ I iango teutana n te tai aei bwa e aki rangin ni kaineti nakoiu ibukina bwa akea buu ao akea naba natiu. Ma I waekoa n iango, ‘Ma e aki kaineti nakoiu. Ngai kaain te utu. Ngai te nati te aine, te titita, te tina, te tari, te nati, ao te tibu te aine. Iai mwiokoau—ao kakabwaiakiu—ibukina bwa ngai bon kaain te utu. E ngae ngke ti ngai man au utu ae maiu, I teimatoa n riki bwa kaain ana utu te Atua, ao iai tibwangau bwa n na buokia ni kakorakoraia utu ake tabeua.’”
Ti kakatonga, bwa tiaki tiku ni maroa n ara mwakuri. “Te kabanea ni kakawaki n ibuobuoki,” e taku Titita Thompson, “ti na karekea man kakorakorakiia utu bon atakin ao irakin ana reirei Kristo ao n Onimakinna bwa e na buokira.”2
Man Booki Aika Tabu
Taeka n Rabakau 22:6; 1 Nibwaai 1:1; 2 Nibwaai 25:26; Aramwa 56:46–48; Doctrine ao Covenants 93:40
Man Ara Rongorongo ni Kawai
“Ngke Titita Bathsheba W. Smith e beku bwa te ka aman ni beretitenti n te Bootaki n Aine ni kabuta [man 1901 nakon 1910], e noora kainnanoan kakorakorakiia utu, ngaia are e katei reirei ibukiia tiina n te Bootaki n Aine ni kabuta. E karinaki n te reirei aio iaon te mare, tararua iaoia aine aika bikoukou, ao aron kaikawakia ataei. Reirei aikai a boutokaki man ana reirei Beretitenti Joseph F. Smith ibukin te Bootaki n Aine ni buokiia aine iaon tabeia n te mweenga:
“‘Ngkana iai te aki kan ongo ke te aki ota ni kaineti ma te utu, tabeia kaain te utu, ao kabaeakiia ae riai karaoan te etieti imarenan te bumwaane ao te buaine ao imarenaia kaaro ao ataei, ikanne ao te bootaki aei e na rangin kaan riki, ao man kakabwaiaki n te maiu n tamnei, ao ana kairi te tamnei are oin te bootaki aei ana kona ni waakinaki ao ni katauraoaki kaetieti iai ni kaineti ma mwakuri aika kakawaki aikai.’”3
© 2012 by Intellectual Reserve, Inc. All rights reserved. Boretiaki n te USA. Kariaiakana n te Ingiriti: 6/11. Kariaiakan rairana: 6/11. Rairan teVisiting Teaching Message, February 2012. Kiribati. 10362 859