iVaqa ni Veisiko, Maji 2012
Luvequ Yalewa ena Noqu Matanitu
Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.
Vakabauta, Matavuvale, Veivukei
Eda luvena yalewa na Tamada mai Lomalagi. E kilai keda o Koya, lomani keda, ka sa tuva tu e dua na ituvatuva baleti keda. E okati me tiki ni ituvatuva oqori na lako mai ki vuravura ka vulica na digia na vinaka mai na ivalavala ca. Eda rokovi Koya ka vakaraitaka noda ivakatakilakila ni da luvena yalewa na Kalou ena noda digia me da taqomaka na ivakaro ni Kalou. E vukei keda na iSoqosoqo ni Veivukei me da nanuma na isolisoli vakalou oqo.
Na iSoqosoqo ni Veivukei kei na kena itukutuku makawa e veivaqaqacotaki ka tokoni keda. E kaya o Julie B. Beck, na peresitedi raraba ni iSoqosoqo ni Veivukei: “Me vaka o ni luvena yalewa na Kalou, o ni sa vakavakarau tu me baleta na ilesilesi tawamudu, ka sa tu na nomuni ivakatakilakila yadudua vakayalewa, itutu, kei na itavi. Na taucoko ni matavuvale, vakaitikotiko, na Lotu oqo, kei na ituvatuva vakamareqeti ni veivakabulai e sa vakatau sara ga ena nomuni yalodina. … [Na Tamada Vakalomalagi] e nakita na iSoqosoqo ni Veivukei me vukea nodra tarai cake na Nona tamata ka vakarautaki ira ena veivakalougatataki ni valetabu. A tauyavutaka na [iSoqosoqo ni Veivukei] me tuvai ira na Luvena yalewa vata kei na Nona cakacaka ka volai na nodra veivuke ena kena tarai cake na Nona matanitu ka vaqaqacotaka na veivuvale e Saioni.”1
E solia vei keda na Tamada mai Lomalagi na mataqali cakacaka me vukea na tarai cake ni Nona Matanitu. E sa vakalougatataki keda tale ga ena isolisoli vakayalo eda gadreva me da rawata kina na mataqali cakacaka vakaoqo. E tu vei keda na madigi mai na i Soqosoqo ni Veivukei, me da vakayagataka na noda isolisoli me vakaqaqacotaki kina na veimatavuvale, vukei ira era gadreva tu na veivuke, ka vulica noda bulataka vakacava me da vaka na tisaipeli i Jisu Karisito.
O Peresitedi Dieter F. Uchtdorf, iKarua ni Daunivakasala ena Mataveiliutaki Taumada, a kaya me baleta na vakatisaipeli: “Ena noda lako voli ena gaunisala ni vakatisaipeli ena yalovosota, eda vakaraitaka kivei keda na ivakarau ni noda vakabauta kei na noda guta me da ciqoma na lewa ni Kalou mai na noda lewa vaka ikeda.”2
Me da nanuma tiko ni da luvena yalewa na Kalou ka saga na bula vaka Nona tisaipeli. Ena noda cakava oqori, eda na vukea na kena tarai cake na matanitu ni Kalou ena vuravura oqo ka yaco me da kililiki ena noda lesu ki na Nona iserau.
Mai na iVolanikalou
Sakaraia 2:10; Vunau kei na Veiyalayalati 25:1, 10, 16; 138:38–39, 56; “Na Matavuvale: Ai Vakaro ki Vuravura Raraba” (Liaona kei na Ensign, Nove. 2010, 129)
Mai na Keda iTukutuku Makawa
Ena ika 28 ni Epereli, 1842, a kaya na Parofita o Josefa Simici kivei ira na marama ena iSoqosoqo ni Veivukei: “Ko ni sa mai vakatikori tu oqo ena dua na itavi mo ni cakacakataka kina na yalo dauloloma sa solia [e lomamuni] na Kalou. … Kevaka ko ni na rawata tiko mo ni caka dodonu, era na sega ni tarovi na agilosi me ra mai nomuni itokani.”3
Na vakilai ni kaukauwa ni iSoqosoqo ni Veivukei ena nodra qaravi ira na tani ka vukea na tamata yadua me ra vakarabailevutaka na nodra vakabauta, o Zina D. H. Young, ikatolu ni peresitedi raraba ni i Soqosoqo ni Veivukei, a yalataka vei ira na marama ena 1893, “Kevaka mo ni vakasaqara e yalomuni o ni na kunea, ena veivuke ni Yalo ni Turaga, na mataniciva talei, na ivakadinadina ni cakacaka oqo.”4
© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 611. Vakadonui me vakadewa: 6/11. iVakadewa ni Visiting Teaching Message, March 2012. Fijian. 10363 858