Porausen An Fefin Chon Amwa, November 2012
Usun Niamam me Pwon
Kopwe anneani ekkei mettoch iwe, nupwen mi och, kopwe aporausa ren ekkewe fefin ka churir. Kopwe aea ekkewe kapas eis ne anisuk ne apochokuna ekkewe fefin ka churir me pwan aochu manauom ren aean Fin Anisi. Ren pwan ekkis poraus, kopwe feino won www.reliefsociety.lds.org.
Usun Niamam
Preseten Monson, sia tongek. Kinisou ren om pwarata usun kautan ekkewe tempel minafo me angangen misineri. Pokiter, ua sinei pwe watte feioch epwe tori kich me mwirimwirich.
Pwi me fefinei mi achengecheng, chienei mi achengecheng! Kich menisin sipwe mano. Amo ita sisap mairu ren ei porous.
Esap fansoun nangatam ach nomnom won ei founufan. Mi chok wor ekkoch ier, nupwen sia ekiek usun fansoun ese much, esap fansoun nangatam.
Nupwen sia mano, Ngunuch “repwe niwinno ren ewe chok Kot a ngenir manauer.”1 Sia poutano ei inis o poutano pisikin ei founufan nupwen sia feino ngeni ewe manau ese much.
Nupwen sia chok aunuon me fopun, a usun sipwe manau feinfeino. Sia ekiek pwe mi chok wor pwan chommong ran sipwe kuna, me manauach epwe usun eu aan esap much.
Nupwen sia chinapano, sia nenengeni o sia mairu ren mochomochen manauach. Sia ekiek ifa usun a mwitirano. Sia pwan ekiek usun met sia fori me met sia finata non manauach. Sia chechemeni met a apwapwaiti netipach. Nge sia pwan chechemeni met sia niamam—ekkewe mochen sipwe tongeni fori sefan me siwini.
Emon chon aninisin sou safei a tumunu ekkewe arapaken repwene mano a kapas eis ngeniir me mwen ra mano.
“Mi wor om mefien niamam non manauom?” epwe eisini.2
Ar arapaken repwene mano a anisir pwe repwe fatafatoch non ar ekiek usun manauer. Nupwen ei nengin a eisinir, ra suki netiper me ekiek usun met repwe siwini ika ra tongeni amanaueni manauer sefan.
Nupwen ua rong met ra apasa, ua ekieki ifa usun ewe nongonongen ewe kapas allimen Jises Kraist epwe anisi kich ne fori met mi och non manauach ika sipwe fori met a aiti kich.
Ese wor mettoch mi monomon usun ewe nongonongen ewe kapas allim. Sia kaeo seni ekkewe pukfel, sia kaeo non Sukunen Raninfel, me sia rongorong afanafan usun fan chommong. Ei nongonong a fatafatooch; ir mi ningooch o fatafatooch; me repwe anisi kich pwe sisap mefi ewe mefien niamam usun manauach.
Ua Mochen Anapano Ai Fansoun ren ekkewe Aramas Ua Tongei
Iei ewe aewin mefien niamam an ekkewe aramas ra arapaken repwene mano. Ra mochen anapano ar fansoun ren ekkewe aramas ra tongei.
Ekkewe mwan ra apasa iei usun: “ra netipecho ar ra ani angang fansoun nagatam me rese urumot are kukuno ren ar famini me chiener kewe.”3 Rese fokkun chiechifengen ren ekkewe mi fokkun auchea ngeniir.
Esap ennet pwe sa osukosuk non manauach? Fan ekkoch sia mefi ekis och nap seni chienach kewe pun a watte ach angang o met sia fori usun ei mei namwot.
Mi pung?
Ua ekieki usun ach Samon o ach Chon Apiru, Jises Kraist, me manauen mi mochomoch ren ekkewe chon Galilee o Jerusalem. Ua ekiek ika Jises a mwitir ne fiti mwich o fori chomong mettoch mwitir pwe a tongeni wesano chomong sokupaten angang.
Use kuna.
Ua kuna Noun Kot mei kirikirooch a angang murino iteitin ran. Nupwen a porous ngeni chienan kewe, a pwarata pwe ir mi auchea me a tongei ir. A sinei unusen namwoten ekkewe aramas a poraus ngeni. A afeiochu ir me a afanfafana ir. A anisir me a apochokunata ir. A ngeniir an fansoun.
Ikenai, a mecheres ach sipwe kukuno ren chienach. Ren ach computa, sia tongeni porous ngeni chommong aramas, nge sise pwisen kuna meser. Ekkewe computa mi och, me a anisi kich mi touau seni ach famini. Ngang me punuei mi touau seni ach famini. Am oua sinei namoten ewe computa. Nge ua ekiek pwe ese och ika ach poraus ngeni ach famini wewen pwe sia tinano ngeniir sasing mi atakirikir are tinano ngeniir echo taropwe won ewe computa ar repwe nenengeni. Eni ei sokun a tongeni ekis och, nge fitu minutes oupwe ani won ei sokun urumot? Ika sise fangeta unusen netipach me wesewesen aucheani chienach me ach famini, sipwe mefi niamam.
Sipwe pwon pwe sipwe tumunu ekkewe sia tongei ren ach ngeniir ach fansoun pwe sia tongeni angang fengen, me tongfengen pwe epwe wor ach achechema ei fansoun non ei manau.
Amo ita Ua Manau ngeni Ai Tufich
Pwan eu niamam a fis nupwen emon ese manaueni usun met a tongeni. Nupwen emon a ekieki usun manauen, a sinei pwe ese fori unusen met a tongeni fori non ei manau.
Usap fos usun emon a angang tori i ewe mi nap non an angang. Ei sokun ese fokkun namwot non ach sai ngeni ewe manau ese much.
Nge ua fos usun ach sia winiti met Kot, Semach won Nang, a mochen sipwe winiti.
Sia tori ei founufan, usun emon a apasa, “fiti ren ach ning”4 seni ach nom ren Kot me mwen ei manau.
Samach won Nang a sinei met sia tufichen fori. A sinei ach tufich nap seni ach pwisen sinei. A pesei kich non manauach pwe sipwe fori mettoch menisin kich mi tongeni, manau pwe manauach mi murrino, me niwin ngeni I.
Iwe, pwata sia angang fansoun nangatam o angang weires ngeni ekkewe mettoch ese nifinifin? Pwata sise kuna namotan ach angang ngeni ekkewe mettoch rese auchea?
Mi tipechem sipwe “achocho ngeni ami oupwe pisikisekino non nang, ikewe ekkewe manchonap me parang rese tongeni atai, o ekkewe chon sona rese tongeni atai o sonani”?5
Ifa usun sipwe fori iei usun? Sipwe apiru angangen ach Chon Amanau, ren ach fori usun met a aiti kich non manauach iteitan ran, ren ach tongei Kot me aramas meinisin.
Sise tongeni ika sia chipwang non ach sounang, are sia maicha ngeni Kot ren ach fansoun are sia pweni are fos mi ngau usun ach angang.
Non ach sounang, sisap usun ewe at a fori pwe pechen a tonong non ewe saat, nge a apasa pwe “ua feino tuken”. Kich noun Kot at me nengin, iwe, a watte ach tufich. Ach mochen ese naf. Sipwe fori. Mi fokkun amwot sipwe winiti met Samach Kot a mochen sipwe winiti.
Ach pwarata ach kapasen pwarata usun ewe kapas allim mi och, nge mi fen och sipwe manaueni. Ach mochen fori ach kewe pwon mi pin mi och, nge mi fen och ach apwonueta ch kewe pwon mi pin—me manau non nimenimoch, moni ach eu ne engon, apwonueta ewe Kapasen Emirit me anisi ekkewe mi osupwang. Ika sia apasa pwe sipwe ani ioteken famini, kaeo ekkewe pukfel, me ani mwichen famini mi och; ach fori ekkei sokun epwe niwinito feiochen nang ngeni manauach.
Manau tupwon wewen pwe sia kutta met mi pin me apwapwa. Ina ewe aan ngeni ach angoch me pwapwa non ei manau.
Sipwe pwon pwe sipwe tapweno mwirin ach Chon Amanau me winiti aramas mi murrino usun met Kot a kokota rech. Sipwe ausening ngeni o fori usun pesepesen ewe Ngun mi Fel. Nupwen sia fori iei usun, Samach Kot epwe pwarata mettoch mi wor ach tufichen fori, nge sise fen sinei. Epwe pwarata ewe aan o suki messach ngeni ach tufich ne fori mettoch sise mo sinei.
Ewe fansounen ach achocho ne kutta pwapwa o kutta met mi pin, epwe wewen pwe sise fiti ewe aan ngeni niamam. Nupwen sia nuku non ewe Chon Amanau, a anapano ach mefi pwe sia fiti ewe aan Samach Kot a mochen sipwe fiti.
Amo Ita Ua Pwisin Muut Ngeniei Pwe Ua Tongeni Pwapwa
Eni kopwe ekis mairu usun pwan eu niamamen ekkewe aramas ra arapaken ar repwe mano. Ra mefi niamam pokiten rese pwisin muut ngeniir pwe ra tongeni pwapwa.
Fan chomong sia ekieki pwe ika a ekis sokufessen, sipwe pwapwa—a ekis sokufessen non ach famini, a wor pwan ach moni, are sia wesano eu fansoun mi weires.
Iwe, nupwen sia chinap, sia sinei pwe esap ach moni are wesinon ach fansoun weires a fori pwe sipwe pwapwa.
Kich i nifinifin. Sia finata ika sipwe pwapwa.
En me ngang, kich sia pwisin meinap ne finata ika sipwe pwapwa.
Nang me punuei, Harriet, am aua fokkun sani am aupwe wa wam kewe bisiken. Am aua fokkun sani am aupwe wa o kuna ningochen ei founufan. Mi wor ekkoch aan am aua sani ne fiti. Am ause nenengeni nagatamen am sai are ike pwan kewe chon bisiken ra muitir nap seni kem.
Fan ekkoch, ua ekiek epwe och ika am aua ekis mutir. Eni am aupwe pwan tongeni ekis mutir ika am aupwe achocho pwan ekis. Me fan ekkoch ua apasa ei sokkun ngeni punuei.
Iteitin fansoun ua fos iei usun, punuei a fokkun kirikirooch me fokkun fatafatoch non an ponueni. A emenimen me a apasa, “Dieter, esap ewe kitir, ina ewe sai mi namwot. Kopwe pwapwa ren ewe fansoun ka fiti ewe sai.”
Punuei mi pung!
Fan ekkoch non manauach sia nenengeni ewe nesoponon, nge sise kuna ewe pwapwa mi nom non ewe sai. Usap fiti wai bisiken pun ua mochen awesano ai sai. Ua fiti pun ewe fansoun am aua sai fengen a apwapwaiti ei.
Esap umwes ach sisap angaua ewe fansoun mi pwapwa me och pokiten sia nenengeni chok ewe fansoun repwe wesano?
Sia rongorong kon pwe epwe wesano me mwen sipwe sani? Ap. Sia rongarong unusen ewe kon nupwen a fis.
En mi iotek me ekieki usun ewe “amen” are nesoponon non mokurom? Ap. Sia iotek pwe sipwe arapaken Samach Kot, angei An Ngun, me mefi An tong.
Sisap witi ach sipwe pwapwa tori pwan eu fansoun, pun sipwe kuna pwe ewe tufichin pwapwa mi fen nom rech—fansoun menisin! Sise manau pwe sipwe pwapwa ren fansoun a fen fis ngenikich. “Iei ranin an ewe Samon win … ” ewe soumak a makkei. “Sipwe ne pwapwa o fori apwapwan.”6
Pwi me fefinei, ese nifinifin ia ka nonnom ia, met sokun sosot are fansoun weires a toruk, mi wor pwapwa me mettoch mi och non iteitin ran, ika sipwe kukuna.
Eni sisap nenengeni ren mesach, nge sipwe nenengeni ren netipach. Ua tongei ewe kapas “Emon mi tongeni kuna fatafatoch ren netipan chok. Ekkewe mettoch mei namwot sise kuna ren mesach.”7
Kot a annuka pwe sipwe “apasa ach kinisou non mettoch menisin.”8 Iwe, a fen och ika sia kuna ren messach me netipach ekkewe mettoch mi kisikis sia tongeni kinisou ren, nap seni ach awatteno ekkewe mettoch mi ngau non manauach?
Ewe Samon a apasa, Io a angei mettoch menisin ren an kinisou, epwe angei an ning, me ekkewe pisekin ei founufan repwe pacheta ngeni fan ipuku.9
Pwi me fefinei, ren watten ach feioch seni Samach Kot, An kokoten manau ese much, ewe enneten ewe kapas allim, me ningochen ei founufan, esap wor popun ren ach pwapwa?10
Iwe, sipwe finata pwe sipwe pwapwa, ese nifinifin nonnomuch.
Usun Pwon
Eu ran sipwe mano. Eu ran sipwe nenengeni manauach a fen fis me ekiek ika sia tongeni fori met mi och, finata met mi och, are fori pwan ekis ren ach fansoun.
Pwe sisap mefi niamam usun manauach, epwe tipechem ika sipwe fori ekkoch pwon ikenai. Iwe, sipwe:
-
Pwon sipwe anapano ach fansoun ren ekkewe sia tongeiir.
-
Pwon ne achocho ne winiti ewe aramas Kot a mochen sipwe winiti.
-
Pwon pwe sipwe kutta o kuna pwapwa, ese nefinifin nonnomuch.
Iei ai kapasen pwarata pwe chommong ach niamamen ei founufan isap kuna ika sia tapweno murin ach Chon Amanau ikenai. Ika sia tipis are finata mi mwan—ika sia finata met sia fen mefi ach niamam pokiten—mi wor an Kraist Achasefan, me sia tongeni angei omusamusen ach tipis ren. Sise tongeni siwini met a fis me nom, nge sia tongeni aier. Ach Chon Amanau a tongeni awesano ach kechiw11 pokiten ach tipis me niwini niwinen ach tipis.12 An Achasefan a fori pwe sia tongeni nikitano met sia fori me nom me sopweno manauach ren pouch mi nimenimoch, netipach mi unusoch,13 me ach pwon pwe sipwe foffor mi och o weswesen winiti aramasoch.
Ewer, ei manau mi mwitir; ekkewe ran ra mwitirano; me sia niweiti mano. Nge ngunuch epwe chuen manau, me epwe fitifengen ren inisich rese chuen mano sefan. Ua pwarata pwe pokiten an Jises kirikiroch, kich meinisin sipwe manau sefan feinfeino chok. Pokiten ach Chon Amanau o ach Chon Angaseno, eu ran sipwe wesewesen weweiti “ekkei kapas ewe kuen mano a wesano ren Kraist.”14
Ewe aan ne fori met Kot a mochen seni kich, noun kewe at me nengin a sopweno feinfeino chok. Pwi me fefinei mi achenecheng, chienei mi achengecheng, sipwe poputa ne fiti ei aan ese much ikenai; sisap nikitano eu chok ran. Ua pesei kich menisin pwe sisap witiwit tori arapaken sipwene mano ne kaeo ifa usun sipwe manau. Fan iten Jises Kraist, amen.
© 2012 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/11. Kapungunon chiakun: 6/11. Chiakun Visiting Teaching Message, November 2012. Chuukese. 10371 901