Mensahe iti Visiting Teaching, Mayo 2012
Dagiti Bantay nga Ulien
No adda pammatitayo ken ni Jesucristo, dagiti karigatan kasta met dagiti kalakaan a panawen iti biag ket mabalin a bendision.
Nangngegak ni Presidente Spencer W. Kimball, iti maysa a sesion ti komperensia, a nagkiddaw iti Dios nga ikkanna koma kadagiti bantay nga ulienna. Kinunana: “Dadakkel dagiti karit a dumteng kadatayo, dadakkel dagiti gundaway a sanguentayo. Awatek dayta napintas a gundaway ket mariknak nga ibaga iti Apo, a sipapakumbaba, ‘Itedyo kaniak daytoy a bantay,’ itedyo kaniak dagitoy a karit.”1
Natignay ti pusok, gapu ta ammok ti sumagmamano a karit ken rigat ti napasarannan. Nariknak nga ad-adda a tinarigagayak ti agbalin a kas kenkuana, maingel a katulongan ti Dios. Isu nga iti maysa a rabii nagkararagak nga ikkannak iti maysa a pannubok tapno mapaneknekak ti kinaturedko. Malagipko pay laeng daytoy a silalawag. Idi dumteng ti rabii nagparintumengak iti katrek nga addaan iti pammati a dumani namaglippias iti pusok.
Iti uneg ti maysa wenno dua nga aldaw nasungbatan ti kararagko. Nasdaaw ken napakumbabaak iti karigatan a pannubok ti biagko. Dua nga adal ti nasursurok. Umuna, nalawag a napaneknekak a dinengngeg ken sinungbatan ti Dios ti napammatian a kararagko. Ket maikadua, naammuak no apay a nariknak ti sibubukel a pammati iti dayta a rabii a dumteng ti naindaklan a bendision manipud iti panagrigat nga ad-adda pay ngem iti ania man a mapasamak.
Ti rigat a napadasak iti dayta nga aldaw ket kasla bassit no idilig kadagiti rigat a dimteng manipud pay idi kaniak ken kadagiti ipatpategko. Adu kadakayo itan ti makapadas kadagiti pannubok a pisikal, mental, ken emosional a mabalin a makaigapu ti panagsangityo kas iti napasamak iti maysa a naindaklan ken napudno a katulongan ti Dios nga am-ammok unay. Nangngegan ti narsna ti panagsangitna iti mapadpadasanna a sakit, “Inkarigatak ti agbalin a nasingpet iti unos ti biagko, apay a napasamak daytoy kaniak?”
Ammoyo no kasano a sinungbatan ti Apo dayta a saludsod para ken ni Propeta Joseph Smith iti kuartona iti pagbaludan:
Ket no maipisokkanto iti abut, wenno kadagiti ima dagiti mammapatay, ket maipataw kenka ti patay; no maipuruakka iti uneg; ket no pagaambonandaka ti um-umkis a dalluyon; no agbalin a kabusormo ti narungsot nga angin; no agdalungdong ti langit iti sipnget, ket amin a banag agkukunsabo a mangbangon iti dalanmo; ken kangrunaan ti amin no dagiti yo ti impierno ungapendanto ti ngiwatda a mangalun-on kenka, ammuem, anakko, nga amin dagitoy a banag ipaayandaka iti padas, ket agbalindanto a pagsayaatam.
“Ti Anak ti Tao bimmaba iti babaenda amin. Nain-indaklanka kadi ngem isu?
“Ngarud, dika bumdeng, ket agtalinaedto kenka ti kinasaserdote; ta naitudingen ti beddengda, saandanto a makalabas. Ammon dagiti aldawmo, ket mabilbilangen dagiti tawenmo; ngarud, dika agbuteng iti aramiden ti tao, ta addanto kenka ti Dios iti agnanayon nga awan inggana.”2
Panangkunak awan ti napimpintas pay a sungbat iti saludsod no apay a dumteng dagiti pannubok ken no ania ti nasken nga aramidentayo ngem kadagiti balikas ti Apo Mismo, a nakapadas kadagiti pannubok para kadatayo a nakarkaro pay ngem iti mapanunottayo.
Malagipyo dagiti balikasna idi imbalakadna a, gapu iti pammatitayo Kenkuana, nasken nga agbabawitayo:
“Ngarud bilinenkayo nga agbabawi agbabawikayo, no saan dangrankayo babaen ti panaplit iti ngiwatko, ken babaen ti pungtotko, ken babaen ti ungetko, ken nakaronto ti panagsagabayo no kasano ti kakarona diyo ammo, no kasano ti kinain-inakana diyo ammo, wen no kasano ti kadagsen ti imetenyo diyo ammo.
“Ta adtoy, siak, a Dios, sinagabak dagitoy a banag para iti amin, tapno saanda koma nga agsagaba no agbabawida;
“Ngem no saanda nga agbabawi nasken nga agsagabada a kas kaniak;
“A dayta a panagsagaba nangipaay kaniak, uray pay ti Dios, a kaindaklan iti amin, nga aggarigenggen gapu iti saem, ken agdara iti tunggal teterreman, ken agsagaba nga agpada ti bagi ken ti espiritu ket kayatko a saanak koma nga uminum iti napait a kopa, ken kumsen
“Nupay kasta, madaydayaw koma ti Ama, ket nakiranudak ken lineppasko ti panangisaganak kadagiti annak ti tattao.”3
Mamatitayo a ti wagas tapno marimbawantayo dagiti pannubok ket mamatitayo nga adda “balsamo idiay Galaad”4 ken inkari ti Apo, “Dikanto … panawan.”5 Dayta ti insuro kadatayo ni Presidente Thomas S. Monson a mangtulonga kadatayo ken dagiti pagserbiantayo nga addaan kadagiti naliday ken nadagsen a pannubok.6
Ngem nainsiriban nga insuro pay ni Presidente Monson a masapul a patibkeren a nasayaat ti pundasion ti pammati tapno magun-od dagita a bendision. Nalabit a nakitayon a kasapulan dayta a pundasion, kas kaniak, iti bangir ti katre ti maysa a tao a nakasagana a sumuko iti laban nga agibtur agingga iti panungpalan. No saan a natibker a naimula ti pundasion ti pammati iti puspusotayo, saantayo a makapagibtur.
Panggepko ita nga iladawan ti ammok no kasano a mabangontayo dayta saan a marebba a pundasion. Sipapakumbabaak a mangaramid iti daytoy para iti dua a gapu. Umuna, ti sawek ket mabalin a mangupay iti sumagmamano a marigatan iti baet ti dakkel a pannubok ken makarikna a marebrebba ti pundasion ti pammatida. Ken maikadua, ammok a makapadasak kadagiti nakaro a pannubok sakbay nga aggibus ti biagko. Ngarud, ti ibalakadko kadakayo ket masapul a paneknekan ti bukodko a panagibtur agingga iti panungpalan.
Idi baroak, nagtrabahoak iti maysa a kontratista iti panagikabil iti footing ken pundasion para kadagiti baro a balay. Iti pudot ti init narigat nga isagana ti daga para iti porma wenno sukog a pangibukbokanmi iti semento para iti footing. Awan pay dagiti makinaria. Nagusarkami iti piko ken pala. Narigat ti agaramid kadagiti natitibker a pundasion para kadagiti pasdek kadagidi a panawen.
Kasapulanna pay daytoy ti anus. Kalpasan a naibukbokmi ti semento iti footing, inuraymi daytoy a mamagaan. Kayatmi man a mayalisto ti trabaho, inuraymi pay a malpas a maibukbok ti semento para iti pundasion sakbay nga inikkatmi dagiti porma.
Ken ti ad-adda a makaawis iti maysa a baro a karpintero ket ti kasla narigat ken nabayag a panagikabil kadagiti landok a siaaannad iti uneg dagiti porma tapno mangpatibker iti pundasion.
Iti kasta met la a wagas, masapul nga isagana a nasayaat ti daga para iti pundasion ti pammatitayo tapno masarkedan dagiti bagyo a dumteng iti biag ti tunggal maysa. Ti natibker a batayan ti pundasion ti pammati ket ti bukod nga integridad.
No kanayon nga agpilitayo iti rumbeng iti kanito nga agpilitayo, tumibker ti pundasion ti pammatitayo. Mabalin a mangrugi daytoy iti kinaubing gapu ta naipasngay ti tunggal kararua nga addaan iti awan bayadna a sagut ti Espiritu ni Cristo. Babaen dayta nga Espiritu maammuantayo no nagaramidtayo iti rumbeng iti sango ti Dios ken no biddut ti naaramidtayo iti imatangna.
Dagita a pili, a gagangay a ginasgasut, ket mangisagana iti pundasion a pakabangonan ti pasdek ti pammatitayo. Ti landok iti igid a nangibukbokan iti pammatitayo ket ti ebanghelio ni Jesucristo, a kadua ti amin a katulagan, ordinansa ken pagbatayan daytoy.
Maysa kadagiti tulbek iti managibtur a pammati ket ti umisu a panangeddeng no umdas kadin ti kinapigsa daytoy. Isu a saanak a nalaing nga agkararag a nasapa unay iti biagko nga ikkannak kadagiti bantay nga ulien ken daddadakkel a pannubok.
Saan a madagdagus a tumibker ti pammati iti panaglabas ti panawen, no di agkasapulan daytoy iti umdas a panawen. Saan nga umdas ti panaglakay wenno panagbaket. Ti napasnek a panagserbi iti Dios ken kadagiti pada a tao iti amin a puso ken kararua ti mangpabalin iti pammaneknek iti kinapudno a natibker a naespirituan a pigsa.
Ita, tarigagayak nga allukoyen dagiti addaan iti nadadagsen a pannubok, a makarikna a kumapkapsuten ti pammatida gapu ti idadarup dagiti pakarikutan. Ti parikut mismo ket mabalin a wagas a mangpapigsa ket iti kamaudiananna nakagun-od iti saan a maisin a pammati. Imbaga kadatayo ni Moroni, ti anak ni Mormon iti Libro ni Mormon, no kasano a matagikuatayo dayta a bendision. Insurona ti simple ken napintas a kinapudno a ti panagtignay nga addaan iti bassit a pammati ket mangipalubos iti Dios a mangpadakkel iti daytoy:
“Ket ita, siak, ni Moroni, adda ibagak maipanggep kadagitoy a banag; ipakitak iti lubong a bambanag ti pammati a mabalin a namnamaen ken saan a makita; gapuna, saanyo a balusingsingen gapu ta diyo makita, ta awan ti maawatyo a saksi agingga iti pannakasuot ti pammatiyo.
“Ta babaen ti pammati ti nagpakitaan ni Cristo kadagiti ammatayo, kalpasan ti ibabangonna iti tanem; ket saan a nagpakita kadakuada agingga a naaddaanda iti pammati kenkuana; gapuna nasken unay nga adda pammati dagiti dadduma kenkuana, ta saan a nagpakita iti lubong.
“Ngem nagpakita iti lubong gapu iti pammati dagiti tao, ket intan-okna ti nagan ti Ama, ken nangisagana iti pamuspusan a mabalin a pakiranudan dagiti dadduma iti nailangitan a sagut, ta bareng no mangnamnamada kadagidiay banag a di makita.
“Gapuna, mabalinyo met ti maaddaan iti namnama, ken makiranud iti sagut, no adda la ketdi pammatiyo.”7
Dayta a pammati a kapatgan ken nasken a saluadan ken usarenyo agingga a kabaelanyo ket isu ti pammati ken ni Apo Jesucristo. Insuro ni Moroni ti bileg dayta a pammati iti kastoy: “Ket awan ti nagutugotda a milagro iti kaano man agingga a namatida; gapuna immuna pay a namatida iti Anak ti Dios.”8
Binisitak ti maysa a babai nga immawat iti milagro ti umdas a pigsa a mangibtur iti saan a nimannama a pannakapukaw babaen ti simple a panangulitna nga awan sardayna kadagiti balikas, “Ammok a Nabiag ti Mannubbotko.”9 Dayta a pammati ken balikas ti pammaneknek ket adda pay laeng iti tengnga ti angep a nagpalidem ngem saan a nangpunas kadagiti lagip ti kinaubingna.
Nasdaawak idi naammuak a namakawan ti sabali pay a babai iti maysa a tao a nabayagen a nakabasol kenkuana. Nasdaawak ket sinaludsodko no apay a pinilina a pakawanen ket lipaten ti panangikuskuspilna iti uneg ti nakaad-adun a tawen.
Kinunana a siuulimek, “Daytoy ti karigatan a banag a naaramidkon, ngem ammok laeng a nasken nga aramidek daytoy. Isu nga inaramidko.” Ti pammatina a pakawanento ti Mangisalakan isuna no pinakawanna dagiti dadduma ket nangisagana kenkuana a pumusay a sitatalna ken addaan namnama sumagmamano laeng a bulan kalpasan a pinakawanna ti saan nga agbabbabawi a kabusorna.
Sinaludsodna kaniak, “No addaakon idiay, kasanonto ti kasasaadko idiay langit?”
Ket kinunak, “Ti ammok laeng gapu iti nakitak a kabaelam a mamati ken mamakawan a daytoyto ti agbalin a napintas a panagsublim.”
Adda pay maysa a panangallukoy kadagiti agpampanunot ita no umdasen ti pammatida ken ni Jesucristo tapno makapagibtur agingga iti panungpalan. Nagasatak a nakaam-ammo dagiti dadduma pay kadakayo a dumdumngeg ita idi naub-ubingkayo pay, naregta, masirib ngem iti kaaduan iti lawlawyo, ngem piniliyo nga aramiden ti aramid ti Mangisalakan. Iti kinawadwadyo nakasarakkayo kadagiti wagas a mangtulong ken mangaywan kadagiti tao a mabalin a saanyo koma nga inkankano wenno impateg gapu iti kasasaadyo iti biag.
No dumteng dagiti pannubok, addanto kadakayo ti pammati nga ibturanyo a naimbag dagitoy, nga addaankayo a diyo madmadlaw no agtignaykayo a mayannurot iti natarnaw nga ayat ni Cristo, nga agserserbi ken mangpakpakawan kadagiti dadduma kas iti aramiden koma ti Mangisalakan. Binangonyo ti pundasion ti pammati gapu ta nagayatkayo a kas iti panagayat ti Mangisalakan ken nagserbikayo para Kenkuana.
Saan pay a naladaw ti amin tapno papigsaenyo ti pundasion ti pammati. Kanayon nga adda panawen. Babaen ti pammati iti Mangisalakan, makapagbabawikayo ken makadawat iti panmmakawan. Adda maysa a tao a mapakawanyo. Adda maysa a tao a mapagyamananyo. Adda maysa a tao a mapagserbian ken maitag-ayyo. Maaramidyo daytoy sadino man ti yanyo ken kasano man ti kinaliday ken panagmaymaysayo.
Diak maikari nga aggibusen ti rigatyo iti daytoy a biag. Diak maipanamnama kadakayo a kasla saanto nga agbayag dagiti pannubokyo. Maysa kadagiti saguday ti pannubok iti biag ket ti kasla painnayadenna dagiti pagorasan ken kasla dumani agsardengen daytoy.
Adda dagiti gapu iti dayta. Iti pannakaammo kadagita a gapu ket mabalin a saan unayen a mangted iti pannakagin-awa, ngem makariknakayo iti panagitured. Naggapu dagita a gapu iti daytoy maysa a kinapudno: iti naan-anay nga ayatda kadakayo, kayatdakayo nga aturen ti Nailangitan nga Ama ken ni Jesucristo tapno makadennayo Ida ken ti pamiliayo iti agnanayon. Dagiti tao a nadalusan a naan-anay laeng babaen ti Pannubbot ni Jesucristo ti makapan sadiay.
Nakilaban ni nanang iti sakit a kanser iti dumani 10 a tawen. Dagiti panagpaagas, ken panagpaoperar ken iti kamaudianan ti pannakaidalitna iti iddana ti sumagmamano kadagiti pannubokna.
Malagipko a kinuna ni tatangko kalpasan ti pannakakitana kenkuana idi magsatan ti maudi nga angesna, “Nagawiden ti maysa a bassit nga ubing tapno aginana.”
Maysa kadagiti nagsarita iti pumponna ni President Spencer W. Kimball. Kadagiti pammadayaw nga insawangna adda maysa a nalagipko a kasla kastoy ti pannakaisaona: “Mabalin a nalagip ti sumagmamano kadakayo a nagsagaba iti napaut ken nakaro ni Mildred gapu ta adda biddut nga inaramidna a nagkasapulan kadagiti pannubok.” Kalpasanna kinunana, “Saan, kinayat laeng ti Dios a mapatarnaw pay isuna iti ad-adda pay bassit.” Nalagipko iti dayta a kanito nga agpampanunot, “No kasapulan pay a patarnawen ti maysa a babai a kasta ti kasingpetna, kasanoak ngata?”
No adda pammatitayo ken ni Jesucristo, ti karigatan kasta met ti kalakaan a panawen iti biag ket mabalin a bendision. Iti amin a kasasaad makapagpilitayo iti rumbeng babaen ti pannarabay ti Espiritu. Adda kadatayo ti ebanghelio ni Jesucristo a mangsukog ken mangiwanwan iti biagtayo no pilientayo. Ken gapu kadagiti propeta nga agipaltiing kadatayo iti lugartayo iti plano ti pannakaisalakan, makapagbiagtayo nga addaan iti naan-anay a namnama ken natalna a rikna. Saan a nasken a mariknatayo nga agmaymaysatayo wenno saantayo a maipatpateg iti panagserbi iti Apo, gapu ta saan nga agpayso dayta. Mariknatayo ti ayat ti Dios. Inkari ti Mangisalakan kadagiti anghel iti makanigidtayo ken iti makanawantayo tapno mangtarabay kadatayo.10 Ken kanayon a tungpalenna ti balikasna.
Paneknekak a sibibiag ti Dios nga Ama ket ti Ay-ayatenna nga Anak ti Mannubbottayo. Impatalged ti Espiritu Santo ti kinapudno daytoy a komperensia ket aramidennanto manen daytoy no kalikagumanyo daytoy, no denggenyo daytoy, no iti agangay adalenyo dagiti mensahe dagiti napusgan a katulongan ti Apo nga adda ditoy. Ni President Thomas S. Monson ti propeta iti intero a lubong. Bambantayannakayo ti Apo. Sibibiag ti Dios Ama. Ti Ay-ayatenna nga Anak, ni Jesucristo, ti Mannubbottayo. Awan inggana ti ayatna. Paneknekak daytoy iti nagan ni Jesucristo, amen.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, May 2012. Ilokano. 10365 864