Ennaan eo an Būreejtōnji eo Kein Kajuon, Juun 2012
Kar kūr jān Anij im kar Rejtak jen Armej ro
Āinwōt membōr ro an Kabun̄, emakijkij ad ruwainene n̄an rejtake armej ilo kūr ko n̄an jerbal. Iiō ko ļo̧k juon rijikuuļ 18 iiō dettan eaar kwaļo̧k n̄an n̄a ta meļeļe in n̄an rejtake ro rikarejeran Irooj. Ij jeram̧m̧an wōt jān waanjon̄ak in an ettā.
Ej kab tōn kar jino iiō eo an kein kajuon ilo kaļōj. Eaar peptaij edik ļo̧k jān juon iiō m̧okta jān kar likūt kapijuknen eo an n̄an jino ekkatak ko an ilo juon university eļap. Ijin Iaar jerbal āinwōt juon bisop.
Ke jikuuļ eaar ijjino, eaar wōr juon aō iien intōrpiu ippān ilo opiij eo an bisop. Ij kememej jidik kōn kar kōm̧m̧ao eo jinoin tata ijello̧k in ke eaar kōnono kōn apan̄ ko an ilo jikin eo ekāāl, bōtaab Ijjamin naaj meļo̧kļo̧k kōm̧m̧ao eo am̧ro kein karuo.
Eaar kajjitōk n̄an aō ioon e ilo opiij eo aō. Iaar bwilōn̄ ke eaar ba, “Jemaron̄ ke jar ippān doon, im Imaron̄ ke jar?” Iaar tōn kar ba bwe em̧ōj aō kar jar kadede im kar kōtmene bwe em̧ōj an barāinwōt jar. Ijello̧kin Iaar errā.
Eaar jino jar eo an kōn juon an naan in kam̧ool bwe eaar jeļā bwe bisop eo eaar kūr jān Anij. Eaar kajjitōk ippān Anij n̄an jiron̄ eō ta eo ej aikuj kōm̧m̧ane ilo juon jekjek eo eļap an rej waļo̧k an jetōb. Likao in eaar jiron̄ Anij eaar jeļā bisop eo em̧ōj an kar jeļā kadede aikuj ko an im enaaj kar leļo̧k kapilōk eo eaar aikuj in ron̄.
Ke eaar kōnono, kauwōtata ko rejeno̧lo̧k enaaj kar jelm̧ai kar itok n̄an ļoļātāt eo aō. Kapilōk eo eaar kadu bōtaab kar leļo̧k ilo lukkuun alikkar: jar iien otemjej, pokake kien ko, im jab mijak.
Likao in, juon iiō in an pād ilo Kabun̄ in, kar katakin kōn waanjon̄ak ta eo Anij emaron̄ kōm̧m̧ane kōn juon ritōl āinwōt an kar rejtake kōn tōmak im jar ko an ro me kar kūr e n̄an tōl er. Likao in eaar kwaļo̧k n̄an eō kajoor eo an kien jeļā ļōmņak eo ilo Kabun̄ in (lale D&C 26:2). Men̄e Irooj ej kūr ro Rikarejeran kōn m̧adenļo̧k, remaron̄ jerbal wōt ālkin aer kar rejtak jān ro kar kūr er n̄an jerbal n̄an er.
Jen bout in rejtak eo ad, jej kōm̧m̧ani kalim̧m̧ur ko raorōk. Jej kalim̧m̧ur n̄an jar kōn ro rikarejeran Irooj im bwe E enaaj tōl im kōkajoor er (lale D&C 93:51). Jej kalim̧m̧ur bwe jenaaj pukōt im kōtmene n̄an en̄jake im̧we eo jān Anij ilo kapilōk eo aer im jabdewōt iien rej jerbal ilo kūr eo aer (lale D&C 1:38).
Kalim̧m̧ur in enaaj aikuj emakijkij ad kōkāāle ilo būruwōd. Rūkaki in Jabōt Jikuuļ eo am̧ enaaj kajieon̄ katakin jān Jetōb, ak ejja āinwōt am̧ maron̄ kōm̧m̧ane, rūkaki eo am̧ emaron̄ kōm̧m̧ani bōd ko im̧aan kūlaj eo. Kwe, mekarta, maron̄ kālet n̄an ron̄jake im lale iien ko me kwomaron̄ en̄jake im̧we eo ej itok. Ilo tōre eo kwonaaj kile an iiet ļo̧k bōd ko im emakijkij an ļapļo̧k kein kam̧ool ko bwe Anij ej rejtak rūkaki eo.
Ilo ad kajutak peid n̄an rejtake juon armej, jej kalim̧m̧ur n̄an jerbal kōn jabdewōt un an Irooj me armej eo ej kūr n̄an kadedeļo̧k. Ke ajri ro nejim raar iddik, lio pāleō kar kūr n̄an katakin ajri ro eddik ilo ward eo am. Iaar jab kajutak wōt peiū n̄an rejtak e, ak Iaar barāinwōt jar kōn e innām kajjitōk kar mālim n̄an jipan̄ e. Katak ko Iaar bōk an kam̧oolol kōn ta eo kōrā ro rej kōm̧m̧ane im kōn iakwe eo an Irooj n̄an ajri ro ej kōjeram̧man wōt baam̧le eo aō im mour eo aō.
Raan ko ļo̧k Iaar kōnono ippān juon likao eo eaar rejtake bisop eo an iiō ko ļo̧k. Iaar katak bwe Irooj im armej raar rejtake e ilo kūr eo an āinwōt juon mijenede, āinwōt juon stake būreejtōn, im āinwōt juon jemen. Eaar ba ke kōm̧m̧ao eo am eaar jem̧ļo̧k, “Ij jar wōt kōn kwe aolep raan.”
Jemaron̄ jokālet n̄an jar raan otemjeļo̧k kōn juon eo kar kūr i jān Anij n̄an jerbal n̄an kōj. Jemaron̄ ļōmņak kōn juon eo me eaar kōjeram̧m̧an kōj jān jerbal in jipan̄ eo an. Jemaron̄ jokālet n̄an baļintiier n̄e juon eo jaar rejtake ej kajjitōk kōn baļintiier ro.1
Ro me rej rie ro rikarejeran Irooj ilo aelōn̄ in kiin̄ eo An naaj rejtake jān kajoor eo An ekajoor otem kajoor. Jej aolep aikuj kōjeram̧man in.
© 2012 jen Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin English: 6/11. Kōmālim an Ukook: 6/11. Ukook eo an First Presidency Message, June 2012. Marshallese. 10366 874
Katakin jān Ennaan In
Ālkin kwaļo̧k ennaan eo, ļōmņak in riiti kout kein: “Irooj enaaj kōm̧m̧an bwe kwon juon kein jerbal ilo Pein eļan̄n̄e kwoj ettā, tiljek, im niknik. … Kwonaaj bōk eļapļo̧k kajoor n̄e kwoj rejtak jān jarlepju eo im kōjeno̧lo̧k” (Teaching, No Greater Call [1999], 20). Kōm̧m̧an bwe baam̧le eo en kuk ippān doon ipeļaakin juon men eddo im kajjitōk ippān juon armej n̄an kajieon̄ kotak e. Kobaik bar juon armej ilo juon iien, kūr bar membōr ro an baam̧le eo n̄an jipan̄ kotak men eo. Ekōnono kōn ta eo ej waļo̧k n̄e aolep rej jipan̄. Ļōmņak in bar kalikkar kapilōk eo an Būreejtōn Eyring kōn wāween ko repidodo jemron̄ rejtake ro jet ilo kūr ko aer.