Ennaan eo an Būreejtōnji eo Kein Kajuōn, Māe 2012
Iāekwōj eo an Mour
Jaar itok jān ia? Jej ita ijin? Jej etal n̄an ia eļan̄n̄e jej likūt mour in? Ejjeļo̧k aikuj n̄an kajjitōk kein repād wōt ilo aer jab uwaak.
Ro jeiū im jatū jitōn bōro, jibon̄ōn̄ in Ikōņaan kōnono n̄an kom̧ kōn m̧ool ko an indeeo—m̧ool ko renaaj kōm̧weieik mour ko ad im lo ad kōjparok ilo m̧weo im̧ōd.
Jikin otemjej armej rej pād ilo kōkairiir. Baļuun ko rej kaiiūm̧ kōn m̧weiuk ko m̧weien armej kijoone laļ ko reļļap im m̧alo ko reļļap bwe kweilo̧k in pejnej ko ren maron̄ kōm̧m̧an, eddo eo en maron̄ tōprak, kakkije ko maron̄ lan̄lōn̄ kaki, ak loļo̧k ko an baam̧le. Iaļ ko jikin otemjej—ekoba būriwe ko, iaļ ko, motorway ko—rej bōkļo̧k milien waan ito itak ko, robrak kōn elōn̄ ļo̧k milien armej ro, ilo juon ibeb im elōn̄ wūn ko roktak ilo ad kōkairiir kōn jerbal eo an kajjojo raan.
Ilo mour in jenan̄in ke kar bōjrak jidik im kōļmenļo̧kjeņ—aaet kōn ļōmņak ko rem̧ool im ejjeļo̧k jem̧ļo̧kier?
N̄e jej keidi n̄an m̧ool ko an indeeo, enan̄in aolep kajjitōk ko im inepata ko aolep iien ad mour relukkuun ejjeļo̧k tokjāer. Jenaaj kōjota ta? Jej unook kōn kōļar ta ettōņaak eo? Johnny eaikuj ke ikkure ilo juon tiim in jōkad eboļōmen? Kajjitōk kein im ko āinļo̧k wōt kein reddik rej jako jon̄an aorōk ko aer eļan̄n̄e ej jerjer im waļo̧k iien ko rōkauwōtata, eļan̄n̄e ro jeokwe rej metak im jorrāān, eļan̄n̄e juon ej jino nan̄inmej, eļan̄n̄e juon elukkuun do̧o̧lo̧l, im mej ej kōtmāne eo. Ļōmņak ko ad rej erom pedped wōt ioer, im epidodo kiiō ad maron̄ kūle ta eo elukkuun aorōk im ta eo ejjab lukkuun aorōk.
Iaar loļo̧k juon kōrā eo eaar tariņaeik juon nan̄inmej ekauwōtata kōn enan̄in ruo jim̧a iiō ko. Eaar kwaļo̧k bwe ke eaar bar jino nan̄inmej, raan ko an raar obrak kōn m̧akūtkūt ko āinwōt karreoik m̧weo im̧ōn im kainōknōk e kōn m̧weiuk ko im aiboojoj. Eaar lale jikin nuknuk eo an ruo kōttan juon wiik im joļo̧k jāān im iien kajjojo allōn̄ wia nuknuk. Ajri ro jibūn raar kajjitōk n̄an jab lotok aolep iien, kōnke aolep iien ej inepata kōn ta eo ej kūle bwe m̧weiuk ko an remaron̄ in rub ak barāinwōt jorrāān jen pā ko reddik im ejjeļo̧k aer kea.
Innām eaar bōk nuuj ko rekaburom̧ōjm̧ōj bwe mour eo an epād ilo kōtmāne bwe emaron̄ mej im bwe ejjab lukkuun bwe an iien ijin. Eaar ba bwe juon iien eaar ron̄ an taktō eo kōmeļeļeik jem̧ļo̧k eo kōn nan̄inmej eo an, eaar kūle iien eo wōt bwe eaikuj in joļo̧k jabdewōt iien ko an āliktata ippān baam̧le eo an im ro m̧ōttan ilo ko̧jpeļ eo ilo pedped in mour eo an, bwe men kein rej bōk jikin ta eo eļap an aiboojoj n̄an e.
Iien ko ewōr tokjāer rej itok n̄an kōj aolep ilo juon wōt kōttan ak bar juon iien, mekarta bōlen ejjab aolep iien juon iien elem̧ōņōņō ak kōn ta eo eaar waļo̧k. Jej lukkuun loe ta eo ej lukkuun wōrtokjen ilo mour ko ad im ewi wāween ad aikuj mour.
Rilo̧mo̧o̧r eo eaar ba:
“Kom̧win jab koorļo̧k m̧weiuk n̄an kom̧ ioon laļ, ijo dile im jo rej kan̄i, im ijo ro ri ko̧o̧t rej rupe im ko̧o̧te:
“A kom̧win koorļo̧k m̧weiuk n̄an kom̧ i lan̄, ijo dile im jo re jab kan̄i, im ijo ro ri ko̧o̧t re jab rupe im ko̧o̧te:
“Bwe ijo m̧weiōm̧ ej pād, barāinwōt būruōm̧ enaaj pād ie.”1
Ilo tōre ko ad kōn eļap kejekļo̧kjeņ ak aikuj eo eļap, jetōb an armej ej tōparļo̧k lan̄ ko, pukōt juon uwaak ekwojarjar n̄an kajjitōk ko reļļap an mour: Jaar itok jān ia? Jej ita ijin? Jej etal n̄an ia eļan̄n̄e jej likūt mour in?
Uwaak ko n̄an kajjitōk kein rejjab pād ilowaan kōbar in bok in kaļļej ko ak jen ad pukōte ilo Intōrnet eo. Kajjitōk kein rej ļe ilōn̄ in mour in. Rej kitbuuj mour indeeo.
Ia eo jej itok jene? Kajjitōk in ej juon ļōmņak em̧ool, eļan̄n̄e ejjab waļo̧k, jen aolep armej.
Rijilōk Paul eaar jiron̄ Kom̧eo ri Aten “kōj ro nejin Anij”2 Kōnke jejeļā bwe ānbwinid rej nejin m̧am̧a im baba ro an kanniōk, jej aikuj kappukōt meļeļe eo an ennaan in an Paul. Irooj eaar kwaļo̧k bwe jetōb eo im ānbwin eo rej jetōb eo an juon armej.3 Kōn menin jetōb eo ej nejin Anij. Rijeje in Hibru eo ej kōnono n̄an E āinwōt “Jemān jetōb raņ.”4 Jetōb ko an aolep armej rej ļaddik im leddik ro Nejin.5
Jemeļeļe bwe boem̧ ko reim̧we ewōr ippāer, ekkatak eo ad kōn unin kōnono in, ennaan ko reim̧we im ļōmņak ko rejejuwaer kar reko̧o̧ti. Rijeje boem̧ in English eo eaar je m̧ool in:
Ad ļotak ej ak juon iien kiki im juon wāween:
Jetōb eaar pād ippād ke jej ļotak ej āinwōt juon iju;
Eaar pād etto m̧okta jen ad kar ļotak tok ilo mour in,
Im eaar itok jān ijo etto ļo̧k:
Jaar jab meļo̧kļo̧k men otemjej,
Im an juon jab lukkuun in pojak:
Kōnke jej kajjojo ej ļotak kōn juon m̧wen̄an ekwojarjar ilo kōj
Jān Anij, eo ej ad kapijuknen:
Āinwōt nin̄nin̄ ro rej ekkeijel n̄an lan̄!6
M̧am̧a im baba ro rej kejekļo̧kjeņ kōn eddo in aer n̄an katakin, n̄an im̧we, n̄an leļo̧k unin tōl, tōl, im waanjon̄ak. Im tōre in m̧am̧a im baba ro rej kejekļo̧kjeņ, ajri ro—im eļap tata jodikdik—rej kajjitōk kajjitōk in eaorōk, etke jej pād ijin? Ekkā an unoojdikdik n̄an jetōb eo im kwaļo̧k, etke ij pād ijin?
Jej aikuj in kam̧m̧oolol bwe juon Rikōm̧anm̧an emāletlet eaar kōm̧anm̧an juon laļ im juon jikin n̄an kōj ijin, ippān juon rōn̄ōl in meļo̧kļo̧k ijo jikid m̧okta bwe jen maron̄ en̄jake juon iien idajon̄jon̄, juon iien em̧m̧an n̄an mālijjon̄e kōj make, n̄an maron̄ in karbōb n̄an men otemjej Anij em̧ōj an kōpooj n̄an kōj n̄an būki.
Emeļeļe, unleplep in jibadbad eo ad m̧okta ioon laļ in ej n̄an bōk ānbwin kanniōk im di. Jaar barāinwōt bōk menin letok an anemkwoj in kālet. Ilo juon taujin wāween ko, jaar jeram̧m̧an n̄an kālet n̄an kōj make. Ijin jej ekkatak jān kōņaan ko reppen an en̄jake an juon make. Jej peek n̄an kālet ikōtaan em̧m̧an im nana. Jej kūle āinwōt ta eo emeo̧ im ta eo etōn̄al. Jej lo bwe ewōr kaje ko rej ekkeijel n̄an m̧akūtkūt ko.
Jen pokake kien ko an Anij, jej maron̄ ekkar n̄an “m̧weo” Jisōs eaar kōnono kake ke Eaar kwaļo̧k: “Ilo im̧ōn Jema elōn̄ jikin. … Ij ilām kōppojak jikōmi … bwe ijo Ij pād ie, barāinwōt kom̧win pād ie.”7
Men̄e jej itok ilo mour in “ļoor kōdo̧ ko raiboojoj,” mour ej em̧m̧akūt m̧aanļo̧k. Jodikdik ej itok ālkin mour in nin̄nin̄, im kekemo̧o̧j ej itok ajjidikdik ilo an pen kūle. Jān en̄jake eo jej ekkatak aikuj eo n̄an tōparļo̧k lan̄ kōn jipan̄ ilo ad etal ilo iaļ eo ad an mour in.
Anij, Jemed, im Jisōs Kraist, ad Irooj, eaar kōkaļļeik iaļ eo n̄an weepān. Rej kūr kōj n̄an ļoor m̧ool ko an indeeo im n̄an erom ro rōweepān, āinwōt Er rōweepān.8
Rijilōk Paul eaar keidi mour in n̄an juon iāekwōj. N̄an Ri Hibru ro eaar rōjan̄, “Jen barāinwōt joļo̧k men otemjej reddo jero̧wiwi eo e nan̄in kōpooļ kōj, im jen kijenmej im ettōr ilo iāekwōj eo em̧ōj likūt im̧aad.”9
Ilo ad lan̄lōn̄, jen jab kaarmejete kapilōk eo emāletlet jān Ekklisiastis: “Iāekwōj e jab n̄an eo e m̧ōkaj wōt, ak ire n̄an eo e kajoor wōt.”10 Em̧ool, oņeān ej etal n̄an e eo ej niknik n̄an jem̧ļo̧kin.
Eļan̄n̄e ij kejekļo̧kjeņ kōn iāekwōj in an mour in, Ij kememej bar juon kain iāekwōj, aaet jān tōre ko iaar ajri. Ro m̧ōtta im N̄a kar ebbōk bakbōk ko reddik ippām im, jān juon wōjke epidodo raan, ļōme waan ikkure jiddik ko. Juon wūjļā kotin etūraan̄kōļ ej ekkeijel, kajjojo renaaj katello̧k waa eo waan epidodo ilo iāekwōj laļ ļo̧k ilo dān ko reiium̧ im kauwōtata ilo Utah Provo River. Kōm̧ naaj ettōr iturerein reba eo im waate wa jiddik ko jet iien rej wanlōn̄ wanlaļ ilo wāween eo enana ilo ņo̧ ko reiium̧ im jet iien rej meļak ilo an dān eo kajoor.
Ilo iāekwōj jab in kōm̧ij kūle bwe juon wa eaar tōl ļo̧k aolep n̄an mejān kajjik eo kar kālete. Ilo ejjeļo̧k kōtmāne, ņo̧ eo eaar bōk ļo̧k e kepaak ļo̧k juon likabijwewe ekilep im kajoor, im wa eo eaar ero̧lool n̄an turājet in im oktak. Ro̧o̧l im bar ro̧o̧l eaar etal wōt, im jab kar maron̄ ro̧o̧lļo̧k n̄an lukkuun ņo̧ eo. Āliktata eaar itok n̄an juon kakkije ejānōm̧m̧an io̧ļapļap in jon̄ak ko rejjab wānōk ej jebooļ e, jirok pen wōt ilo wōjke eo aolep iien.
Waan ikkure ko tōre ko ij ajri ejjeļo̧k aer kiiļ n̄an kōjparok er, ejjeļo̧k baatier n̄an letok tōl, im ejjeļo̧k aer kajoor. Ilo m̧ool, mejān kajjik eo aer eaar ejja iaļ eo wōt an ņo̧ ko—iaļ eo edik ej jum̧ae ie.
Āinļo̧k wōt waan ikkure ko, jaar kakke kōn wāween ko rekwojarjar n̄an tōl ito itak eo ad. Jej deļo̧n̄e mour in jaab n̄an eppāpe kōn ņo̧ ko an mour in rej em̧m̧akūtkūt ak kōn kajoor eo n̄an ļōmņak, n̄an wun eo, im n̄an bōke.
Jemedwōj Ilan̄ eaar jab jilikin tok kōj ioon juon ito itak an indeeo ijjelo̧kin letok jipan̄ ko bwe jen maron̄ bōk tōl jān E n̄an lale bwe jen kōjparok ilo ad jepļaak. Ij kōnono kōn jar. Ij barāinwōt kōnono kōn unoojdikdik ko jān ainikien eo emera, im dik; im ijjab kaarmejete jeje ko rekwojarjar, ko rej kitbuuj naan ko an Irooj im naan ko an rikanaan ro—rej letok n̄an kōj n̄an jipan̄ kōj maron̄ kijoone jem̧ļo̧kin ļain eo.
Ilo jet iien ilo mijen ko ilo mour in, ej waļo̧k iaļ ko ewōr pere ie, ettōn̄dikdik eo em̧ōjņo̧, metak kōn nan̄inmej—aaet jem̧ļo̧kin ami jodikdik, autumn epaaktok, iiō ko rerūtto, en̄jake ko jej ņaetāer mej.
Aolep armej eloļo̧kjeņ ej kajjitōk ippān make kajjitōk eo em̧m̧an an ennaan in jen Job eo etto: “Eļan̄n̄e juon armej e mej, enaaj bar mour ke?”11 Men̄e jej kajjieon̄ jon̄an ad maron̄ n̄an kadiwōjļo̧k kajjitōk eo jen ļōmņak ko ad, aolep iien ej ro̧o̧ltok. Mej ej itok n̄an aolep armej. Ej itok n̄an rūtto ro ilo aer etetal ioon ne ko remōjņo̧. Mej ej waļo̧k ej ron̄ jen ro raar jab tōpar wōt likoļpen mour in ito itak eo aer, jet iien mej ej kalur ainikien ko reļļaaj an ajri ro reddik.
Ak ta eo aorōk kōn juon mour ālkin mej? Robert Blatchford, ilo bok eo an God and My Neighbor, kar jum̧ae kōn tōmak ko an Rikūrijin ro kar errā kaki āinwōt Anij, Kraist, jar, eļap tata jab erreo. Eaar pen ilo an kwaļo̧k bwe mej eaar jem̧ļo̧k eo ilo mour im ejjeļo̧k juon emaron̄ kariab e. Innām juon menin bwilōn̄ eaar waļo̧k. Dipin m̧weo im̧ōn eaar pedakilkil erom bwin̄aln̄al. Eaar mour wōt jab maron̄ bōbrae e make. Jidik n̄an jidik eaar jino en̄jake iaļen ro̧o̧l eo an n̄an tōmak eo eaar kakkure im kōwaane. Ta eo eaar kōm̧m̧ane oktak in ilo an erreilo̧k ilo wāween eo? Kōrā eo pāleen ar mej. Kōn juon bōro erub eaar etal n̄an ruum̧ eo ijo eaar likūt men otemjej ko raar bwinnin mour an kōrā eo pāleen. Eaar bar reilo̧k bar juon alen n̄an mejān eo eaar lukkuun iakwe. Ij diwōjwaj, eaar ba n̄an eo m̧ōttan: “En̄in ej lio̧, im barāinwōt ejjab e eo. Men otemjej ej oktak. Juon men eaar pād ijo m̧okta em̧ōj bōke. Ejjjab e eo. Ta eo emaron̄ etal eļan̄n̄e ejjab jetōb eo?”
Tokālik eaar je: “Mej ejjab ta eo jet armej rej ļōmņake. Ej āinwōt n̄e kwoj etal n̄an bar juon ruum̧. Ilo ruum̧ eo juon jenaaj lo … kōrā ro rejitōn bōro ie, em̧m̧aan ro im ajri ro rem̧m̧an jaar iakwe er im luuji er.”12
Ro jeiū im jatū, jejeļā bwe mej ejjab jem̧ļo̧k eo. M̧ool eo em̧ōj ad ekkatak jen rikanaan ro remour ilo aolep iiō ko. Ej barāinwōt pād ilo jeje ko ad rekwojarjar. Ilo Bok in Mormon eo jej riit naan ko raorōk im rekainōm̧m̧an:
“Kiiō, kōn ļamļam in jetōb eo ikōtaan mej im jerkakpeje eo—Lo, kar kwaļo̧k n̄an eō jān juon enjeļ, bwe jetōb ko an aolep armej, ilo wōt iien eo rej ilo̧k jān ānbwinnin kanniōk in, aaet, jetōb ko an aolep armej, mekarta n̄e rem̧m̧an ak nana, rej ilo̧k n̄an jikier n̄an Anij eo eaar leļo̧k n̄an er mour.
“Innām ālkin men kein, jetōb ko an ro raar jim̧we naaj bōk er ilo juon mejatoto in m̧ōņōņō, eo ņa etan paradise, juon mejatoto in kakkije, juon mejatoto in aenōm̧m̧an, ijo renaaj kakkije jān aolep inepata ko aer im jān aolep ailparo, im būrom̧ōj.”13
Ālkin an kar Rilo̧mo̧o̧r eo debwāāl im Ānbwinnin kar likūt ilo lōb eo ium̧win jilu raan ko, jetōb eo ar bar deļo̧n̄e. Dōkā eo eaar dābwil ļo̧k, im Ripinmuur eo eaar jerkakpeje eaar em̧m̧akūt m̧aanļo̧k, kar nuknuk kōn juon ānbwinnin im diin ejjab wabanban.
Uwaak eo n̄an kajjitōk eo an Job, “Eļan̄n̄e juon armej e mej, enaaj bar mour ke?” kar itok ke Mari im ro jet raar kepaaktok lōb eo im kar lo ruo em̧m̧aan kōn nuknuk ko rerabōļbōļ ro raar kōnono n̄an er: “Etke kom̧ij pukōt eo E mour, ippān ro re mej?”14
Ilo tōprakin anjo̧ eo an Kraist ioon lōb, jenaaj jerkakpeje. En̄in ej lo̧mo̧or an jetōb eo. Paul eaar je: “Barāinwōt ewōr … ānbwin i lan̄, im ewōr ānbwin i laļ, a aiboojoj an ko i lan̄ juon, im eo an ko i laļ āin juon.”15
Ej aiboojoj eo an aļ eo jej pukōte. Ej pād im̧aan mejān Anij ijo jej kōņaan in deļo̧n̄ ie. Ej juon baam̧le n̄an indeeo ijo jekōņaan membōr in. Kōjeram̧m̧an rōt kein kar būki jen juon iien eaitok kōn kajjieon̄, pukōt, ukweļo̧k, im āliktata tōprak.
Jaar itok jān ia? Etke jej pād ijin? Ia eo jej etal n̄ane ālkin mour in? Ejjeļo̧k bar aikuj n̄an kajjitōk kein repād wōt ilo aer jab uwaak. Jān ijo em̧wilaļ an jetōb eo aō im ilo aolep ettā, Ij kam̧ool bwe men kein Iaar kōnono kaki rej m̧ool.
Jemedwōj Ilan̄ ej lan̄lōn̄ ippān ro rej kōjparok bujen ko An. Ej inepata barāinwōt kōn ajri eo ejabwābwe, im jodikdik eo erum̧ij, ej etal ettoļo̧k jān pedped ko an ko̧jpeļ. M̧aajta eo eaar kōnono ilo mera an aolep: “Ro̧o̧ltok. Wanlōn̄tak. Deļo̧n̄tok. Jepļaaktok n̄an m̧weo. Itok n̄an ippa.”
Ilowaan wōt juon wiik jenaaj kemem e Ijtō. Ļōmņak ko ad renaaj oktak ļo̧k n̄an mour eo an Rilo̧mo̧or eo. Mej eo an, im jerkakpeje eo An. Ilo kam̧ool in An eaorōk, Ij kam̧ool n̄an kom̧ bwe Ej mour im bwe Ej kōttar tōprakin jepļaak eo ad. Ro̧o̧lļo̧k jab in enaaj ad, Ij jar ilo Etan ekwojarjar—aaet Jisōs Kraist, ad Rilo̧mo̧o̧r im Ripinmuur, amen.
© 2012 jen Intellectual Reserve, Inc. Aolep jim̧we ko rej pād ippān. Kar jeje ilo Amedka. Kōmālim ilo kajin Pālle eo: 6/11. Kōmālim Ukook eo: 6/11. Ukook eo an First Presidency Message, Māe 2012. Marshallese. 10365 874