Mensahe sang Unang Panguluhan, Abril 2012
“Nabanhaw Sia”
Panaksihon sang isa ka Propeta
“Ang mabaskog nga pahayag sang bug-os nga Kristiyanismo,” siling ni Pangulong Thomas S. Monson, amo nga si Jesus sang Nasaret nabanhaw gikan sa kamatayon. “Ang kamatuoran sang Pagkabanhaw nagahatag sa tanan-tanan sang paghidaet nga nagalabaw sa tanan nga paghangop” (tan-awa sa Mga Taga-Filipos 4:7).1
Sa masunod nga mga pahayag, si Pangulong Monson nagapaambit sang iya panaksihon kag pagpasalamat para sa Pagkabanhaw sang Manluluwas kag nagapahayag nga bangod gindaug sang Anak ang kamatayon, ang tanan sang mga anak sang Amay nga nagakari sa duta magakabuhi liwat.
Kabuhi sa pihak sang Pagkamamalatyon
“Nagapati ako nga wala sang isa sa aton ang sarang makahangop sing bug-os nga kahulugan sang ginhimo ni Cristo para sa aton sa Getsemane, apang nagapasalamat ako adlaw-adlaw sang akon kabuhi para sa Iya nagapasag-uli nga sakripisyo para sa aton.
“Sang katapusan nga tion, mahimo Sia kuntani nga mag-isol. Apang wala Niya ini ginhimo. Gin-agyan Niya ang tanan nga mga butang agud nga maluwas Niya ang tanan nga mga butang. Sa paghimo sini, ginhatagan Niya kita sang kabuhi sa pihak sining mamalatyon nga kabuhi. Ginbawi Niya kita gikan sa Pagkapukan ni Adan [Fall of Adam].
“Sa kaidadalman sang akon kalag, nagapasalamat ako sa Iya. Gintudloan Niya kita kon paano magkabuhi. Gintudloan Niya kita kon paano mapatay. Ginsiguro Niya ang aton kaluwasan.”2
Pagtabog sang Kadulom sang Kamatayon
“Sa pila ka mga sitwasyon, halimbawa sa dako nga pag-antos kag pagbalatian, ang kamatayon nagaabot bilang anghel sang kaluoy. Apang sa masami, ginahunahuna naton ini bilang kaaway sang tawhanon nga kalipayan.
“Ang kadulom sang kamatayon sa masami mahimo tabugon sang kasanag sang ginapahayag nga kamatuoran. ‘Ako ang pagkabanhaw, kag ang kabuhi,’ pahayag sang Manunudlo. ‘Ang nagatuo sa akon, bisan mapatay sia, apang magakabuhi: Kag ang bisan sin-o nga nagakabuhi kag nagatuo sa akon indi na gid mapatay.’
“Ining pagpasalig—huo, ang balaan nga kompirmasyon—sang kabuhi sa pihak sang kamatayon ang sarang makahatag sang paghidaet nga ginsaad sang Manluluwas sang Sia nagpasalig sa Iya mga disipulo: ‘Ang paghidaet ginabilin ko sa inyo, ang akon paghidaet ginahatag ko sa inyo: Indi subong sang paghatag sang kalibutan, ang paghatag ko sa inyo. Dili malisang ang inyo mga tagipusuon, ukon mahadlok.’”3
Wala Sia Diri
“Ang aton Manluluwas nabuhi liwat. Ang pinakamahimayaon, makapasulhay, kag makapasalig sa tanan nga mga hitabo sang tawhanon nga maragtas ang natabo na—ang kadalag-an batok sa kamatayon. Ang kasakit kag kalisud sang Getsemani kag Kalbaryo ginpanas. Ang kaluwasan sang katawhan ginsiguro. Ang Pagkapukan ni Adan ginbawi.
“Ang wala’y unod nga lulubngan sadtong una nga aga sang Paskua sang Pagkabanhaw amo ang sabat sa pamangkot ni Job, ‘Kon ang isa ka tawo mapatay, magakabuhi bala sia liwat?’ Sa tanan nga makabati sang akon tingug, ginapahayag ko, Kon ang isa ka tawo mapatay, magakabuhi sia liwat. Nakahibalo kita, bangod yara sa aton ang kasanag sang ginpahayag nga kamatuoran. …
“Pinalangga kong mga kauturan, sa tion sang aton tuman nga kalisud, sarang kita makabaton sing dako nga paghidaet gikan sa mga pulong sang anghel sadtong una nga aga sang Paskua sang Pagkabanhaw: ‘Wala Sia diri: bangod nabanhaw sia.’”4
Ang Tanan Magakabuhi Liwat
“Nagakadlaw kita, nagahibi kita, nagaobra kita, nagahampang kita, nagahigugma kita, nagapangabuhi kita. Kag dayon mapatay kita. …
“Kag magapabilin kita nga patay kon indi tungod sa isa ka Tawo kag sa Iya misyon, nga si Jesus sang Nasaret. …
“Sa bug-os ko nga tagipusuon kag sa kapagsik sang akon kalag, ginabayaw ko ang akon tingug sa pagpanaksihon bilang isa ka pinasahi nga saksi kag ginapahayag nga ang Dios matuod nga buhi. Si Jesus ang Iya Anak, ang Bugtong nga Inanak sang Amay sa unod. Sia ang aton Manunubos; Sia ang aton Manugpatunga sa Amay. Sia amo yadtong napatay sa krus sa pagpasag-uli sang aton mga sala. Sia ang nangin panganay sang Pagkabanhaw. Bangod napatay Sia, ang tanan-tanan magakabuhi liwat.”5
Isa ka Personal nga Panaksihon
“Ginapahayag ko ang akon personal nga panaksihon nga ang kamatayon gindaug, ang kadalag-an batok sa lulubngan naagom. Kabay nga ang mga pulong nga ginhimo nga sagrado Niya nga nagtuman sang mga ini mangin aktwal nga ihibalo sa tanan-tanan. Dumduma ang mga ini. Halungi ang mga ini. Pasidunggi ang mga ini. Nabanhaw Sia.”6
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, April 2012. Hiligaynon. 10364 861
Pagtudlo gikan sa Sining Mensahe
Pagkatapos nga magpaambit sang mga sinambit nga mga pulong gikan sa mensahe ni Pangulong Monson, tamda ang panaksihon nga iya ginapahayag parte sa matuod-tuod nga kahulugan sang Paskua sang Pagkabanhaw. Mahimo mo pamangkuton ang mga miyembro sang pamilya sang masunod: “Ano ang kahulugan sa inyo nga ang isa ka buhi nga propeta nagapanaksihon parte sining mga kamatuoran karon nga panahon? Paano ninyo madapat ang mga ini sa inyo kabuhi?” Binagbinaga ang pagdugang sang imo panaksihon.