2012
Nengin non Ai Muu
March 2012

Poraus seni Fefin Chon Amwa, March 2012

Nengin non Ai Muu

Kopwe aneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis epwe anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku, Famini, Aninis

Kich noun Semach won Nang kewe nengin. A sinei kich, tongei kich, me a wor an kokot fanitach. Eu kinikinin ena kokot pwe sipwe feito fonufan ne kaeo ne finata mi och seni mi ngaw. Nupwen sia finata ne apwonueta An Kot kewe annuk, sia sufoniti I me sia esinna napanapach pwe noun Kot kewe nengin. Fin Anisi a anisi kich ach sipwe chechemeni ei napanapen nang.

Porausen Fin Anisi a apochokuna me anisi kich. Julie B. Beck, Presetenin Fin Anisi unusan, a apasa: “Ami noun Kot kewe nengin, oua ammonata ren wisemi ese much, me a wor an emon me emon neimi napanapen, nikinikinin, me wisen fefin. Pwarachon famini, mwichen aramas, ei Mwichefen, me ewe kokkotun manau ese much mi anongonong won ami nukuchar. … [Semach won Nang] a mochen Fin Anisi epwe aninis ne apochokuna Aramasan kewe me ammonireta ren ekkewe feiochun ewe tempel. A efisata (Fin Anisi] ne awena Noun kewe nengin ren An angang me awisa ngenir ar repwe aninis non foratan An muu me apochokunan ekkewe imwen Saion.”1

Semach won Nang a ngeni emon me emon kich pwisin ach angang ne aninis non foratan Mun we. A pwan efeiochu kich ren ekkewe niffangen ngun mi namwot ne apwonueta ei angang mi auchea. Seni Fin Anisi, sia tuffichin aea ach kewe niffang ne apochokuna famini, anisi ekkewe mi osupwang, me kaeo ifa usun sipwe manau usun an Jises Kraist kewe chon kaeo.

Preseten Dieter F. Uchtdorf, Aruemonun Chon Aninis non ewe Aewin Presetensi, a kapas usun foforun chon kaeo: “Seni ach tipepos ne fetan won ewe anen chon kaeo, sia pwarata ngeni pwisin kich ukukkun ach nuku me ach mochen etiwa netipen Kot nap seni pwisin netipach.”2

Mi namwot sipwe chechemeni pwe kich noun Kot kewe nengin me sipwe tiniken ne manau usun Noun kewe chon kaeo. Non ach fori iei usun, sipwe aninis ne forata ewe mun Kot won fonufan me sipwe winiti nimenimoch ne niwinita fan Mesan.

Seni ekkewe Pukfel

Zechariah 2:10; Annuk me Pwon 25:1, 10, 16; 138:38–39, 56; “An Ewe Famini: Esinesin Ngeni Ei Fonufan” (Liahona me Ensign, Nov. 2010, 129)

Seni Ach Uruo

Won April 28, 1842, ewe Soufos Joseph Smith a apasa ngeni ekkewe fefin non Fin Anisi: “Iei fansoun nonnonumi a mut ngeni kemi ami oupwe angang anongonong won ewe kirokiroch Kot a fotukanong non pwisin [ami]. … Ika oua manau ngeni tufichimi, use tongeni amwochu ekkewe chon nang seni ar repwe chienemi.”3

Zina D. H. Young, ewe unumonun presetenin Fin Anisi unusan, a esinna ewe manamanen Fin Anisi ne angang ngeni ekkoch me anisi emon me emon ne fefeita non nuku, iwe non 1893 a pwon ngeni ekkewe fefin, “Ika oupwe resin kutta non anonnonen pwisin netpemi oupwe kuna, ren aninisin Ngunun ewe Samon, ewe faw mi auchea, ewe kapasen pwaratan ei angang.”4

© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun Visiting Teaching Message, March 2012. Chuukese. 10363 901

Esinesin

  1. Julie B. Beck, “‘Nengin non Ai Muu’: Ewe Porausen me Angangen Fin Anisi,” Liahona, Nov. 2010, 112, 114.

  2. Dieter F. Uchtdorf, “Anen Ewe Chon Kaeo,” Liahona, May 2009, 76.

  3. Joseph Smith, non History of the Church, 4:605.

  4. Zina D. H. Young, “Ifa usun Ua Angei Ai Kapasen Pwaratan ewe Ellet,” Young Woman’s Journal, Apr. 1893, 319.

Met Ua Tongeni Fori?

  1. Ifa usun ua tongeni anisi pwi kewe ar repwe tori tufichir usun noun Kot kewe nengin?

  2. Ifa usun ua tongeni anganga non pwisin manauei ewe aurour me kapasen esinesin ngeni fefin non Doctrine and Covenants 25?

Printini