Poraus seni ewe Aewin Presetensi, July 2012
Fansoun meinisin mi nom Nukunapan
Non chommong taropwe a mak pwe July a nom nukunapan ewe ier. Nupwen a wor nepoputan me nespononun mettoch sia apwapwaiti me chechemeni, nge nukunapan ekkei mettoch sise esinesin.
Nepoputan a eu fansoun pwe sipwe achocho ne awora ach kewe ekiek sia mochen fori, pwe sipwe kokkot, me sipwe angei pochokun. Nesoponon a eu fansoun pwe sipwe awesano mettoch me sipwe tongeni mefi murinno ika ngau ika sise awesano met sia mochen. Nge ren ekiek mi pung, ika sia ekieki pwe sia nom nukunapan mettoch a tongeni anisikich pwe sipwe weweiti manau pwan ekkis me sipwe manau ngeni mettoch mi murinno.
Nukunapan Angangen Misineri
Nupwen ua fos ngeni ach kewe misineri mi kukun ierir, fan chommong ua erenir pwe ra nom nukunapan ar kewe misin. Ina mo ika ra keran war naneu are repwe sai ngeni fonuer nesor, ua pesei ngenir pwe fansoun meinisin repwe ekieki pwe ra nom nukunapan nepoputan me nesoponon.
Misineri minafo ra tongeni mefi pwe ese wor ar tufichin angangoch, me ra chok amangano ar fos ika ar föfförun pwara. Ekkoch misineri mi wesewesen sinei angangen misineri ra tongeni mefi netipengau fan iten ar kewe misin repwene wes, ika ar angang epwe ekkis mang pun ra ekipwichi usun met repwe fori mwirin ar misin.
Ese nifinifin nonnomur ika ia ra angang ia, mi ennet pwe An ewe Samon kewe misineri ra amora foun iran kapas mi murinno iteitan ran. Nupwen ekkei chon angangen ewe Samon ra ekieki pwe fansoun meinisin ir mi nom nukunapan ar kewe misin repwe pworacho me angei pochokun. Usun chok ren misineri mi angang iteitan ran, mi usun chok rech.
Fansoun Meinisin Sia nom Nukunapan
Ei sokkun ekiek ese chok ekisiwin ach ekiek. Ei ekiek mi wesewesn ennet pwe kich sia nom nukunapan fansoun meinisin. Ika sia nengeni ewe ia sia nonnom ia won echo map, sia mochen era pwe sia nom non nepoputan. Nge ika sia wesewesen nenengeni, ese nifinifin ia sia nom ia sia chok nom nukunapan eu watten neni.
Usun chok ren neni, mi chok usun ren kinikinin fansoun. Sia tongeni mefi pwe sia nom nepoputan ika nesopononun manauach, nge nupwen sia nenengeni fansoun meinisin me ia sia nom ia non ei fansoun—nupwen sia esinna pwe ngunuch kewe mi chok nom me mwen sia tongeni weweiti me, pokiten fanganon An Jises Kraist Achasefan, ngunuch me inisich repwe nom feinfeino chok—sia tongeni esinna pwe sia wesewesen nom nukunapan nepoputan me nesoponon.
Ekkiseno chok ua mefi pwe upwe för sefani ewe fauen peias non peiasen inei me semei we. Fan iten a nangatam fansoun nom ar peias ese chuen och, me ua mefi pwe efou fauen peias minafo epwe murinno fan iten ar föfföroch non manauer. Nupwen ua kuna ar ranin uputiw me ar ranin mano non ewe fau a pwan wor ewe minen mak a kinikin fesenir, me ei kukun minen mak a wewen unusan manauer me a amasoueni ai ekiek me netipei ren chommong mettoch mi murinno ua chechemeni. Meinisin ekkewe mettoch ua chechemeni mi chok usun eu atun nukunapan manauen inei me semei we pwan usun chok manauei.
Ese nifinifin ierich, ia sia nom ia, ika inet mettoch mi fis non manauach, fansoun meinisin sia chok nom nukunapan nepoputan me nesoponon. Iwe, sipwe nom nukunapan tori feinfeino chok.
Sipwe Apinukunuku pwe Sipwe Nom Nukunapan
Mi pung, epwe wor ekkoch fansoun nepoputan me fansoun nesoponon non manauach kewe, nge ekkei fansoun mi chok ekkoch essisin mi nom nukunapan ewe anen manau ese much. Ese nifinifin ika sia nom nepoputan ika nesoponon, ese nifinifin ika a kukun ierich ika a watte ierich, ewe Samon A tongeni aea ach tufich ren napanapan An kewe popun ika sipwe chok nikitano ach ekiekingau me tipeu ngeni Netipan.
Ewe Chon Konupin a era, “Iei ranin an ewe Samon win, sipwe ne pwapwa o fori apwapwan” (Konupin 118:24). Amulek a achema kich pwe “ei manau kich mi nom non ikenai, a ngeni kich ach fansoun ach sipwe ammon pwe sipwe churi Kot; ewer iei fansoun aramas meinisin repwe en me fori an angang” (Alma 34:32; esisinnan kapas mi kapachenong) Emon chon mak a era, “Fochofoch—a masou ren chommong fansounen iei.”1
Pun sia chok nom nukunapan fansoun meinisin a wewen pwe ewe kitir ese wes, apinukunuk ese poutuno, me sise mo kuf. Ese nifinifin ia sia nom ia ika nonnomuch, a wor chommong fansoun nepoputan tori feinfeino me chommong fansoun nesoponon tori feinfeino fan mesach.
Fansoun meinisin sia nom nukunapan.
© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun ewe First Presidency Message, July 2012. Chuukese. 10367 901
Afanafan Seni Ei Poraus
Ka tongeni poraus fengen ren ewe famini ifa usun ra “nom nukunapan fansoun meinisin,” ina mo ika ra keran poputani ika asopwano och mettoch. Kopwe pesei ngenir pwe repwe wesewesen angangoch non met ra fori iei, pwe resap ekieki usun met a fen fis me resap witiwit ren mettoch rese mo fis. Ka tongeni pesei ngenir pwe repwe fini eu mettoch ra tongeni fori non ar famini pwe repwe tapweno mwirin ekkei kapasen aurour me ra tongeni fini eu ran pwe repwe achocho ne apwonueta ei mettoch.