iTukutuku ni Mataveiliutaki Taumada, June 2012
iLesilesi va-Kalou kei na Veitokoni ni Tamata
Me vaka ni da lewe ni Lotu, eda sa sureti e veigauna me da tokoni ira na tamata ena nodra ilesilesi ni veiqaravi. Ena vica na yabaki sa oti e dua na gonevuli yabaki 18 a vakaraitaka vei au na cava na ibalebale ni veitokoni vei ira na dauveiqaravi ni Turaga. Au se vakalougatataki tiko ga ena nona ivakaraitaki ni yalomalua.
A se qai tekivuna sara ga nona imatai ni yabaki ena koliji. Ni se bera ni oti e dua na yabaki nona a papitaiso sa biubiu mai vale me tekivuna nona vuli ena dua na univesiti vakaitamera. Au a veiqaravi meu nona bisopi ena univesiti.
Ena gauna sa tekivu kina na yabaki ni vuli, a dua neirau veivakatarogi vakacaca ena valenivolavola nei bisopi. E lailai sara na ka au nanuma ena imatai ni veivosaki o ya vakavo nona a tukuna me baleta na nona veibolebole ena dua na vanua vou, ia au na sega ni guilecava rawa na ikarua ni neirau veivosaki.
A kerea me raici au ena noqu valenivolavola. Au kurabui ena nona kaya, “E rawa me daru masu vata, e rawa niu masu o au?” A vakarau sara ga meu kaya niu sa masu oti kau namaka ni vaka tale ga kina o koya. Au sa mani vakadonuya.
A tekivuna nona masu ena dua na ivakadinadina nona kila ni bisopi e ilesilesi va-Kalou. A kerea na Kalou me tukuna vei au na cava e dodonu me cakava ena dua na ka me kauta mai na cecere vakayalo. A tukuna vua na Kalou na gone tagane nona vakadeitaka ni sa kila oti tu na bisopi na nona gagadre ka na soli vua na ivakasala a gadreva me rogoca.
Ena nona vosa tiko, au vakasamataka na matailalai ni veika rerevaki ena sotava. E rawarawa na ivakasala ia a soli ena kena matata cecere: masu vakawasoma, talairawarawa ki na ivakaro, ka kakua ni rere.
Na gone tagane oqori, yabaki dua ena Lotu, vakavulici mai na ivakaraitaki ni ka e rawa me cakava na Kalou vata kei na dua na iliuliu, ena nona sa tokoni mai ena nodra vakabauta kei na masumasu o ira sa kacivi me liutaka. A vakaraitaka vei au na gone tagane oqori na kaukauwa ni lawa ni veivakadonui ena Lotu (raica na V&V 26:2). E dina ga ni Turaga e kacivi ira Nona dauveiqaravi ena ivakatakila, e rawa wale ga me ra cakacaka ni oti nodra tokoni mai vei ira era kacivi me ra veiqaravi kina.
Eda cakava na veiyalayalati tabu ena noda solia noda digidigi ni veitokoni. Eda yalataka me da masulaki ira na dauveiqaravi ni Turaga ni na veiliutaki ka vakaukauwataki ira o Koya (raica na V&V 93:51). Eda veiyalayalatitaka ni da na vakasaqara ka namaka me da vakila na veivakauqeti ni Kalou ena nodra ivakasala kei na gauna cava ga era qarava kina na nodra ilesilesi (raica na V&V 1:38).
Na yalayala o ya ena gadrevi me vakavoui vakawasoma e lomada. Ena tovolea na nomu qasenivuli ni Wilivola ni Sigatabu me veivakavulici ena Yalotabu, ia me vaka ga na ka e rawa mo cakava, e rawa me vakacala-ka na nomu qasenivuli ena mata ni kalasi. Ia, o iko, e rawa ni o vakasamataka mo rogoca ka dikeva ena so na gauna na nomu rawa ni vakila na kena yaco mai na veivakauqeti. Ena toso ni gauna, o na raica kina e lailai mai na vakacala-ka ka wasoma na levu ni ivakadinadina ni Kalou ena veitokoni vei qasenivuli o ya.
Ena noda laveliga ka tokona e dua na tamata, eda cakava na cakacaka ena inaki cava ga ni Turaga ni tamata o ya e kacivi me vakayacora. Ni ra se lalai na luvei keirau, a lesi na marama watiqu me vakavulici ira na gonelalai ena neitou tabanalevu. Au sega ni laveta wale ga na ligaqu meu tokoni koya, ia au masulaki koya tale ga ka qai kerea na veivakadonui me vukei koya. Na veika au vulica ena vakavinavinakataki ni veika era cakava na marama kei na loloma ni Turaga vei ira na lalai e se vakalougatataka tiko ga na noqu matavuvale kei na noqu bula.
Au qai vosa wale ga oqo vua na gone tagane o ya ka tokona nona bisopi ena vica na yabaki sa oti. Au vulica ni Turaga kei na tamata era a tokoni koya ena nona ilesilesi ni daukaulotu, me dua na peresitedi ni iteki, ka dua na tama. Ni oti neirau veivosaki a kaya, “Au se masulaki iko tiko ga e veisiga.”
E rawa me da vakadeitaka noda masu e veisiga me baleta e dua a lesi mai vua na Kalou me qaravi keda. E rawa me da vakavinavinakataka e dua ka sa vakalougatataki keda ena nona veiqaravi. E rawa ni da lewa me da volodia ena nona kere volodia e dua eda sa tokona.1
O ira era vakadeitaka na dauveiqaravi ni Turaga ena Nona matanitu era na tokoni mai na Nona kaukauwa sega ni vakatautauvatani rawa. Eda gadreva kece na veivakalougatataki o ya.
© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. iVakadewa ni First Presidency Message, June 2012. Fijian. 10366 858
Veivakavulici mai na iTukutuku Oqo
Ni oti na wasei ni itukutuku, vakasamataka mo wilika na vosa cavuti oqo: “Ena vakayagataki iko na Turaga mo nona iyaragi e ligana ke o yaloraramusumusu, yalodina ka gugumatua. … Ena gauna o sa tokoni ka vakatikori kina mai vei ira na ivavakoso lewenilotu ena tomana na nomu kaukauwa” (Veituberi, Me iLutua Ni Noda Bula [1999], 20). Soqona na matavuvale ka vakavolivolita e dua na ka bibi qai kerea e dua me tovolea me laveta cake. Soqoni ira vata tiko me dua na tamata ena dua na gauna, sureti ira na lewe ni matavuvale tale eso me ra veivuke ena kena laveti cake na ka oqo. Me veivosakitaki na cava e yaco ena gauna era veivuke kece kina vakayadua. Vakasamataka mo vakabibitaka na ivakasala nei Peresitedi Eyring me baleta na veigaunisala e rawa me da tokoni ira tale eso ena nodra ilesilesi.