2012
Tuhlihk Muhtwacn ke Tohkohsrahi Luhk
March 2012

Pweng ke Forfor Luti, Mahs 2012

Tuhlihk Muhtwacn ke Tohkohsrahi Luhk

Lutlutkihn kuhfa inge, ac ke pacl fal, sramsramkihn yurin tahmtahel ma kom muhtwacta nuh yohroh an. Orekmakihn kihsen siyuck an in kahsrwe kom ahkkweye tahmtahel wiyom an ac in orwaclah ip fokoko se ke U in Kahsruh luhn Muhtwacn ke moul lom sifacna an.

Luhlahlfongi, Sucu, Kahsruh

Kuht pa tuhlihk muhtwacn nuhtin Pahpah tuhmasr Inkuhsrao. El etwe kuht, luhngse kuht, ac oasr plwacn Lal nuh sesr. Ipin plwacn se inge pa in tuhkuh nuh facluh in luti in sulaclah ma wo fin ma koluk. Ke kuht sulwaclah in karihngihn masap luhn God uh, kuht ahkfuhlwactyacl ac tuhkahkihn kuht tuh kuht tuhlihk muhtwacn nuhtin God. U luhn Muhtwacn in Kahsruh uh kahsrwe kuht in esam ma muhtahl se inge.

U luhn Muhtwacn in Kahsruh ac sramsram mahtuh kac uh ahkkweye ac tahpuhk kuht. Julie B. Beck, prestuhn luhlahp luhn U luhn Muhtwacn in Kahsruh, el fahk: “In oacna tuhlihk muhtwacn nuhtin God, kowos ahkoo nuh ke pakpuck ma pahtpaht, ac kais sie suwos oasr luhmah se, ohiyac se, ac ma kunwacn muhtwacn se yohroh. Orwaclah wo luhn sucu, acn, Alu sie inge, ac plwacn sacohk luhn molwelah uh wiwina luhlahlfongi lom an. … [Pahpah Tuhmasr Inkuhsrao] El orwaclah U luhn Muhtwacn in Kahsruh in kahsruh muhsahi mwet Lal ac ahkoeloslac nuh ke mwe insewowo luhn tempuhl. El akiyac [U luhn Muhtwacn in Kahsruh] in ahksuwohsye tuhlihk muhtwacn Nahtuhl ke orekma Lal ac in eis kahsruh laltahl in muhsahi tohkohsrahi Lal ac ahkfokokoye lohm sin Zion.”1

Pahpah tuhmasr Inkuhsrao El acse nuh sesr kain orekma se in kahsruh muhsahi Tohkohsrahi Lal. El oacyacpac use mwe insewowo luhn mwe sang ke ip luhn nguhn kuht enenuh in orwaclah kain orekma se inge. Ke U luhn Muhtwacn in Kahsruh, oasr pacl wowo lasr in orekmakihn mwe sang lasr in ahkfokokoye sucu uh, kahsruh mwet suc enenuh kahsruh, ac lutlutkihn ohiyen moul oacna sie mwet tuhma lutlut luhn Jisus Kraist.

Prestuhn Dieter F. Uchtdorf, Mwet in Kahsruh Ahkluo ke Prestuhnsi Se Met, fahkwack ke mwet tuhma lutlut: “In mong fihsracsr in fahsr ke inkacnek luhn mwet tuhma lutlut uh, kuht srihkacack nuh sesr sifacna luhpan luhlahlfongi ac kena lasr in insese nuh ke luhngse luhn God liki na luhngse lasr.”2

Lwelah kuht in esam lah kuht pa tuhlihk muhtwacn nuhtin God ac srihke in moul oacna sie mwet tuhma lutlut Lal. Ke kuht oruh ohinge uh, kuht kahsruh muhsahi tohkohsrahi luhn God inge fin facluh ac nwacsnwacslah in fohlohk nuh Yohrohl.

Ke Ma Suhmuhslah uh

Zechariah 2:10; Doctrine and Covenants 25:1, 10, 16; 138:38–39, 56; “Sucu: Sie Mwe Fahkwack nuh fin Facluh” (Liahona ac Ensign, Nohfuhmpuh 2010, 129)

Ke Ma Mahtuh Lasr

Ke Eprel 28, 1842, Mwet Pahluh Joseph Smith el fahk nuh sin tahmtahel ke U luhn Muhtwacn in Kahsruh ah: “Ingena kowos oasr ke ohiyac ma kowos kuh in oruh ke pahkomuhta ma God El sang nuh [suwos]. … Kowos fin ahkfalye moul lowos an, lihpufacn uh tiac kuh in tilokihnyucki in wi kowos.”3

Akihlen kuh ke U luhn Muhtwacn in Kahsruh in kuhlwacnsapuh mwet sahyac ac in kahsruh kais sie mwet in ahkyohkye luhlahlfongi, Zina D. H. Young, prestuhn luhlahp ahktolu luhn U luhn Muhtwacn in Kahsruh, el olwelah nuh sin tahmtahel uh ke 1893, “Kowos fin suk ke loaliyen insiyowos sifacna kowos tuhfah konwacack, ke kahsruh ke Nguhn luhn Leum, mwe sang sacohklacna, fahkwack luhlahlfongi ke orekma se inge.”4

© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn Visiting Teaching Message, March 2012. Kosraean. 10363 868

Mwe kahsruh

  1. Julie B. Beck, “‘Daughters in My Kingdom’: The History and Work of Relief Society,” Liahona, Nohfuhmpuh 2010, 112, 114.

  2. Dieter F. Uchtdorf, “The Way of the Disciple,” Liahona, Mei 2009, 76.

  3. Joseph Smith, ke History of the Church, 4:605.

  4. Zina D. H. Young, “How I Gained My Testimony of the Truth,” Young Woman’s Journal, Eprel 1893, 319.

Meac Nga Kuh In Oruh?

  1. Nga kuh in kahsruh tahmtahel wiyuck uh fuhkah in sun kuhiyaclos in oacna tuhlihk muhtwacn nuhtin God?

  2. Nga kuh in orekmakihn fuhkah nuh ke moul luhk uh kahs in kahsruh ac ma kalyeiyuck nuh sin muhtwacn uh ke Doctrine and Covenants 25?