Naan in Katak an Kōrā ro, Nobōm̧ba 2012
Ikkijien Ajļo̧k ko im Jibadbad ko
Lukkuun ekkatak katak in im, n̄e ekkar, kōnono kake ippān kōrā ro jeim ak jatim kwoj loļo̧k. Kōjerbal kajjitōk ko n̄an jipan̄ eok kōkkajoorļo̧k kōrā ro jeim im jatim, im n̄an kōm̧m̧an bwe Doulul eo an Kōrā en m̧ōttan eo emourur an mour eo am make. N̄an meļeļe ko reļļapļo̧k, etal n̄an reliefsociety.lds.org.
Ikkijien Ajļo̧k ko
Būreejtōn Monson, kōm̧ij iakwe eok. Kom̧ool kōn kōjjeļļā eo eim̧we im bwebwenato in ekkal an tampeļ ko rekāāl im jerbal in mijendede. Kōn men kein, ijeļā kōjeram̧m̧an ko reļļap renaaj itok n̄an kōj im n̄an elōn̄ epepen ko ilju im jekļaj.
Ro jeiū im jatū, ro m̧ōtta jitōnbōro! Jej aolep wabanban. Ij kōjatdikdik bwe menin ejjab itok āinwōt juon bwilōn̄ n̄an jabdewōt.
Ejjeļo̧k iaad enaaj pād ioon laļ in ilo juon iien elukkuun aitok. Ewōr jet iiō ko raorōk ilo ad pād ioon laļ in, ilo kalimjōk eo ejjeļo̧k jem̧ļo̧kin, ekadu jon̄an wōt an māj rom.
Innām jej em̧m̧akūt. Jetōb ko ad “rej ilo̧k n̄an jikier n̄an Anij eo eaar leļo̧k n̄an [kōj] mour.”1 Jej door ānbwiin ko laļļo̧k ilo lōb im ilo̧k jān men ko bwinnin mour in n̄e jej em̧m̧akūt n̄an jikin eo ad indeeo.
N̄e jej dik, ej āinwōt n̄e jenaaj mour n̄an indeeo. Jej ļōmņak ejjeļo̧k jon̄an raan ko in ad mour, im tokālik eo ej kalimjōk kōj āinwōt juon iaļ edipieo me im̧aad ejjeļo̧k jem̧ļo̧kin.
Mekarta, ilo ad rūttoļo̧k, an ļapļo̧k ad kōņaan reilikļo̧k im bwilōn̄ kōn ewi jon̄an an lukkuun in kadu iaļ eo. Jej kejōkļo̧kjeņ ekōjkan an iiō ko maron̄ kar kanooj m̧ōkaj aer eļļāļo̧k. Im jej jino ļōmņak kōn kālet ko jaar kōm̧m̧ani im men ko jaar kōm̧m̧ani. Ilo jekjek eo, jej kememej elōn̄ iien ko rem̧m̧an me rej letok okmeņeņ n̄an jetōb ko ad im lan̄lōn̄ n̄an būruwōd. Bōtaab jej barāinwōt kememej ajļo̧k ko—men ko jej kōņaan jemaron̄ kar ro̧o̧l likļo̧k im ukōti.
Juon nōōj eo ej kōjparok armej ro renan̄inmej ej ba bwe emakijkij an kōn kajjitōk juon kajjitōk epidodo n̄an rinan̄inmej ro an ilo aer pojak n̄an door mour in.
“Ewōr ke jabdewōt ami ajļo̧k ko? Liin ekōn kajjitōk.2
Kanooj epaak n̄an raan eo āliktata an mour in emakijkij an letok alikkar eo n̄an ļōmņak eo im ej letok ļōmņak im meļeļe. Kōn menin n̄e armej rein raar kajjitōk kōn ajļo̧k ko aer, raar kōpeļļo̧k būruwier. Rej ememļo̧k kōn ta eo kar ukōte eļan̄n̄e wōt raar maron̄ bar ro̧o̧l likļo̧k n̄an jem̧aan.
Ke iaar ļōmņak kōn ta eo raar ba, iaar bwilōn̄ kōn ewi jon̄an an pedped ko im̧aan an ko̧jpeļ eo an Jisōs Kraist maron̄ jelet iaļ eo an mour eo ad n̄an em̧m̧an, eļan̄n̄e jenaaj kōjerbali wōt.
Ejjeļo̧k juon men ekabwilōn̄lōn̄ kōn pedped ko an ko̧jpeļ eo. Jaar ekkatak kaki ilo jeje ko rekwojarjar, jaar ekōnono kaki ilo Jabōt Jikuuļ, im jaar ron̄ kaki jān lokatok in elōn̄ kōttan. Pedped kein rekwojarjar im aorōk ko rej kajju im alikkar; raiboojoj, m̧wilaļ, im kajoor; im remaron̄ ilo lukkuun jipan̄ kōj kabōjrak ajļo̧k ko ilju im jekļaj.
Iakwe In Kar Joļo̧k Eļapļo̧k Iien ippān Armej ro Ij Iakwe
Bōlen ajļo̧k eo ekanooj ļap rinan̄inmej ro epaak aer mej rej kwaļo̧k kar bwe raar kōņaan joļo̧k eļapļo̧k iien ippān armej ro rej iakwe.
Em̧m̧aan ro eļaptata raar kwaļo̧k en̄jake in eļap an liājļoļ—er “m̧wilaļ aer ajļo̧k joļo̧k eļap aer iien ilo [raan otemjej] in jekjek in … jerbal eo aer.”3 Elōn̄ raar jerwaane ememļo̧kjeņ ko raorōk me rej itok jān joļo̧k iien ippān baam̧le im ro m̧ōttad. Raar jerwaane ejaake juon ekkejel em̧wilal ippān ro me raar kanooj ļap aer aorōk n̄an er.
Em̧ool ke bwe emakijkij ad kanooj poub? Im, ekabūrom̧ōjm̧ōj n̄an ba, ļōmņak kōn m̧ool eo bwe jōpoub n̄an erom juon men eutiej, kōn menin poub, kōn e make, raar juon tōprak ak kōkaļļe an juon mour eļap.
Ej ke?
Ij ļōmņak kōn ad Irooj im Waanjon̄ak, Jisōs Kraist, im mour eo An ekadu ibwilijin armej in Galilee im Jerusalem. Iaar kajieon̄ n̄an pijaikļo̧k E ekairir ikōtaan kweilo̧k ko ak jerbal ko rellōn̄ n̄an kadedeļo̧k juon laajrak in men ko repād ie.
Ijjab maron̄ loe.
Ijello̧kin, ij lo tenkwadik im kea eo an Nejin Anij mour kajjojo raan kōn juon un. Ke Eaar ikitōltōl ippān ro Ipeļaakin, raar en̄jake aorōk im iakwe eo. Eaar jeļā aorōk eo ejjeļo̧k jem̧ļo̧k in an armej ro Eaar ioon er. Eaar kōjeram̧m̧an er, kwaļo̧k n̄an er. Eaar kotak lōn̄ļo̧k er, kar kōmour er. Eaar leļo̧k n̄an er menin letok eo eaorōk an iien eo An.
Ilo tōre in ad, epidodo n̄an etan ke jidik n̄an joļo̧k iien ippān ro jet. Kōn jiped an juon mouse jemaron̄ “ekkeijel” ippān taujin “ro m̧ōttad” ilo jab jelm̧ae kajjojo iaer. Kein kapeel emaron̄ juon men eaiboojoj, im elukkuun aorōk n̄e jejjab maron̄ epaake ro rejitōnbōro ippād. Lio pāleō im n̄a komij pād ettoļo̧k jān ro raorōk uwaan baam̧le eo am; kōm jeļā ewi wāween. Mekarta, ij tōmak bwe jejjab iookļo̧k iaļ eo ejim̧we, kajjojo im āinwōt juon jukjuk in pād, n̄e jej ekkeijel ippān baam̧le eo ak ro m̧ōttad eļaptata kōn illik pija ko rellōn̄, jilkinļo̧k n̄an ro jet men ko rejjab aorōk, ak kakkeijel ro rejitōn bōro ippād ilo site ko ak ilo Internet. Ij ļōmņak ewōr juon jikin n̄an kain m̧akūtkūt in, ak ewi jon̄an iien eo jej m̧ōņōņō in joļo̧k n̄an e? Eļan̄n̄e jelikjab n̄an leļo̧k iien eo em̧m̧an tata an kajjojo im iien eo jab kōjeno̧lo̧k n̄an ro me rej lukkuun aorōk n̄an kōj, juon raan jenaaj ajļo̧ke.
Kōm̧m̧an bwe jān kije n̄an kautiej ro jej iakwe er kōn joļo̧k iien eo eaorōk ippāer kōm̧m̧ani men ko ippān doon, im kōjparok ememļo̧kjeņ ko raorōk.
Iakwe In Kar Mour Ekkar n̄an Kōjatdikdik eo Aō
Bar juon armej eajļo̧k eaar kwaļo̧k bwe raar likjab n̄an erom armej eo raar en̄jake remaron̄ in kar im aikuj in kar. Ke raar reilikļo̧k ilo mour ko aer, raar kile bwe rejjan̄in kar mour ekkar n̄an kōjatdikdik eo aer, eaar lōn̄ men ko raar jab dedeļo̧k.
Ijjab ekōnono ijin kōn tallōn̄e jikin iuwe eo an wejepedik ilo jerbal ko ad rellōn̄. Jikin iuwe eo, jekdo̧o̧n ewi nana an maron̄ waļo̧k ioon laļ in, oran ko reddik n̄an juon bun̄tōn ilo iaļ eo eļap indeeo ej kōttar kōj.
Ijello̧kin, Ij ekōnono kōn erom armej eo Anij, Jemedwōj Ilan̄, eaar ļame bwe jān erom.
Jej ļewadetok laļ in, āinwōt an rijeje poem eo kar ba, “anōk kōdo̧ in aiboojoj ko”4 jān mour eo m̧okta.
Jemedwōj Ilan̄ ej lo kōjatdikdik eo ad em̧ool. Ejeļā men ko kōn kōj me jejjab jeļā kaki kōn kōj make. Ej im̧we kōj ilo tōrein ad mour n̄an kakūrm̧ool jon̄ak eo an kōm̧anm̧an eo ad, n̄an mour juon mour em̧m̧an, im n̄an bar ro̧o̧l n̄an im̧aan Mejān.
Innām, etke jej wujlepļok eļap ad iien im kajoor eo n̄an men ko me ekanooj kadu kitier, kanooj jaorōk, im kanooj men waan? Jej ke m̧akoko n̄an lo bwebwe eo ilo pukōt men ejjab aorōk im kadu kitien?
Enaaj ke kar em̧m̧an ļo̧k n̄an kōj n̄an “koorļo̧k m̧weiuk n̄an [kōj make] i lan̄, ijo dile im jo rej jab kan̄i, im ijo riko̧o̧t re jab rupe im ko̧o̧te”?5
Ekōjkan ad kōm̧m̧ane menin? Jān ļoor waanjon̄ak eo an Rilo̧mo̧o̧r, jen kobaik katak ko An ilo mour ko ad, jen m̧ool in iakwe Anij im armej.
Em̧ool jej jab maron̄ kōm̧m̧ane menin kōn adim̧akoko, kalimjōk awa eo ad, alin̄ūrn̄ūr ilo ad ilo̧k n̄an erom rikaļoor.
N̄e ej itok n̄an mour kōn ko̧jpeļ eo, jej aikuj jab āinwōt juon ļaddik eo eaar katulo̧k addi in neen ilo dān eo innām ba eaar aaō. Āinwōt ļaddik im leddik ro nejin Jemedwōj Ilan̄, eļap ad ekeke n̄an elōn̄ļo̧k men. Kōn menin, kōttōpar ko rem̧m̧an rej jab bwe. Jej aikuj kōm̧m̧ane. Em̧ool eļapļo̧k an aorōk, jej aikuj erom ta eo Jemedwōj Ilan̄ ekōņaan bwe jān āinwōt.
Kwaļo̧k naan in kam̧ool eo ad kōn ko̧jpeļ eo em̧m̧an, ak erom juon waanjon̄ak emour ōn jepļaaktok eo an ko̧jpeļ eo em̧m̧anļo̧k. Kōnaan n̄an erom tiljekļo̧k n̄an bujen ko ad em̧m̧an; kanooj tiljek n̄an bujen ko rekwojarjar—ekitbuuj mour juon mour em̧m̧an, kōļļā juon m̧ōttan jon̄oul ko im jortak ko ad, kōjparok Naan in Māletlet im jerbal n̄an ro rej pād ilo aikuj—eļapļo̧k n em̧m̧an. Kōjeļļā bwe jenaaj wujlepļo̧k eļapļo̧k iien n̄an jar an baam̧le, ekkatak jeje ko ekwojarjar, im elōn̄ m̧akūtkūt o an baam̧le em̧m̧an; bōtaab kanooj kōm̧m̧ani aolepān men kein renaaj lukkuun bōktok kōjeram̧m̧an ko an lan̄ n̄an mour ko ad.
Rikaļoor ej kajieon̄ bōk kwojarjar im m̧ōņōņō. Ej iaļ eo n̄an em̧m̧anļo̧k eo ad im m̧ōņōņōļo̧k eo.
Kōm̧m̧an bwe jān ņa mejļan, n̄an ļoor Rilo̧mo̧o̧r eo im jerbal kōn niknik n̄an erom armej eo me kar ejaake n̄an erom. Kōm̧m̧an bwe jān ron̄jake im pokake im̧we ko an Jetōb Kwojarjar. Ilo ad kōm̧m̧ane āindein, Jemedwōj Ilan̄ enaaj kwaļo̧k n̄an kōj men o jejjan̄in kar jeļā m̧okta kōn kōj make. Enaaj kwaļo̧k n̄an kōj wāween eo im jipan̄ kōj n̄an loe men ko jab jeļā kaki im bōlen tōļan ko jab ļōmņak kaki.
An ļapļo̧k ad wujlepļo̧k kōj make n̄an pukōt kwojarjar im m̧ōņōņō eo, enaaj āinwōt dikļo̧k ad pād ilo iaļ eo n̄an ajļo̧k ko. An ļapļo̧k ad pedped ioon jouj eo an Rilo̧mo̧o̧r, eļapļo̧k ad naaj en̄jake ilo bwe jej pād ioon iaļ eo Jemed ilo Lan̄ eaar kōm̧m̧an n̄an kōj.
Iakwe In Kar Kōm̧m̧an Bwe In Mōņōņōļo̧k
Bar juon ajļo̧k an ro me raar jeļā raar jino mej ļo̧k emaron̄ kar kailbōkbōk. Raar kōņaan bwe ren kar kōm̧m̧an bwe er make ren m̧ōņōņōļo̧k.
Ekanooj emakijkij ad po ilo jāmilur eo me ewōr juon men eļapļo̧k jān ad tōpare me enaaj bōktok n̄an kōj m̧ōņōņō—: juon jekjek em̧m̧an an baam̧le, juon jekjek kōn jāān em̧m̧anļo̧k, ak jem̧ļo̧k eo an juon iaļ epen.
Ilo ad rūttoļo̧k, ilo an ļapļo̧k ad reilikļo̧k im kile bwe kaje ko peļakiid rejjab lukkuun aorōk ak ļōmake m̧ōņōņō eo ad.
Jej aorōk. Jej kile m̧ōņōņō eo ad.
Kwe im n̄a āliktata rej bōk eddo in m̧ōņōņō eo ad make.
Lio ippa, Harriet, im n̄a rej iakwe iuwe ilo baajkōļ ko waam̧ro. Eiaboojoj n̄an ilo̧k im lem̧ōņōņō kōn aiboojoj ko an peļaakid. Ewōr jet am iaļ kōm kōņaan baajkōļ ie, bōtaab kōm̧ij jab kanooj leļo̧k am n̄ani ewi jon̄an am ilo̧k ak ewi jon̄an an m̧ōkaj an baajkōļ ļo̧k keidi ippān ribajkōļ ro jet.
Mekarta, jet iien ij ļōmņak kōmij aikuj in iaikooj jidik. Ij ļōmņak emaron̄ kar em̧m̧anļo̧k iien eo ak baajkōļ ilo juon iiūm̧ eo em̧ōkajļo̧k eļan̄n̄e wōt kōm̧ kar iuunļo̧k kōm̧ make jidik—. Jet iien em̧ool ij kōm̧m̧an bōd eļap ilo aō kwaļo̧k ļōmņak in n̄an lio pāleō em̧m̧an.
Uwaak eo an n̄an elmakot ko aō kōn kain in ej iien otemjej lukkuun in jouj, alikkar, im kajju. Ej ettōn im ba, “Dieter, ejjab juon aikooj; ej juon iaļ. Lem̧ōņōņō kōn iien eo.”
Ewi jon̄an an jim̧we!
Jet iien ilo mour, ekanooj in ļap ad kalimjōk jem̧ļo̧k eo me jej likjab n̄an lo lan̄lōn̄ eo ilo iaļ eo. Ijjab etal n̄an bajkōōļ ippān lio pāleō kōnke ij lem̧ōņōņō kōn jem̧ļo̧k eo. Ij etal kōnke en̄jake eo kōn pād ippān ej em̧m̧an im kalem̧ōņōņō.
Āinwōt ke emenin bwebwe n̄an kakkure ioon en̄jake ko rem̧m̧an im kam̧ōņōņō kōnke jej jokkun wōt juon anto̧o̧ne iien eo n̄e renaaj jem̧ļo̧k?
Jej ke ron̄jake al ko raiboojoj rej kōttar note eo āliktata n̄an an jakoļo̧k m̧okta jān ad kōtļo̧k kōj make n̄an m̧ool in lem̧ōņōņō kake? Jaab. Jej ron̄jake im kobaik kajjojo oktak eo em̧m̧an an ainikien, im emļak ilo aolepān naan eo.
Jej ke kōm̧m̧ani jar ko ad kōn wōt “amen” ak jem̧ļo̧k eo ilo ļōmņak? Em̧ool jaab. Jej jar n̄an epaake Jemedwōj Ilan̄, n̄an bōk Jetōb eo An im en̄jake iakwe eo An.
Jej jab aikuj kōttar n̄an m̧ōņōņō m̧ae iien jej tōpar jet iien ilju im jekļaj, n̄an wōt lo bwe lem̧ōņōņō eo eaar kadede pād—aolep iien ko! Mour ejjab n̄an wōt kam̧oolol kōn men ko jem̧aan. “En̄in raan eo Jeova eaar kōm̧m̧ane … ,” rijeje Sam eo eaar je. “M̧ōņōņō im lan̄lōn̄ ium̧win.”6
Ro jeiū im jatū, jekdo̧o̧n ta jekjek ko ad, jekdo̧o̧n ta apan̄ ko ad ak mālijon̄ ko, ewōr jet men ilo kajjojo raan n̄an dāpiji im kautieji. Ewōr jet men ilo kajjojo raan me emaron̄ bōktok kam̧oolol im lan̄lōn̄ wōt eļan̄n̄e jenaaj lo im kam̧oolol kaki.
Bōlen jej aikuj kadikļo̧k ad lo kōn mejād make im ļapļo̧k kōn būruwōd. Ij iakwe kout eo: “Juon ealikkar an lo kōn būruwōn wōt. Jabdewōt men aorōk epen loi kōn māj ko.”7
Kar jiron̄ kōj “n̄an leļo̧k kam̧m̧oolol ko ilo men otemjej.”8 Kōn menin em̧m̧anļo̧k ke n̄an lale kōn mejād make im būruwōd em̧ool men ko reddik jej maron̄ kam̧oolol kake, ijello̧kin ālij nana eo ilo jekjek eo ad kiiō?
Irooj eaar kallim̧ur bwe juon armej eo ej bōk aolep men ko kōn kam̧oolol naaj kōm̧m̧an bwe en aiboojoj, im men ko an laļ in naaj orļo̧k n̄an e buki alen.9
Ro jeiū im jatū, kōn kōjeram̧m̧an ko rōllōn̄ an Jemedwōj Ilan̄, karōk in lo̧mo̧o̧r eo An em̧m̧an, m̧ool ko rekwojarjar an ko̧jpeļ eo kōjepļaaktok, im elōn̄ aiboojoj ko an em̧m̧akūt in ilo mour in, “ewōr unin aer m̧ōņōņō?”10
Kōn menin kōm̧m̧an bwe jān ņa mejļan n̄an m̧ōņōņō men̄e jekjek ko ad.
Ikkijien Jibadbad ko
Juon raan jenaaj bōk bun̄tōn eo eban bōke im em̧m̧akūt jān mour wabanban in n̄an laļ eo juon. Juon raan jenaaj reilikļo̧k n̄an mour ko ad im bwilōn̄ eļan̄n̄e jemaron̄ kar m̧m̧anļo̧k, kōm̧m̧ani jokālet ko rem̧m̧anļo̧k, ak ļapļo̧k ad meletlet ilo kōjerbal iien eo ad.
N̄an joļo̧k jet iaan ajļo̧k ko reļļap an mour, enaaj meletlet n̄an kōm̧m̧ane jet jibadbad ko rainin. Kōn menin, jen:
-
Ņa mejļan n̄an joļo̧k eļap iien ippān ro jej iakwe er.
-
Ņa mejļan n̄an kajieon̄ m̧ooļ ļo̧k n̄an erom armej eo Anij ekōņaan bwe jān erom
-
Ņa mejļān n̄an pukōt m̧ōņōņō, jekdo̧o̧n apan̄ rōt ko ad.
Ej aō naan in kam̧ool bwe elōn̄ iaan ajļo̧k ko reļļap an ilju remaron̄ in bōbrae jān ļoor Rilo̧mo̧o̧r rainin. Eļan̄n̄e jaar jerawiwi ak kōm̧m̧ani bōd ko—eļan̄n̄e jaar kōm̧m̧ani kālet ko me jej kiiō ajļo̧ki—ewōr juon menin letok aorōk an Pinmuur eo an Kraist, kōn eo maron̄ jeorļo̧k bōd eo ad. Jejjab maron̄ ro̧o̧l likļo̧k im ukōt jem̧aan, bōtaab jemaron̄ ukweļo̧k. Rilo̧mo̧o̧r eo emaron̄ joļo̧k būrom̧ōj eo ad kōn ajļo̧k11 im kōm̧akūt eddo eo an jerawiwi ko ad.12 Pinmuur eo An ej kōtļo̧k bwe jān likūt jem̧aan eo itulikiid im wōnm̧aanļo̧k kōn pā erreo, juon bōro erreo,13 im juon kije n̄an kōm̧m̧an em̧m̧anļo̧k im erom em̧m̧anļo̧k.
Aaet, mour in em̧ōkaj an eļļāļo̧k; raan ko ad rej āinwōt m̧ōkaj aer jakoļo̧k; im mej ej waļo̧k ekamijak ilo iien ko. Mekarta, jetōb eo ad enaaj wōnm̧aanļo̧k wōt n̄an mour im naaj juon raan bar koba ippān ānbwiin jerkakpeje eo n̄an bōk iboojoj eo ejjab wabanban. Ij kwaļo̧k kam̧ool ilo m̧ool bwe kōnke kōn jouj eo an Kraist, jenaaj mour bar juon alen im n̄an indeeo. Kōnke kōn Rilo̧mo̧o̧r im Ripinmuur eo ad, juon raan jenaaj kanooj meļeļe im lem̧ōņōņō ilo meļeļe in naan ko “kein ier an mej ej oran̄ļo̧k ilo Kraist.”14
Iaļ eo m̧aanļo̧k n̄an kakūrm̧ool jem̧ļo̧k eo ad ekwojarjar āinwōt ļaddik ro im leddik ro nejin Anij ej juon indeeo. Ro jeiū im jatū, ro m̧ōttan rejitōnbōro, jej aikuj jino etetal ilo iaļ eo indeeo rainin; jej jab maron̄ jerwaane juon raan. Ij jar bwe jejjamin naaj kōttar m̧ae iien jepojak n̄an mij m̧o̧kta jān ad lukkuun katak n̄an mour. Ilo etan Jisōs Kraist, amen.
© 2012 jen Intellectual Reserve, Inc. Aolep jim̧we rej pād ippān. Jeje ilo Amedka. Fankatoavana ny teny Anglisy: 6/11. Fankatoavana ny fandikana: 6/11. Ukook eo an Visiting Teaching Message, November 2012. Marshallese. 10371 874