Me Pwulopwul Kan

Nan Werengen Ahmw Kaukaunop ong Ahmw Misin

President Uchtdorf kin mahsanihiong misineri kan en kin medewe me re patpato nan werengen arail misin. Komw kak ale oh doadoahngki madamadau wet ni omwi pahn kaunopada en wia ahmw misin: mendahte ma komw sounpar 12 de 18, komw kan kaunopada en wia omwi misin.

Dahnge soahng kan me komw anahne wia “nan werengen” omwi kaukaunop ong omwi misin?

• Ansou koaros komwi en warohng pidolong nan tehnpas sarawi.

• Esehla duwen kasawiada kemwekid kapehm kan en Ngehn Sarawi sang ni ntingihdi oh mwekidki kaweid kan me kin kohdo.

• Kapakapki misineri kan.

• Peki rehn misineri kan en kaweidihkin komwi dah me komwi anahne wia pwehn kaunopada ong papah nan misin.

• Esehla duwen pein apwalih mwahu ansou me komw tungoaleniki, pwehn kapatahieng kemwekid kesempwal kan me rasehng sewese aramas, onopiki pwuhk sarawi kan, oh nting nan noumw pwuken ketemen.

• Ni ansou me komw kin koasoaiong omwi peneinei, ehukihda iren pwuhk sarawi me sair komwi. Kawehwe dahme komwi medemedewehki iren pwuhk sarawio.

• Idek rehn kompoakapahmw kan duwen arail pelien lamalam kan oh dahme re kin kamehlele. Ngoangki en kin ehukihda dahme komw kamehlele. Luke irail en iang sarawi oh pil soangen pwurokirahm teikan.

Ni omw pahn kasawiada me komw patohier nan werengen omwi kaunop ong omwi misin, komwi kakehr wiada omwi mour en warohng likilik en Kauno oh iangahng en Ngehn Sarawi.