Traem Tokbaot Jos blong Yu long Mifala
Sona Mur, Vejinia, YSA
Long wan trip blong go visitim brata blong mi, mi bin sidaon long jea biaen long plen, long ples we ol wokman blong plen oli stap sidaon long hem. Tufala ro long ples ia oli fesem tufala.
Mi bin talem nem blong mi long ol pipol we oli bin stap sidaon raon long mi, mo afta, mi bin talem se bae mi go long Brigham Yang Yunivesiti. Wan man we i sidaon long fored blong mi i bin talem long mi se gel blong hem i bin gat wan gud fren we i jes go long wan fultaem misin. Gel blong hem i save smol abaot Jos, be hem, hem i no save wan samting. Wokman blong plen i talemaot wantaem se hem, bae hem i no wantem stap memba blong “jos ia” from se hem i agensem ol woman. Man ia i talem se hem i bin harem samting we i kolosap semmak—se ol Lata-Dei Sent woman oli daon moa long man, se oli no save kasem prishud o prisaed long ol miting, mo se plante samting insaed long Jos i blong ol man nomo.
Afta, hem i lukluk mi, mo askem: “Yu, yu filim olsem wanem long saed blong samting ia?” Evri seven pipol ia oli lukluk mi mo oli bin wet.
Hat blong mi i stap blong pam strong. Taem mi yangfala pikinini, mi bin lanem Ol Toktok blong Bilif baehat, mo i stret long taem olsem, mo taem mi bin yangfala mo yang adalt, mi bin praktis blong talem testemoni blong Josef Smit abaot fas visen mo Buk blong Momon. Be mi no eni tingting nating long olsem wanem nao bae mi ansa long kwestin blong man ia. Mi bin prea kwaet blong Papa long Heven i lidim mi.
Afta, mi talem ol fas toktok we oli kam long tingting blong mi: “Yufala i no save nomo abaot Rilif Sosaeti.” Fes blong olgeta i jenis mo mi luk se oli no save.
“Prishud i wok mo i joen wetem ol woman; mo evri woman oli ol memba blong Rilif Sosaeti,” mi eksplenem. “Mifala i wan Rilif Sosaeti presiden we i lidim ol aktiviti blong ol woman insaed long Jos raon long wol. responsabiliti blong ol woman oli blong karem kaen fasin mo jareti i go insaed long laef blong ol memba mo speseli insaed long laef blong ol famle blong olgeta.”
Ol pipol raon long mi oli bin stap lisin gud.
“Yumi stap laef blong wan defren kaen taem, we sam woman oli wantem se sam narafala woman oli mekem samting, mo oli tingting, mo oli stap olsem ol man. Be mifala i biliv se God i bin serem ol wok i stap. Mifala i wantem luk se ol woman oli stap olsem ol lida long medel blong ol woman, mo oli ol patna lida insaed long hom blong olgeta. Ol man, oli dipen bigwan long mifala long saed blong advaes long ol eria ia. Hem i balens stret mo gud. Hem i mekem se ol oganaesesen blong Jos blong mifala mo hom blong mifala oli gat sakses. Mo mifala i biliv tru se man i no save stap we i no gat woman, mo woman i no save stap we i no gat man, long fasin blong Lod (luk long Fas Korin 11:11). Mifala i biliv se mifala i no fulwan sapos i no gat narawan. Mifala i no biliv se God i bin krietem mifala ol woman, blong mifala i kompit wetem man, be blong mifala i joen mo mekem mitufala i fulwan.”
Mi bin filim se God i bin blesem mi taem mi bin finis. Mi bin save se ol toktok we mi bin talem, oli kam long Spirit. I luk se evriwan i bin glad wetem toktok blong mi. Afta, man ia i talem: “Traem talem moa abaot jos blong yufala.”
Afta, blong 2 aoa, mi bin gat gudfala janis ia blong tokbaot Restoresen, blong ansarem ol kwestin, mo talem testemoni blong mi long saed blong gospel we mi lavem.