Klumech er a First Presidency, Ongetiu el Buil 2012
Omerk er a Ebangkelio lokiu a Reng el mo er a Reng
A Dios a mo mengedechuul me a tireke el kldmokl el chad el mo rongesii a ebangkelio a mo sebecherir el mo kabetech tir me a kldmokl el mesiungel el mo ouchais er a ebangkelio. Tia mla duubech er a chelsel a klengar er kau. Ng tela el blal dubech a ouai tia a ultuil er a ketmeklel a uldesuem me a rengum.
Ngar er ngii a sechelik el ngii a meluluuch er a bek el sils mebo el sebechel mo kebetech ngii me a ta er a chad el mla mekedmokel el mo rongesii tia el ebangkelio. Ng oba lobengkel a Babier er a Mormon. Se el kesus er a uchei er a kedeb el omerelell, e ng tilbir el diak bo el nguu a copy lobengkel e ng di bai monguu a pass-along card. E ng di bocha lorech er ngii el merola, e ng mlo omelchesiu el kmo: “Mnguu a Babier er a Mormon lobengkem.” Ng ngiluu a chimo el loia er a til.
A redil el lodengelii el kiliei er bita er ngii er tia el omerael, e ng mlo melechedech, “Ng kai kid a ngii?” Ng ka el redil a mla er a osisiu el omerael er a luut er ngii. Ng ulemdasu, “Ak mekera kumuchel mesaod er a ebangkelio?”
E bai, ngika el redil a dilu er ngii el kmo, “Kau a melecha ongeltacher el mo er a ikelesia er kau, a dang diak?” Ng dilu el kmo ng uaisei. Ngika el redil a dilu el uase ng mle kirel melecha ongeltacher el mo er a ikelesia er ngii, e bai dimlak. Uriul e ng uleker el kmo, “Ngera sebechem el ouchais er ngak el kirel a Babier er a Mormon?”
Ngika el chad a uluchais el kmo tia el hong a chedaol llechukl, e ta er a sioning er a Jesus Kristo, e mlo iiuud er a Profet Joseph Smith. Ngika el redil a mle semeriar, me ngika el sechal a mocha melai er a til e dula el kmo, “Ng mla er a renguk el melai er tia el hong lobengkek. Ak kumedasu e tia mo er kau.”
Ngika el redil a ulemuchel el menguiu er ngii. Tia er a lebo el kebii, e ngika el redil a kmo, “Kau me ngak a mo er ngii a lmuut el kemanget el cheldechedechad el kirel tiang.”
Se el dimlak lodengelii a sechelik—e bai Dios a mle medengelii—el uase ngika el redil a ulsiik er a ikelesia. A Dios a mle medengelii ngika el redil el blechoel lomes er a sechelik e ulemdasu el ngera me a ikelesia er ngii a rirelii meng kmal ungil a rengul. A Dios a mle medengei el kmo ngika el redil a mo oker el kirel a Babier er a Mormon e dirrek el ngii a ngar er ngii a rengul a mo mesuub ngii me a remisionari. Ng mle kldmokl. Me a sechelik meng dirrek. Kau me a ngak a sebeched el dirrek el mo kldmokl.
Tia el oketmeklel el dousbech er ngii a nga er a uldesued me a rengud. Ngika el dil a rirengesii e dobedebekii a tekoi el kirel a Babier er a Mormon, oltel a Ikelesia er a Rubak, me a llach el melecha ongeltacher el mo er Dios. Ng dirrek el ngika el dil a ulemelchesiu a uchelel a sioning er a klemerang er a rengul.
A Rubak a mla kmu Ngii a mo olecholt a klemerang el mo er a uldesued me a rengud lokiu a Chedaol Reng (mesa D&C 8:2). Betok el chad el bom kabetech a mla nga er ngii tia el uchelel a omketmeklir. Te mla orrenges e menguiu el kirel a Dios me a tekingel. Omko a ika el rengrir a mle mui el medemdemek, e tir a mlo omelchesuar, a blel telkib, a oterkeklel a klemerang.
Ngika el dil a mle kldmokl. Me ngika el sechelik, el Uriul- Klebesei el Santo el ngii a mla mesuub er a Babier er a Mormon. Ngii el sechal a mla melechesuar er a sioning el kmo tia a klemerang, e dirrek el mla metebengar lokiu a ulekrael er a Reng melenguu a ta er tia el babier lobengkel. Ngii a mle kldmokl er a chelsel a udesuel me a rengul.
A Dios a mengetmokel er a rechad el mo nguu se el klaumerang er kau er a mla moluutl el klemerang. Ngii ousbech er a klaumerang er kau me a omerellem el mo omerk e ouchais el diak a dektelem er tia el ua le kmal mla mo kesiokel el mo er kau me a tirkel betik er a rengum el chad.
Mrelau el kldmokl el mo omerk e momekeek er uldesuem er a bek el sils lolab a klemerang er a ebangkelio. Me se el moltirakl a lechul a Dios e moldanges a telbilem, e kau a mo melchesuar a klemerang er a Chedaol Reng me a beltikelreng er a Osobel el mo er kau me a rechad el mkebetech.
Se el moruul a ngerchelem, e kau a mo ngmai a obdois el klebokel el blekeradel el mo omes er a rechad el tir a kldmokl el mo rongesii a olchotel a klaumerang—er kau er a klemerang, el ngar er a reng el mo er a reng, ngar er kau el mo er tir.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, September 2012. Palauan. 10369 881
Osischeklel Tia el Klumech
Molatk el menguii er tia el klumech lobengkel a telungalek e mosaod el kirel a tekoi el debetik er a uchei er se el ulebongel el bades, el President Eyring a mengedecheduch el kirel a rael e ng mo mesisiich a olchotel a klaumerang er a chad. Mosaod lobengkel a telungalek er a ututelel olchotel a klaumerang er kau se el momerk er a ebangkelio. A rengalek er a telungalek a sebechel ngosuterir lokiu omeruul el leko tolecholt a klaumerang er tir el mo er a resechelid.