2012
Padahk en Pas, Pwukoa Sarawi Ehu
Suhn 2012

Iren Mahsen en Padahk en Pas, Suhn 2012

Padahk en Pas—Pwukoa Sarawi Ehu

Onopiki ni kapakap iren mahsen wet oh, nin duwen me konehng, koasoaiahkihieng lih akan me komw kin pwarek. Doadoahngki peidek kan pwehn sewesei komwi kakehlailih riomw lih akan oh pwehn elehda Pwihn en Sawas en Lih en wiahla pali kesempwal en pein ahmw mour.

Kilel en Pwihn en Sawas en Lih

Pwoson, Peneinei, Sawas

Ni atail wia sounpadahk kan en pas, kitail ahniki pwukoah kesempwal ehu me pid pali ngehn me kitail en kapwaiada. “Pisop, me kasarawihier pwehn wia silepen ward-o, sohte kak apwalih koaros sapwellimen Kauno sihpw akan ni ansou tehkis. E kin koapwoaroapwoarki sounpadahk en pas kamaraindahr kan en sewese ih.”1 Rapahki oh alehdi kaudiahl de kadehde me pid ihs me konehng pwukoahki tetehk emenemen riatail lih akan inenen kesempwal.

Kamarain kin tepida ni towe kan en presidensi en Pwihn en Sawas en Lih ahr kin kapakap oh koasoaia anahn akan en emenemen oh peneinei kan. Mwuri, ni ahr kamanaman sang pisop, presidensi en Pwihn en Sawas Lih kin patohwanda pwukoa ni wiepe me kin sewese riatail lih akan en wehwehki me padahk en pas iei pwukoan pali ngehn kesempwal ehu.2

Sounpadahk kan en pas kin esehla oh poakohng mehlel emenemen riarail lih kan, kin sewese ih kalaudehla ah pwoson, oh patohwanda sawas ni ansou me anahnepe mie. Irail kin rapahki kamarain pwehn ese duwen arail pahn apwaliala anahn akan en pali ngehn oh paliwar en emenemen lih me re kin pwarek.3

“Padahk en pas kin wiahla doadoahk en Kauno ni ansou me kitail kin tehk aramas akan ah kaidehn nempe kan en uwen me pweida. Ni mehlel, padahk en pas sohte kin imwisekla. E wia wiepen mour ieu kaidehn doadoahk ehu.”4

Sang Pwuhk Sarawi Kan

Madiu 22:36–40; Sohn 13:34–35; Alma 37:6–7

Sang Atail Poadoapoad

Eliza R. Snow, keriau en president lap en Pwihn en Sawas en Lih padahngki, “Ih kin wiahki ohpis en sounpadahk ohpis ile oh sawari ehu.” E kaweidkih sounpadahk kan en pas “ren direkihla Ngehn en Koht, en eripit, en karakarahk, en limpoak” mwohn arail pahn pwarek ihmw akan pwe irail en kak kasawiada oh apwaliala koaros anahn akan en pali ngehn iangahki anahn akan en paliwar. E patohwan, “Ke pahn kakete pehm ken kihda mahsen en kameleilei oh kaloalamwahu, oh ma ke diar emen riatail lih me pou, kihdohng ih ni mohngiongumw duwen me ke pahn wiahang serihmen kihdohng pahn edimwen oh kainsenamwahu [ih].”5

Ni atail pahn wonowei mwowe ni pwoson nin duwen me lih akan en Pwihn en Sawas Lih en mahs wia, kitail pahn kehn Ngehn Sarawi ieiang kitail oh pahn kamarainkihda duwen atail pahn sewese emenemen lih akan me kitail pwarek. “[Kitail] rapahki eripit ah kaidehn manaman,” Sister Snow nda, “oh [kitail] pahn alehdi manaman koaros me [kitail] ahniki eripit en doadoangki.”6

© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen Visiting Teaching Message, June 2012. Pohnpeian. 10366 885

Iren sawas akan

  1. Julie B. Beck, “Relief Society: A Sacred Work,” Liahona, Nohpempe 2009, 114.

  2. Tehk Handbook 2: Administering the Church (2010), 9.5; 9.5.2.

  3. Tehk Handbook 2, 9.5.1.

  4. Julie B. Beck, Liahona, Nohpempe 2009, 114.

  5. Eliza R. Snow, nan Daughters in My Kingdom: The History and Work of Relief Society (2011), 108.

  6. Eliza R. Snow, nan Daughters in My Kingdom, 45–46.